| Library / Tipiṭaka / തിപിടക • Tipiṭaka / ഇതിവുത്തകപാളി • Itivuttakapāḷi |
൭. കാമയോഗസുത്തം
7. Kāmayogasuttaṃ
൯൬. വുത്തഞ്ഹേതം ഭഗവതാ, വുത്തമരഹതാതി മേ സുതം –
96. Vuttañhetaṃ bhagavatā, vuttamarahatāti me sutaṃ –
‘‘കാമയോഗയുത്തോ, ഭിക്ഖവേ, ഭവയോഗയുത്തോ ആഗാമീ ഹോതി ആഗന്താ 1 ഇത്ഥത്തം. കാമയോഗവിസംയുത്തോ, ഭിക്ഖവേ, ഭവയോഗയുത്തോ അനാഗാമീ ഹോതി അനാഗന്താ ഇത്ഥത്തം. കാമയോഗവിസംയുത്തോ, ഭിക്ഖവേ, ഭവയോഗവിസംയുത്തോ അരഹാ ഹോതി, ഖീണാസവോ’’തി. ഏതമത്ഥം ഭഗവാ അവോച. തത്ഥേതം ഇതി വുച്ചതി –
‘‘Kāmayogayutto, bhikkhave, bhavayogayutto āgāmī hoti āgantā 2 itthattaṃ. Kāmayogavisaṃyutto, bhikkhave, bhavayogayutto anāgāmī hoti anāgantā itthattaṃ. Kāmayogavisaṃyutto, bhikkhave, bhavayogavisaṃyutto arahā hoti, khīṇāsavo’’ti. Etamatthaṃ bhagavā avoca. Tatthetaṃ iti vuccati –
‘‘കാമയോഗേന സംയുത്താ, ഭവയോഗേന ചൂഭയം;
‘‘Kāmayogena saṃyuttā, bhavayogena cūbhayaṃ;
സത്താ ഗച്ഛന്തി സംസാരം, ജാതിമരണഗാമിനോ.
Sattā gacchanti saṃsāraṃ, jātimaraṇagāmino.
‘‘യേ ച കാമേ പഹന്ത്വാന, അപ്പത്താ ആസവക്ഖയം;
‘‘Ye ca kāme pahantvāna, appattā āsavakkhayaṃ;
ഭവയോഗേന സംയുത്താ, അനാഗാമീതി വുച്ചരേ.
Bhavayogena saṃyuttā, anāgāmīti vuccare.
‘‘യേ ച ഖോ ഛിന്നസംസയാ, ഖീണമാനപുനബ്ഭവാ;
‘‘Ye ca kho chinnasaṃsayā, khīṇamānapunabbhavā;
തേ വേ പാരങ്ഗതാ ലോകേ, യേ പത്താ ആസവക്ഖയ’’ന്തി.
Te ve pāraṅgatā loke, ye pattā āsavakkhaya’’nti.
അയമ്പി അത്ഥോ വുത്തോ ഭഗവതാ, ഇതി മേ സുതന്തി. സത്തമം.
Ayampi attho vutto bhagavatā, iti me sutanti. Sattamaṃ.
Footnotes:
Related texts:
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / ഖുദ്ദകനികായ (അട്ഠകഥാ) • Khuddakanikāya (aṭṭhakathā) / ഇതിവുത്തക-അട്ഠകഥാ • Itivuttaka-aṭṭhakathā / ൭. കാമയോഗസുത്തവണ്ണനാ • 7. Kāmayogasuttavaṇṇanā
