| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
৬. কম্মজাদিপঞ্হো
6. Kammajādipañho
৬. ‘‘ভন্তে নাগসেন, কতমে এত্থ কম্মজা, কতমে হেতুজা, কতমে উতুজা, কতমে ন কম্মজা, ন হেতুজা, ন উতুজা’’তি? ‘‘যে কেচি, মহারাজ, সত্তা সচেতনা, সব্বে তে কম্মজা; অগ্গি চ সব্বানি চ বীজজাতানি হেতুজানি; পথৰী চ পব্বতা চ উদকঞ্চ ৰাতো চ, সব্বে তে উতুজা; আকাসো চ নিব্বানঞ্চ ইমে দ্ৰে অকম্মজা অহেতুজা অনুতুজা। নিব্বানং পন, মহারাজ, ন ৰত্তব্বং কম্মজন্তি ৰা হেতুজন্তি ৰা উতুজন্তি ৰা উপ্পন্নন্তি ৰা অনুপ্পন্নন্তি ৰা উপ্পাদনীযন্তি ৰা অতীতন্তি ৰা অনাগতন্তি ৰা পচ্চুপ্পন্নন্তি ৰা চক্খুৰিঞ্ঞেয্যন্তি ৰা সোতৰিঞ্ঞেয্যন্তি ৰা ঘানৰিঞ্ঞেয্যন্তি ৰা জিৰ্হাৰিঞ্ঞেয্যন্তি ৰা কাযৰিঞ্ঞেয্যন্তি ৰা, অপি চ, মহারাজ, মনোৰিঞ্ঞেয্যং নিব্বানং, যং সো সম্মাপটিপন্নো অরিযসাৰকো ৰিসুদ্ধেন ঞাণেন পস্সতী’’তি। ‘‘রমণীযো, ভন্তে নাগসেন, পঞ্হো সুৰিনিচ্ছিতো নিস্সংসযো একন্তগতো, ৰিমতি উপ্পচ্ছিন্না, ত্ৰং গণিৰরপৰরমাসজ্জা’’তি।
6. ‘‘Bhante nāgasena, katame ettha kammajā, katame hetujā, katame utujā, katame na kammajā, na hetujā, na utujā’’ti? ‘‘Ye keci, mahārāja, sattā sacetanā, sabbe te kammajā; aggi ca sabbāni ca bījajātāni hetujāni; pathavī ca pabbatā ca udakañca vāto ca, sabbe te utujā; ākāso ca nibbānañca ime dve akammajā ahetujā anutujā. Nibbānaṃ pana, mahārāja, na vattabbaṃ kammajanti vā hetujanti vā utujanti vā uppannanti vā anuppannanti vā uppādanīyanti vā atītanti vā anāgatanti vā paccuppannanti vā cakkhuviññeyyanti vā sotaviññeyyanti vā ghānaviññeyyanti vā jivhāviññeyyanti vā kāyaviññeyyanti vā, api ca, mahārāja, manoviññeyyaṃ nibbānaṃ, yaṃ so sammāpaṭipanno ariyasāvako visuddhena ñāṇena passatī’’ti. ‘‘Ramaṇīyo, bhante nāgasena, pañho suvinicchito nissaṃsayo ekantagato, vimati uppacchinnā, tvaṃ gaṇivarapavaramāsajjā’’ti.
কম্মজাদিপঞ্হো ছট্ঠো।
Kammajādipañho chaṭṭho.
