| Library / Tipiṭaka / តិបិដក • Tipiṭaka / ឥតិវុត្តកបាឡិ • Itivuttakapāḷi |
៧. កាមយោគសុត្តំ
7. Kāmayogasuttaṃ
៩៦. វុត្តញ្ហេតំ ភគវតា, វុត្តមរហតាតិ មេ សុតំ –
96. Vuttañhetaṃ bhagavatā, vuttamarahatāti me sutaṃ –
‘‘កាមយោគយុត្តោ, ភិក្ខវេ, ភវយោគយុត្តោ អាគាមី ហោតិ អាគន្តា 1 ឥត្ថត្តំ។ កាមយោគវិសំយុត្តោ, ភិក្ខវេ, ភវយោគយុត្តោ អនាគាមី ហោតិ អនាគន្តា ឥត្ថត្តំ។ កាមយោគវិសំយុត្តោ, ភិក្ខវេ, ភវយោគវិសំយុត្តោ អរហា ហោតិ, ខីណាសវោ’’តិ។ ឯតមត្ថំ ភគវា អវោច។ តត្ថេតំ ឥតិ វុច្ចតិ –
‘‘Kāmayogayutto, bhikkhave, bhavayogayutto āgāmī hoti āgantā 2 itthattaṃ. Kāmayogavisaṃyutto, bhikkhave, bhavayogayutto anāgāmī hoti anāgantā itthattaṃ. Kāmayogavisaṃyutto, bhikkhave, bhavayogavisaṃyutto arahā hoti, khīṇāsavo’’ti. Etamatthaṃ bhagavā avoca. Tatthetaṃ iti vuccati –
‘‘កាមយោគេន សំយុត្តា, ភវយោគេន ចូភយំ;
‘‘Kāmayogena saṃyuttā, bhavayogena cūbhayaṃ;
សត្តា គច្ឆន្តិ សំសារំ, ជាតិមរណគាមិនោ។
Sattā gacchanti saṃsāraṃ, jātimaraṇagāmino.
‘‘យេ ច កាមេ បហន្ត្វាន, អប្បត្តា អាសវក្ខយំ;
‘‘Ye ca kāme pahantvāna, appattā āsavakkhayaṃ;
ភវយោគេន សំយុត្តា, អនាគាមីតិ វុច្ចរេ។
Bhavayogena saṃyuttā, anāgāmīti vuccare.
‘‘យេ ច ខោ ឆិន្នសំសយា, ខីណមានបុនព្ភវា;
‘‘Ye ca kho chinnasaṃsayā, khīṇamānapunabbhavā;
តេ វេ បារង្គតា លោកេ, យេ បត្តា អាសវក្ខយ’’ន្តិ។
Te ve pāraṅgatā loke, ye pattā āsavakkhaya’’nti.
អយម្បិ អត្ថោ វុត្តោ ភគវតា, ឥតិ មេ សុតន្តិ។ សត្តមំ។
Ayampi attho vutto bhagavatā, iti me sutanti. Sattamaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ឥតិវុត្តក-អដ្ឋកថា • Itivuttaka-aṭṭhakathā / ៧. កាមយោគសុត្តវណ្ណនា • 7. Kāmayogasuttavaṇṇanā
