| Library / Tipiṭaka / तिपिटक • Tipiṭaka / पञ्चपकरण-अट्ठकथा • Pañcapakaraṇa-aṭṭhakathā |
२. कम्मकथावण्णना
2. Kammakathāvaṇṇanā
६३३-६३५. इदानि कम्मकथा नाम होति। तत्थ ‘‘नाहं, भिक्खवे, सञ्चेतनिकानं कम्मान’’न्ति (अ॰ नि॰ १०.२१७) सुत्तपदं निस्साय ‘‘सब्बं कम्मं सविपाक’’न्ति येसं लद्धि, सेय्यथापि महासंघिकानं; तेसं ‘‘चेतनाहं, भिक्खवे, कम्मं वदामी’’ति (अ॰ नि॰ ६.६३) सत्थारा अविसेसेन चेतना ‘‘कम्म’’न्ति वुत्ता; सा च कुसलाकुसलाव सविपाका, अब्याकता अविपाकाति इमं विभागं दस्सेतुं सब्बं कम्मन्ति पुच्छा सकवादिस्स, पटिञ्ञा इतरस्स। पुन सब्बा चेतनाति पञ्हेसु अब्याकतं सन्धाय पटिक्खेपो, कुसलाकुसले सन्धाय पटिञ्ञा वेदितब्बा । विपाकाब्याकतातिआदि सविपाकाविपाकचेतनं सरूपेन दस्सेतुं वुत्तं। सेसमेत्थ उत्तानत्थमेव। ‘‘नाहं, भिक्खवे’’ति सुत्तं सति पच्चये दिट्ठधम्मादीसु विपाकपटिसंवेदनं सन्धाय वुत्तं, तस्मा असाधकन्ति।
633-635. Idāni kammakathā nāma hoti. Tattha ‘‘nāhaṃ, bhikkhave, sañcetanikānaṃ kammāna’’nti (a. ni. 10.217) suttapadaṃ nissāya ‘‘sabbaṃ kammaṃ savipāka’’nti yesaṃ laddhi, seyyathāpi mahāsaṃghikānaṃ; tesaṃ ‘‘cetanāhaṃ, bhikkhave, kammaṃ vadāmī’’ti (a. ni. 6.63) satthārā avisesena cetanā ‘‘kamma’’nti vuttā; sā ca kusalākusalāva savipākā, abyākatā avipākāti imaṃ vibhāgaṃ dassetuṃ sabbaṃ kammanti pucchā sakavādissa, paṭiññā itarassa. Puna sabbā cetanāti pañhesu abyākataṃ sandhāya paṭikkhepo, kusalākusale sandhāya paṭiññā veditabbā . Vipākābyākatātiādi savipākāvipākacetanaṃ sarūpena dassetuṃ vuttaṃ. Sesamettha uttānatthameva. ‘‘Nāhaṃ, bhikkhave’’ti suttaṃ sati paccaye diṭṭhadhammādīsu vipākapaṭisaṃvedanaṃ sandhāya vuttaṃ, tasmā asādhakanti.
कम्मकथावण्णना।
Kammakathāvaṇṇanā.
Related texts:
तिपिटक (मूल) • Tipiṭaka (Mūla) / अभिधम्मपिटक • Abhidhammapiṭaka / कथावत्थुपाळि • Kathāvatthupāḷi / (११७) २. कम्मकथा • (117) 2. Kammakathā
टीका • Tīkā / अभिधम्मपिटक (टीका) • Abhidhammapiṭaka (ṭīkā) / पञ्चपकरण-मूलटीका • Pañcapakaraṇa-mūlaṭīkā / २. कम्मकथावण्णना • 2. Kammakathāvaṇṇanā
टीका • Tīkā / अभिधम्मपिटक (टीका) • Abhidhammapiṭaka (ṭīkā) / पञ्चपकरण-अनुटीका • Pañcapakaraṇa-anuṭīkā / २. कम्मकथावण्णना • 2. Kammakathāvaṇṇanā
