| Library / Tipiṭaka / ཏིཔིཊཀ • Tipiṭaka / པཊིསམྦྷིདཱམགྒ-ཨཊྛཀཐཱ • Paṭisambhidāmagga-aṭṭhakathā |
༧. ཀམྨཀཐཱཝཎྞནཱ
7. Kammakathāvaṇṇanā
ཀམྨཀཐཱཝཎྞནཱ
Kammakathāvaṇṇanā
༢༣༤. ཨིདཱནི ཏསྶཱ ཧེཏུསམྤཏྟིཡཱ པཙྩཡབྷཱུཏཾ ཀམྨཾ དསྶེནྟེན ཀཐིཏཱཡ ཀམྨཀཐཱཡ ཨཔུབྦཏྠཱནུཝཎྞནཱ། ཏཏྠ ཨཧོསི ཀམྨཾ ཨཧོསི ཀམྨཝིཔཱཀོཏིཨཱདཱིསུ ཨཏཱིཏབྷཝེསུ ཀཏསྶ ཀམྨསྶ ཨཏཱིཏབྷཝེསུཡེཝ ཝིཔཀྐཝིཔཱཀཾ གཧེཏྭཱ ‘‘ཨཧོསི ཀམྨཾ ཨཧོསི ཀམྨཝིཔཱཀོ’’ཏི ཝུཏྟཾ། ཏསྶེཝ ཨཏཱིཏསྶ ཀམྨསྶ དིཊྛདྷམྨཝེདནཱིཡསྶ ཨུཔཔཛྫཝེདནཱིཡསྶ ཙ པཙྩཡཝེཀལླེན ཨཏཱིཏབྷཝེསུཡེཝ ཨཝིཔཀྐཝིཔཱཀཉྩ ཨཏཱིཏེཡེཝ པརིནིབྦུཏསྶ ཙ དིཊྛདྷམྨཝེདནཱིཡཨུཔཔཛྫཝེདནཱིཡཨཔརཔརིཡཱཡཝེདནཱིཡསྶ ཀམྨསྶ ཨཝིཔཀྐཝིཔཱཀཉྩ གཧེཏྭཱ ཨཧོསི ཀམྨཾ ནཱཧོསི ཀམྨཝིཔཱཀོཏི ཝུཏྟཾ། ཨཏཱིཏསྶེཝ ཀམྨསྶ ཨཝིཔཀྐཝིཔཱཀསྶ པཙྩུཔྤནྣབྷཝེ པཙྩཡསམྤཏྟིཡཱ ཝིཔཙྩམཱནཾ ཝིཔཱཀཾ གཧེཏྭཱ ཨཧོསི ཀམྨཾ ཨཏྠི ཀམྨཝིཔཱཀོཏི ཝུཏྟཾ། ཨཏཱིཏསྶེཝ ཀམྨསྶ ཨཏིཀྐནྟཝིཔཱཀཀཱལསྶ ཙ པཙྩུཔྤནྣབྷཝེ པརིནིབྦཱཡནྟསྶ ཙ ཨཝིཔཙྩམཱནཾ ཝིཔཱཀཾ གཧེཏྭཱ ཨཧོསི ཀམྨཾ ནཏྠི ཀམྨཝིཔཱཀོཏི ཝུཏྟཾ། ཨཏཱིཏསྶེཝ ཀམྨསྶ ཝིཔཱཀཱརཧསྶ ཨཝིཔཀྐཝིཔཱཀསྶ ཨནཱགཏེ བྷཝེ པཙྩཡསམྤཏྟིཡཱ ཝིཔཙྩིཏབྦཾ ཝིཔཱཀཾ གཧེཏྭཱ ཨཧོསི ཀམྨཾ བྷཝིསྶཏི ཀམྨཝིཔཱཀོཏི ཝུཏྟཾ། ཨཏཱིཏསྶེཝ ཀམྨསྶ ཨཏིཀྐནྟཝིཔཱཀཀཱལསྶ ཙ ཨནཱགཏབྷཝེ པརིནིབྦཱཡིཏབྦསྶ ཙ ཨཝིཔཙྩིཏབྦཾ ཝིཔཱཀཾ གཧེཏྭཱ ཨཧོསི ཀམྨཾ ན བྷཝིསྶཏི ཀམྨཝིཔཱཀོཏི ཝུཏྟཾ། ཨེཝཾ ཨཏཱིཏཀམྨཾ ཨཏཱིཏཔཙྩུཔྤནྣཱནཱགཏཝིཔཱཀཱཝིཔཱཀཝསེན ཚདྷཱ དསྶིཏཾ།
234. Idāni tassā hetusampattiyā paccayabhūtaṃ kammaṃ dassentena kathitāya kammakathāya apubbatthānuvaṇṇanā. Tattha ahosi kammaṃ ahosi kammavipākotiādīsu atītabhavesu katassa kammassa atītabhavesuyeva vipakkavipākaṃ gahetvā ‘‘ahosi kammaṃ ahosi kammavipāko’’ti vuttaṃ. Tasseva atītassa kammassa diṭṭhadhammavedanīyassa upapajjavedanīyassa ca paccayavekallena atītabhavesuyeva avipakkavipākañca atīteyeva parinibbutassa ca diṭṭhadhammavedanīyaupapajjavedanīyaaparapariyāyavedanīyassa kammassa avipakkavipākañca gahetvā ahosi kammaṃ nāhosi kammavipākoti vuttaṃ. Atītasseva kammassa avipakkavipākassa paccuppannabhave paccayasampattiyā vipaccamānaṃ vipākaṃ gahetvā ahosi kammaṃ atthi kammavipākoti vuttaṃ. Atītasseva kammassa atikkantavipākakālassa ca paccuppannabhave parinibbāyantassa ca avipaccamānaṃ vipākaṃ gahetvā ahosi kammaṃ natthi kammavipākoti vuttaṃ. Atītasseva kammassa vipākārahassa avipakkavipākassa anāgate bhave paccayasampattiyā vipaccitabbaṃ vipākaṃ gahetvā ahosi kammaṃ bhavissati kammavipākoti vuttaṃ. Atītasseva kammassa atikkantavipākakālassa ca anāgatabhave parinibbāyitabbassa ca avipaccitabbaṃ vipākaṃ gahetvā ahosi kammaṃ na bhavissati kammavipākoti vuttaṃ. Evaṃ atītakammaṃ atītapaccuppannānāgatavipākāvipākavasena chadhā dassitaṃ.
པཙྩུཔྤནྣབྷཝེ ཀཏསྶ དིཊྛདྷམྨཝེདནཱིཡསྶ ཀམྨསྶ ཨིདྷེཝ ཝིཔཙྩམཱནཾ ཝིཔཱཀཾ གཧེཏྭཱ ཨཏྠི ཀམྨཾ ཨཏྠི ཀམྨཝིཔཱཀོཏི ཝུཏྟཾ། ཏསྶེཝ པཙྩུཔྤནྣསྶ ཀམྨསྶ པཙྩཡཝེཀལླེན ཨིདྷ ཨཝིཔཙྩམཱནཉྩ དིཊྛེཝ དྷམྨེ པརིནིབྦཱཡནྟསྶ ཨིདྷ ཨཝིཔཙྩམཱནཉྩ ཝིཔཱཀཾ གཧེཏྭཱ ཨཏྠི ཀམྨཾ ནཏྠི ཀམྨཝིཔཱཀོཏི ཝུཏྟཾ། པཙྩུཔྤནྣསྶེཝ ཀམྨསྶ ཨུཔཔཛྫཝེདནཱིཡསྶ ཙ ཨཔརཔརིཡཱཡཝེདནཱིཡསྶ ཙ ཨནཱགཏབྷཝེ ཝིཔཙྩིཏབྦཾ ཝིཔཱཀཾ གཧེཏྭཱ ཨཏྠི ཀམྨཾ བྷཝིསྶཏི ཀམྨཝིཔཱཀོཏི ཝུཏྟཾ། པཙྩུཔྤནྣསྶེཝ ཀམྨསྶ ཨུཔཔཛྫཝེདནཱིཡསྶ པཙྩཡཝེཀལླེན ཨནཱགཏབྷཝེ ཨཝིཔཙྩིཏབྦཉྩ ཨནཱགཏབྷཝེ པརིནིབྦཱཡིཏབྦསྶ ཨཔརཔརིཡཱཡཝེདནཱིཡསྶ ཨཝིཔཙྩིཏབྦཉྩ ཝིཔཱཀཾ གཧེཏྭཱ ཨཏྠི ཀམྨཾ ན བྷཝིསྶཏི ཀམྨཝིཔཱཀོཏི ཝུཏྟཾ། ཨེཝཾ པཙྩུཔྤནྣཀམྨཾ པཙྩུཔྤནྣཱནཱགཏཝིཔཱཀཱཝིཔཱཀཝསེན ཙཏུདྷཱ དསྶིཏཾ།
Paccuppannabhave katassa diṭṭhadhammavedanīyassa kammassa idheva vipaccamānaṃ vipākaṃ gahetvā atthi kammaṃ atthi kammavipākoti vuttaṃ. Tasseva paccuppannassa kammassa paccayavekallena idha avipaccamānañca diṭṭheva dhamme parinibbāyantassa idha avipaccamānañca vipākaṃ gahetvā atthi kammaṃ natthi kammavipākoti vuttaṃ. Paccuppannasseva kammassa upapajjavedanīyassa ca aparapariyāyavedanīyassa ca anāgatabhave vipaccitabbaṃ vipākaṃ gahetvā atthi kammaṃ bhavissati kammavipākoti vuttaṃ. Paccuppannasseva kammassa upapajjavedanīyassa paccayavekallena anāgatabhave avipaccitabbañca anāgatabhave parinibbāyitabbassa aparapariyāyavedanīyassa avipaccitabbañca vipākaṃ gahetvā atthi kammaṃ na bhavissati kammavipākoti vuttaṃ. Evaṃ paccuppannakammaṃ paccuppannānāgatavipākāvipākavasena catudhā dassitaṃ.
ཨནཱགཏབྷཝེ ཀཱཏབྦསྶ ཀམྨསྶ ཨནཱགཏབྷཝེ ཝིཔཙྩིཏབྦཾ ཝིཔཱཀཾ གཧེཏྭཱ བྷཝིསྶཏི ཀམྨཾ བྷཝིསྶཏི ཀམྨཝིཔཱཀོཏི ཝུཏྟཾ། ཏསྶེཝ ཨནཱགཏསྶ ཀམྨསྶ པཙྩཡཝེཀལླེན ཨཝིཔཙྩིཏབྦཉྩ ཨནཱགཏབྷཝེ པརིནིབྦཱཡིཏབྦསྶ ཨཝིཔཙྩིཏབྦཉྩ ཝིཔཱཀཾ གཧེཏྭཱ བྷཝིསྶཏི ཀམྨཾ ན བྷཝིསྶཏི ཀམྨཝིཔཱཀོཏི ཝུཏྟཾ། ཨེཝཾ ཨནཱགཏཀམྨཾ ཨནཱགཏཝིཔཱཀཱཝིཔཱཀཝསེན དྭིདྷཱ དསྶིཏཾ། ཏཾ སབྦཾ ཨེཀཏོ ཀཏྭཱ དྭཱདསཝིདྷེན ཀམྨཾ དསྶིཏཾ ཧོཏི།
Anāgatabhave kātabbassa kammassa anāgatabhave vipaccitabbaṃ vipākaṃ gahetvā bhavissati kammaṃ bhavissati kammavipākoti vuttaṃ. Tasseva anāgatassa kammassa paccayavekallena avipaccitabbañca anāgatabhave parinibbāyitabbassa avipaccitabbañca vipākaṃ gahetvā bhavissati kammaṃ na bhavissati kammavipākoti vuttaṃ. Evaṃ anāgatakammaṃ anāgatavipākāvipākavasena dvidhā dassitaṃ. Taṃ sabbaṃ ekato katvā dvādasavidhena kammaṃ dassitaṃ hoti.
ཨིམསྨིཾ ཋཱནེ ཋཏྭཱ ཏཱིཎི ཀམྨཙཏུཀྐཱནི ཨཱཧརིཏྭཱ ཝུཙྩནྟི – ཏེསུ ཧི ཝུཏྟེསུ ཨཡམཏྠོ པཱཀཊཏརོ བྷཝིསྶཏཱིཏི། ཙཏུབྦིདྷཉྷི ཀམྨཾ དིཊྛདྷམྨཝེདནཱིཡཾ ཨུཔཔཛྫཝེདནཱིཡཾ ཨཔརཔརིཡཱཡཝེདནཱིཡཾ ཨཧོསིཀམྨནྟི། ཏེསུ ཨེཀཛཝནཝཱིཐིཡཾ སཏྟསུ ཙིཏྟེསུ ཀུསལཱ ཝཱ ཨཀུསལཱ ཝཱ པཋམཛཝནཙེཏནཱ དིཊྛདྷམྨཝེདནཱིཡཀམྨཾ ནཱམ། ཏཾ ཨིམསྨིཾཡེཝ ཨཏྟབྷཱཝེ ཝིཔཱཀཾ དེཏི། ཏཐཱ ཨསཀྐོནྟཾ པན ‘‘ཨཧོསི ཀམྨཾ ནཱཧོསི ཀམྨཝིཔཱཀོ, ན བྷཝིསྶཏི ཀམྨཝིཔཱཀོ, ནཏྠི ཀམྨཝིཔཱཀོ’’ཏི ཨིམསྶ ཏིཀསྶ ཝསེན ཨཧོསིཀམྨཾ ནཱམ ཧོཏི། ཨཏྠསཱདྷིཀཱ པན སཏྟམཛཝནཙེཏནཱ ཨུཔཔཛྫཝེདནཱིཡཀམྨཾ ནཱམ། ཏཾ ཨནནྟརེ ཨཏྟབྷཱཝེ ཝིཔཱཀཾ དེཏི། ཏཐཱ ཨསཀྐོནྟཾ ཝུཏྟནཡེནེཝ ཨཧོསིཀམྨཾ ནཱམ ཧོཏི། ཨུབྷིནྣཾ ཨནྟརེ པན པཉྩཛཝནཙེཏནཱ ཨཔརཔརིཡཱཡཝེདནཱིཡཀམྨཾ ནཱམ། ཏཾ ཨནཱགཏེ ཡདཱ ཨོཀཱསཾ ལབྷཏི, ཏདཱ ཝིཔཱཀཾ དེཏི། སཏི སཾསཱརཔྤཝཏྟིཡཱ ཨཧོསིཀམྨཾ ནཱམ ན ཧོཏི།
Imasmiṃ ṭhāne ṭhatvā tīṇi kammacatukkāni āharitvā vuccanti – tesu hi vuttesu ayamattho pākaṭataro bhavissatīti. Catubbidhañhi kammaṃ diṭṭhadhammavedanīyaṃ upapajjavedanīyaṃ aparapariyāyavedanīyaṃ ahosikammanti. Tesu ekajavanavīthiyaṃ sattasu cittesu kusalā vā akusalā vā paṭhamajavanacetanā diṭṭhadhammavedanīyakammaṃ nāma. Taṃ imasmiṃyeva attabhāve vipākaṃ deti. Tathā asakkontaṃ pana ‘‘ahosi kammaṃ nāhosi kammavipāko, na bhavissati kammavipāko, natthi kammavipāko’’ti imassa tikassa vasena ahosikammaṃ nāma hoti. Atthasādhikā pana sattamajavanacetanā upapajjavedanīyakammaṃ nāma. Taṃ anantare attabhāve vipākaṃ deti. Tathā asakkontaṃ vuttanayeneva ahosikammaṃ nāma hoti. Ubhinnaṃ antare pana pañcajavanacetanā aparapariyāyavedanīyakammaṃ nāma. Taṃ anāgate yadā okāsaṃ labhati, tadā vipākaṃ deti. Sati saṃsārappavattiyā ahosikammaṃ nāma na hoti.
ཨཔརམྤི ཙཏུབྦིདྷཾ ཀམྨཾ ཡགྒརུཀཾ ཡབྦཧུལཾ ཡདཱསནྣཾ ཀཊཏྟཱ ཝཱ པན ཀམྨནྟི། ཏཏྠ ཀུསལཾ ཝཱ ཧོཏུ ཨཀུསལཾ ཝཱ, གརུཀཱགརུཀེསུ ཡཾ གརུཀཾ མཱཏུགྷཱཏཱདིཀམྨཾ ཝཱ མཧགྒཏཀམྨཾ ཝཱ, ཏདེཝ པཋམཾ ཝིཔཙྩཏི། ཏཐཱ བཧུལཱབཧུལེསུཔི ཡཾ བཧུལཾ ཧོཏི སུསཱིལྱཾ ཝཱ དུསྶཱིལྱཾ ཝཱ, ཏདེཝ པཋམཾ ཝིཔཙྩཏི། ཡདཱསནྣཾ ནཱམ མརཎཀཱལེ ཨནུསྶརིཏཀམྨཾ ཝཱ ཀཏཀམྨཾ ཝཱ། ཡཉྷི ཨཱསནྣམརཎེ ཨནུསྶརིཏུཾ སཀྐོཏི ཀཱཏུཾ ཝཱ, ཏེནེཝ ཨུཔཔཛྫཏི། ཨེཏེཧི པན ཏཱིཧི མུཏྟཾ པུནཔྤུནཾ ལདྡྷཱསེཝནཾ ཀཊཏྟཱ ཝཱ པན ཀམྨཾ ནཱམ ཧོཏི། ཏེསཾ ཨབྷཱཝེ ཏཾ པཊིསནྡྷིཾ ཨཱཀཌྜྷཏི།
Aparampi catubbidhaṃ kammaṃ yaggarukaṃ yabbahulaṃ yadāsannaṃ kaṭattā vā pana kammanti. Tattha kusalaṃ vā hotu akusalaṃ vā, garukāgarukesu yaṃ garukaṃ mātughātādikammaṃ vā mahaggatakammaṃ vā, tadeva paṭhamaṃ vipaccati. Tathā bahulābahulesupi yaṃ bahulaṃ hoti susīlyaṃ vā dussīlyaṃ vā, tadeva paṭhamaṃ vipaccati. Yadāsannaṃ nāma maraṇakāle anussaritakammaṃ vā katakammaṃ vā. Yañhi āsannamaraṇe anussarituṃ sakkoti kātuṃ vā, teneva upapajjati. Etehi pana tīhi muttaṃ punappunaṃ laddhāsevanaṃ kaṭattā vā pana kammaṃ nāma hoti. Tesaṃ abhāve taṃ paṭisandhiṃ ākaḍḍhati.
ཨཔརཾ ཝཱ ཙཏུབྦིདྷཾ ཀམྨཾ ཛནཀཾ ཨུཔཏྠམྦྷཀཾ ཨུཔཔཱིལ༹ཀཾ ཨུཔགྷཱཏཀནྟི། ཏཏྠ ཛནཀཾ ནཱམ ཀུསལམྤི ཧོཏི ཨཀུསལམྤི། ཏཾ པཊིསནྡྷིཡཾ པཝཏྟེཔི རཱུཔཱརཱུཔཝིཔཱཀཾ ཛནེཏི། ཨུཔཏྠམྦྷཀཾ པན ཛནེཏུཾ ན སཀྐོཏི, ཨཉྙེན ཀམྨེན དིནྣཱཡ པཊིསནྡྷིཡཱ ཛནིཏེ ཝིཔཱཀེ ཨུཔྤཛྫནཀསུཁདུཀྑཾ ཨུཔཏྠམྦྷེཏི, ཨདྡྷཱནཾ པཝཏྟེཏི། ཨུཔཔཱིལ༹ཀཾ ཨཉྙེན ཀམྨེན དིནྣཱཡ པཊིསནྡྷིཡཱ ཛནིཏེ ཝིཔཱཀེ ཨུཔྤཛྫནཀསུཁདུཀྑཾ པཱིལེ༹ཏི བཱདྷཏི, ཨདྡྷཱནཾ པཝཏྟིཏུཾ ན དེཏི། ཨུཔགྷཱཏཀཾ པན ཀུསལམྤི ཨཀུསལམྤི སམཱནཾ ཨཉྙཾ དུབྦལཀམྨཾ གྷཱཏེཏྭཱ ཏསྶ ཝིཔཱཀཾ པཊིབཱཧིཏྭཱ ཨཏྟནོ ཝིཔཱཀསྶ ཨོཀཱསཾ ཀརོཏི། ཨེཝཾ པན ཀམྨེན ཀཏེ ཨོཀཱསེ ཏཾ ཝིཔཱཀཾ ཨུཔྤནྣཾ ནཱམ ཝུཙྩཏི།
Aparaṃ vā catubbidhaṃ kammaṃ janakaṃ upatthambhakaṃ upapīḷakaṃ upaghātakanti. Tattha janakaṃ nāma kusalampi hoti akusalampi. Taṃ paṭisandhiyaṃ pavattepi rūpārūpavipākaṃ janeti. Upatthambhakaṃ pana janetuṃ na sakkoti, aññena kammena dinnāya paṭisandhiyā janite vipāke uppajjanakasukhadukkhaṃ upatthambheti, addhānaṃ pavatteti. Upapīḷakaṃ aññena kammena dinnāya paṭisandhiyā janite vipāke uppajjanakasukhadukkhaṃ pīḷeti bādhati, addhānaṃ pavattituṃ na deti. Upaghātakaṃ pana kusalampi akusalampi samānaṃ aññaṃ dubbalakammaṃ ghātetvā tassa vipākaṃ paṭibāhitvā attano vipākassa okāsaṃ karoti. Evaṃ pana kammena kate okāse taṃ vipākaṃ uppannaṃ nāma vuccati.
ཨིཏི ཨིམེསཾ དྭཱདསནྣཾ ཀམྨཱནཾ ཀམྨནྟརཉྩ ཝིཔཱཀནྟརཉྩ བུདྡྷཱནཾ ཀམྨཝིཔཱཀཉཱཎསྶེཝ ཡཱཐཱཝསརསཏོ པཱཀཊཾ ཧོཏི ཨསཱདྷཱརཎཾ སཱཝཀེཧི། ཝིཔསྶཀེན པན ཀམྨནྟརཾ ཝིཔཱཀནྟརཉྩ ཨེཀདེསཏོ ཛཱནིཏབྦཾ། ཏསྨཱ ཨཡཾ མུཁམཏྟདསྶནེན ཀམྨཝིསེསོ པཀཱསིཏོཏི།
Iti imesaṃ dvādasannaṃ kammānaṃ kammantarañca vipākantarañca buddhānaṃ kammavipākañāṇasseva yāthāvasarasato pākaṭaṃ hoti asādhāraṇaṃ sāvakehi. Vipassakena pana kammantaraṃ vipākantarañca ekadesato jānitabbaṃ. Tasmā ayaṃ mukhamattadassanena kammaviseso pakāsitoti.
༢༣༥. ཨེཝཾ སུདྡྷིཀཀམྨཝསེན པཋམཝཱརཾ ཝཏྭཱ ཏདེཝ ཀམྨཾ དྭིདྷཱ ཝིབྷཛིཏྭཱ ཀུསལཱཀུསལཱདིཡུགལཝསེན དསཧི པརིཡཱཡེཧི ཨཔརེ དས ཝཱརཱ ཝུཏྟཱ། ཏཏྠ ཨཱརོགྱཊྛེན ཀུསལཾ, ཨནཱརོགྱཊྛེན ཨཀུསལཾ, ཨིདཾ དུཀཾ ཛཱཏིཝསེན ཝུཏྟཾ། ཨཀུསལམེཝ རཱགཱདིདོསསཾཡོགེན སཱཝཛྫཾ, ཀུསལཾ ཏདབྷཱཝེན ཨནཝཛྫཾ། ཨཀུསལཾ ཨཔརིསུདྡྷཏྟཱ, ཀཎྷཱབྷིཛཱཏིཧེཏུཏྟཱ ཝཱ ཀཎྷཾ, ཀུསལཾ པརིསུདྡྷཏྟཱ, སུཀྐཱབྷིཛཱཏིཧེཏུཏྟཱ ཝཱ སུཀྐཾ། ཀུསལཾ སུཁཝུདྡྷིམཏྟཱ སུཁུདྲཡཾ, ཨཀུསལཾ དུཀྑཝུདྡྷིམཏྟཱ དུཀྑུདྲཡཾ། ཀུསལཾ སུཁཕལཝཏྟཱ སུཁཝིཔཱཀཾ, ཨཀུསལཾ དུཀྑཕལཝཏྟཱ དུཀྑཝིཔཱཀནྟི ཨེཝམེཏེསཾ ནཱནཱཀཱརོ ཝེདིཏབྦོཏི།
235. Evaṃ suddhikakammavasena paṭhamavāraṃ vatvā tadeva kammaṃ dvidhā vibhajitvā kusalākusalādiyugalavasena dasahi pariyāyehi apare dasa vārā vuttā. Tattha ārogyaṭṭhena kusalaṃ, anārogyaṭṭhena akusalaṃ, idaṃ dukaṃ jātivasena vuttaṃ. Akusalameva rāgādidosasaṃyogena sāvajjaṃ, kusalaṃ tadabhāvena anavajjaṃ. Akusalaṃ aparisuddhattā, kaṇhābhijātihetuttā vā kaṇhaṃ, kusalaṃ parisuddhattā, sukkābhijātihetuttā vā sukkaṃ. Kusalaṃ sukhavuddhimattā sukhudrayaṃ, akusalaṃ dukkhavuddhimattā dukkhudrayaṃ. Kusalaṃ sukhaphalavattā sukhavipākaṃ, akusalaṃ dukkhaphalavattā dukkhavipākanti evametesaṃ nānākāro veditabboti.
ཀམྨཀཐཱཝཎྞནཱ ནིཊྛིཏཱ།
Kammakathāvaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / པཊིསམྦྷིདཱམགྒཔཱལི༹ • Paṭisambhidāmaggapāḷi / ༧. ཀམྨཀཐཱ • 7. Kammakathā
