| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
28. கம்மனித்³தே³ஸவண்ணனா
28. Kammaniddesavaṇṇanā
199. அத⁴ம்மகம்மந்தி எத்த² கத²ங் அத⁴ம்மகம்மங் ஹோதீதி சே? வுத்தஞ்ஹேதங் ப⁴க³வதா ‘‘கதமஞ்ச, பி⁴க்க²வே, அத⁴ம்மகம்மங்? ஞத்திது³தியே சே, பி⁴க்க²வே, கம்மே ஏகாய ஞத்தியா கம்மங் கரோதி, ந ச கம்மவாசங் அனுஸ்ஸாவேதி, அத⁴ம்மகம்மங். த்³வீஹி ஞத்தீஹி கம்மங் கரோதி, ந ச கம்மவாசங் அனுஸ்ஸாவேதி, அத⁴ம்மகம்மங். ஏகாய கம்மவாசாய கம்மங் கரோதி, ந ச ஞத்திங் ட²பேதி, அத⁴ம்மகம்மங். த்³வீஹி கம்மவாசாஹி கம்மங் கரோதி, ந ச ஞத்திங் ட²பேதி, அத⁴ம்மகம்ம’’ந்தி (மஹாவ॰ 387). இமினா நயேன ஸேஸகம்மேஸுபி வுத்தப்பகாரேன அகத்வா அஞ்ஞதா² கரணங் அத⁴ம்மகம்மந்தி வேதி³தப்³ப³ங்.
199.Adhammakammanti ettha kathaṃ adhammakammaṃ hotīti ce? Vuttañhetaṃ bhagavatā ‘‘katamañca, bhikkhave, adhammakammaṃ? Ñattidutiye ce, bhikkhave, kamme ekāya ñattiyā kammaṃ karoti, na ca kammavācaṃ anussāveti, adhammakammaṃ. Dvīhi ñattīhi kammaṃ karoti, na ca kammavācaṃ anussāveti, adhammakammaṃ. Ekāya kammavācāya kammaṃ karoti, na ca ñattiṃ ṭhapeti, adhammakammaṃ. Dvīhi kammavācāhi kammaṃ karoti, na ca ñattiṃ ṭhapeti, adhammakamma’’nti (mahāva. 387). Iminā nayena sesakammesupi vuttappakārena akatvā aññathā karaṇaṃ adhammakammanti veditabbaṃ.
வக்³கே³னாதி வக்³கே³ன ஸங்கே⁴ன. கத²ஞ்ச வக்³க³ங் ஹோதீதி சே? யாவதிகா ச பி⁴க்கூ² கம்மப்பத்தா, தே அனாக³தா ஹொந்தி, ச²ந்தா³ரஹானங் ச²ந்தோ³ அனாஹடோ ஹோதி, ஸம்முகீ²பூ⁴தா படிக்கோஸந்தி, வக்³க³கம்மந்தி இமேஸு யேன கேனசி ஏகேனபி அங்கே³ன வக்³க³ங் ஹோதி.
Vaggenāti vaggena saṅghena. Kathañca vaggaṃ hotīti ce? Yāvatikā ca bhikkhū kammappattā, te anāgatā honti, chandārahānaṃ chando anāhaṭo hoti, sammukhībhūtā paṭikkosanti, vaggakammanti imesu yena kenaci ekenapi aṅgena vaggaṃ hoti.
ஸமக்³கே³னாதி ஸமக்³கே³ன ஸங்கே⁴ன. கத²ங் ஸமக்³க³ங் ஹோதீதி சே? யாவதிகா ச பி⁴க்கூ² கம்மப்பத்தா, தே ஆக³தா ஹொந்தி, ச²ந்தா³ரஹானங் ச²ந்தோ³ ஆஹடோ ஹோதி, ஸம்முகீ²பூ⁴தா நப்படிக்கோஸந்தி, ஸமக்³க³கம்மந்தி ஏவங்.
Samaggenāti samaggena saṅghena. Kathaṃ samaggaṃ hotīti ce? Yāvatikā ca bhikkhū kammappattā, te āgatā honti, chandārahānaṃ chando āhaṭo hoti, sammukhībhūtā nappaṭikkosanti, samaggakammanti evaṃ.
சதுத்த²ந்தி ஸமக்³கே³ன த⁴ம்மிகங். எத்தாவதா ‘‘சத்தாரிமானி, பி⁴க்க²வே, கம்மானி, அத⁴ம்மேன வக்³க³கம்மங், அத⁴ம்மேன ஸமக்³க³கம்மங், த⁴ம்மேன வக்³க³கம்மங், த⁴ம்மேன ஸமக்³க³கம்ம’’ந்தி (மஹாவ॰ 384) ஏவங் வுத்தானி சத்தாரி கம்மானி பரிக்³க³ஹிதானி ஹொந்தீதி வேதி³தப்³பா³னி.
Catutthanti samaggena dhammikaṃ. Ettāvatā ‘‘cattārimāni, bhikkhave, kammāni, adhammena vaggakammaṃ, adhammena samaggakammaṃ, dhammena vaggakammaṃ, dhammena samaggakamma’’nti (mahāva. 384) evaṃ vuttāni cattāri kammāni pariggahitāni hontīti veditabbāni.
200-202. த³ஸவக்³கி³கோ (மஹாவ॰ 388; கங்கா²॰ அட்ட²॰ நிதா³னவண்ணனா) வீஸதிவக்³கி³கோ ச த³ஸவீஸதிவக்³கி³கோ. அப்³பா⁴னோபஸம்பதா³ப்பவாரணா ட²பெத்வா ஸப்³ப³கம்மேஸு கம்மப்பத்தோதி ஸம்ப³ந்தோ⁴. ஏவங் ஸேஸேஸுபி. இதரோதி வீஸதிவக்³கோ³ ச அதிரேகவீஸதிவக்³கோ³ ச.
200-202. Dasavaggiko (mahāva. 388; kaṅkhā. aṭṭha. nidānavaṇṇanā) vīsativaggiko ca dasavīsativaggiko. Abbhānopasampadāppavāraṇā ṭhapetvā sabbakammesu kammappattoti sambandho. Evaṃ sesesupi. Itaroti vīsativaggo ca atirekavīsativaggo ca.
203. இதா³னி கம்மப்பத்தே ச ச²ந்தா³ரஹே ச த³ஸ்ஸேதுங் ‘‘சதுவக்³கே³னா’’திஆதி³ வுத்தங். தத்த² (பரி॰ 488, 497; பரி॰ 487-488) பகதத்தா நாம யே பாராஜிகஉக்கி²த்தலத்³தி⁴னானாஸங்வாஸகா ந ஹொந்தி. பரேதி ஏகஸீமட்டா² பகதத்தா பி⁴க்கூ². யதி³ பகதத்தா பி⁴க்கூ²பி அஞ்ஞதரங் கா³மஸீமங் வா நதீ³ஸமுத்³த³ஜாதஸ்ஸரக²ண்ட³ஸீமாஸு வா அஞ்ஞதரங் பவிஸித்வா டி²தா ஹொந்தி, நேவ கம்மப்பத்தா, ந ச²ந்தா³ரஹா. ந ஹி தேஸங் ச²ந்தோ³ வா பாரிஸுத்³தி⁴ வா ஆக³ச்ச²தி அஞ்ஞஸீமாயங் டி²தத்தா. ஸேஸேபீதி பஞ்சவக்³கா³தி³கரணீயேபீதி அத்தோ².
203. Idāni kammappatte ca chandārahe ca dassetuṃ ‘‘catuvaggenā’’tiādi vuttaṃ. Tattha (pari. 488, 497; pari. 487-488) pakatattā nāma ye pārājikaukkhittaladdhinānāsaṃvāsakā na honti. Pareti ekasīmaṭṭhā pakatattā bhikkhū. Yadi pakatattā bhikkhūpi aññataraṃ gāmasīmaṃ vā nadīsamuddajātassarakhaṇḍasīmāsu vā aññataraṃ pavisitvā ṭhitā honti, neva kammappattā, na chandārahā. Na hi tesaṃ chando vā pārisuddhi vā āgacchati aññasīmāyaṃ ṭhitattā. Sesepīti pañcavaggādikaraṇīyepīti attho.
204. அஸங்வாஸக³ணபூரங் வா கத்வா கதங் கம்மங் குப்பஞ்ச ஹோதி, காரகானஞ்ச து³க்கடந்தி அத்தோ². ‘‘யஸ்ஸ ஸங்கோ⁴ கம்மங் கரோதி, தங்சதுத்தோ² கம்மங் கரெய்ய, அகம்மங் ந ச கரணீய’’ந்தி (மஹாவ॰ 389) வுத்தத்தா ‘‘கம்மாரஹக³ணபூரங் வா’’தி வுத்தங். இதா³னி பரிவாஸாதி³கம்மானங்யேவ பரிஸதோ விபத்திங் த³ஸ்ஸேதுங் ‘‘க³ருகட்ட²க³ணபூரங் வா’’தி வுத்தங். தம்பி அனிக்கி²த்தவத்தங் ஸந்தா⁴ய வுத்தங். நிக்கி²த்தவத்தோ பன ஸப்³ப³த்த² க³ணபூரகோ ஹோதி ஏவ.
204. Asaṃvāsagaṇapūraṃ vā katvā kataṃ kammaṃ kuppañca hoti, kārakānañca dukkaṭanti attho. ‘‘Yassa saṅgho kammaṃ karoti, taṃcatuttho kammaṃ kareyya, akammaṃ na ca karaṇīya’’nti (mahāva. 389) vuttattā ‘‘kammārahagaṇapūraṃ vā’’ti vuttaṃ. Idāni parivāsādikammānaṃyeva parisato vipattiṃ dassetuṃ ‘‘garukaṭṭhagaṇapūraṃ vā’’ti vuttaṃ. Tampi anikkhittavattaṃ sandhāya vuttaṃ. Nikkhittavatto pana sabbattha gaṇapūrako hoti eva.
205. வாரெய்யாதி படிக்கி²பெய்ய. ‘‘அனுஜானாமி, பி⁴க்க²வே, அத⁴ம்மகம்மே கயிரமானே படிக்கோஸிது’’ந்தி (மஹாவ॰ 154) ஹி வுத்தங். அந்தராயே ஸதீதி அத்தோ². ‘‘அத⁴ம்மகம்மங் இத³ங், ந மேதங் க²மதீ’’தி ஏவங் த்³வே தயோ அஞ்ஞமஞ்ஞங் தி³ட்டி²ங் ஆவி கரெய்யுந்தி அத்தோ². யதி³ ஏகோ ஹோதி, ‘‘ந மேதங் க²மதீ’’தி ஏவங் அதி⁴ட்டா²னங் கரெய்யாதி அத்தோ². எத்தாவதா ஏதே நிராபத்திகா ஹொந்தி, அந்தராயா ச முச்சந்தி, கம்மங் பன அத⁴ம்மத்தா குப்பமேவ. வாரெந்தேவ ததோதி⁴காதி எத்த² ‘‘அனுஜானாமி, பி⁴க்க²வே, சதூஹி பஞ்சஹி படிக்கோஸிதுங், த்³வீஹி தீஹி தி³ட்டி²ங் ஆவி காதுங், ஏகேன அதி⁴ட்டா²துங், ‘‘ந மேதங் க²மதீ’’தி (மஹாவ॰ 154) வுத்தத்தா சத்தாரோ வா பஞ்ச வா வாரெந்தி ஏவாதி அத்தோ².
205.Vāreyyāti paṭikkhipeyya. ‘‘Anujānāmi, bhikkhave, adhammakamme kayiramāne paṭikkositu’’nti (mahāva. 154) hi vuttaṃ. Antarāye satīti attho. ‘‘Adhammakammaṃ idaṃ, na metaṃ khamatī’’ti evaṃ dve tayo aññamaññaṃ diṭṭhiṃ āvi kareyyunti attho. Yadi eko hoti, ‘‘na metaṃ khamatī’’ti evaṃ adhiṭṭhānaṃ kareyyāti attho. Ettāvatā ete nirāpattikā honti, antarāyā ca muccanti, kammaṃ pana adhammattā kuppameva. Vārenteva tatodhikāti ettha ‘‘anujānāmi, bhikkhave, catūhi pañcahi paṭikkosituṃ, dvīhi tīhi diṭṭhiṃ āvi kātuṃ, ekena adhiṭṭhātuṃ, ‘‘na metaṃ khamatī’’ti (mahāva. 154) vuttattā cattāro vā pañca vā vārenti evāti attho.
206. இதா³னி யேஹி படிக்கி²த்தங் ஹோதி, தே த³ஸ்ஸேதுங் ‘‘கம்மாரஹா’’திஆதி³ வுத்தங். தத்த² கி²த்தசித்த-க்³க³ஹணேன உம்மத்தகோபி க³ஹிதோவ. ஏதேஸந்தி யே வுத்தப்பகாரா, தேஸங் படிக்கே²போ ந ருஹதீதி அத்தோ².
206. Idāni yehi paṭikkhittaṃ hoti, te dassetuṃ ‘‘kammārahā’’tiādi vuttaṃ. Tattha khittacitta-ggahaṇena ummattakopi gahitova. Etesanti ye vuttappakārā, tesaṃ paṭikkhepo na ruhatīti attho.
207. இதா³னி யஸ்ஸ படிக்கே²போ ருஹதி, தங் த³ஸ்ஸேதுங் ‘‘பகதத்தேகஸீமட்ட²-ஸமஸங்வாஸபி⁴க்கு²னோ’’தி வுத்தங். தஸ்ஸத்தோ² (மஹாவ॰ 394) – ஏவரூபஸ்ஸ பி⁴க்கு²னோ படிக்கோஸனா அந்தமஸோ ஆனந்தரஸ்ஸாபி ஆரோசெந்தஸ்ஸ ருஹதீதி. ‘‘பி⁴க்கு²ஸ்ஸ, பி⁴க்க²வே , பகதத்தஸ்ஸ ஸமானஸங்வாஸிகஸ்ஸ ஸமானஸீமாயங் டி²தஸ்ஸ அந்தமஸோ ஆனந்தரிகஸ்ஸபி பி⁴க்கு²னோ விஞ்ஞாபெந்தஸ்ஸ ஸங்க⁴மஜ்ஜே² படிக்கோஸனா ருஹதீ’’தி (மஹாவ॰ 394) வுத்தங்.
207. Idāni yassa paṭikkhepo ruhati, taṃ dassetuṃ ‘‘pakatattekasīmaṭṭha-samasaṃvāsabhikkhuno’’ti vuttaṃ. Tassattho (mahāva. 394) – evarūpassa bhikkhuno paṭikkosanā antamaso ānantarassāpi ārocentassa ruhatīti. ‘‘Bhikkhussa, bhikkhave , pakatattassa samānasaṃvāsikassa samānasīmāyaṃ ṭhitassa antamaso ānantarikassapi bhikkhuno viññāpentassa saṅghamajjhe paṭikkosanā ruhatī’’ti (mahāva. 394) vuttaṃ.
208. ஸம்முகா² யதி³ படிக்கோஸெய்யாதி அத்தோ². திரொக்கா²தி பரம்முகா². காயஸாமக்³கி³ங் வா ச²ந்த³ங் வா நோ த³தெ³ய்ய, து³க்கடந்தி அத்தோ². கம்மவினிச்ச²யோ.
208. Sammukhā yadi paṭikkoseyyāti attho. Tirokkhāti parammukhā. Kāyasāmaggiṃ vā chandaṃ vā no dadeyya, dukkaṭanti attho. Kammavinicchayo.
கம்மனித்³தே³ஸவண்ணனா நிட்டி²தா.
Kammaniddesavaṇṇanā niṭṭhitā.
