| Library / Tipiṭaka / တိပိဋက • Tipiṭaka / ပဉ္စပကရဏ-အဋ္ဌကထာ • Pañcapakaraṇa-aṭṭhakathā |
၁၁. ကမ္မဟေတုကထာဝဏ္ဏနာ
11. Kammahetukathāvaṇṇanā
၅၄၆. ဣဒာနိ ကမ္မဟေတုကထာ နာမ ဟောတိ။ တတ္ထ ယေန အရဟတာ ပုရိမဘဝေ အရဟာ အဗ္ဘာစိက္ခိတပုဗ္ဗော, သော တသ္သ ကမ္မသ္သ ဟေတု အရဟတ္တာ ပရိဟာယတီတိ ယေသံ လဒ္ဓိ, သေယ္ယထာပိ ပုဗ္ဗသေလိယာနဉ္စေဝ သမ္မိတိယာနဉ္စ; တေ သန္ဓာယ ကမ္မဟေတူတိ ပုစ္ဆာ သကဝာဒိသ္သ, ပဋိညာ ဣတရသ္သ။ သေသံ ပရိဟာနိကထာယံ ဝုတ္တနယမေဝ ။
546. Idāni kammahetukathā nāma hoti. Tattha yena arahatā purimabhave arahā abbhācikkhitapubbo, so tassa kammassa hetu arahattā parihāyatīti yesaṃ laddhi, seyyathāpi pubbaseliyānañceva sammitiyānañca; te sandhāya kammahetūti pucchā sakavādissa, paṭiññā itarassa. Sesaṃ parihānikathāyaṃ vuttanayameva .
ဟန္ဒ ဟိ အရဟန္တာနံ အဗ္ဘာစိက္ခတီတိ ဣဒံ ယသ္သ ကမ္မသ္သ ဟေတု ပရိဟာယတိ, တံ သမ္ပဋိစ္ဆာပေတုံ ဝဒတိ။ အထ နံ သကဝာဒီ တံ ပက္ခံ ပဋိဇာနာပေတ္ဝာ ‘‘ယဒိ ဧဝံ ယေဟိ အရဟန္တော န အဗ္ဘာစိက္ခိတပုဗ္ဗာ, တေ သဗ္ဗေ အရဟတ္တံ ပာပုဏေယ္ယု’’န္တိ စောဒေတုံ ယေ ကေစီတိအာဒိမာဟ။ ဣတရော တသ္သ ကမ္မသ္သ အရဟတ္တံ သမ္ပာပုဏနေ နိယာမံ အပသ္သန္တော ပဋိက္ခိပတိ။
Handa hi arahantānaṃ abbhācikkhatīti idaṃ yassa kammassa hetu parihāyati, taṃ sampaṭicchāpetuṃ vadati. Atha naṃ sakavādī taṃ pakkhaṃ paṭijānāpetvā ‘‘yadi evaṃ yehi arahanto na abbhācikkhitapubbā, te sabbe arahattaṃ pāpuṇeyyu’’nti codetuṃ ye kecītiādimāha. Itaro tassa kammassa arahattaṃ sampāpuṇane niyāmaṃ apassanto paṭikkhipati.
ကမ္မဟေတုကထာဝဏ္ဏနာ။
Kammahetukathāvaṇṇanā.
အဋ္ဌမော ဝဂ္ဂော။
Aṭṭhamo vaggo.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၈၃) ၁၁. ကမ္မဟေတုကထာ • (83) 11. Kammahetukathā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၁၁. ကမ္မဟေတုကထာဝဏ္ဏနာ • 11. Kammahetukathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၁၁. ကမ္မဟေတုကထာဝဏ္ဏနာ • 11. Kammahetukathāvaṇṇanā
