| Library / Tipiṭaka / তিপিটক • Tipiṭaka / ইতিৰুত্তকপাল়ি • Itivuttakapāḷi |
৭. কামযোগসুত্তং
7. Kāmayogasuttaṃ
৯৬. ৰুত্তঞ্হেতং ভগৰতা, ৰুত্তমরহতাতি মে সুতং –
96. Vuttañhetaṃ bhagavatā, vuttamarahatāti me sutaṃ –
‘‘কামযোগযুত্তো, ভিক্খৰে, ভৰযোগযুত্তো আগামী হোতি আগন্তা 1 ইত্থত্তং। কামযোগৰিসংযুত্তো, ভিক্খৰে, ভৰযোগযুত্তো অনাগামী হোতি অনাগন্তা ইত্থত্তং। কামযোগৰিসংযুত্তো, ভিক্খৰে, ভৰযোগৰিসংযুত্তো অরহা হোতি, খীণাসৰো’’তি। এতমত্থং ভগৰা অৰোচ। তত্থেতং ইতি ৰুচ্চতি –
‘‘Kāmayogayutto, bhikkhave, bhavayogayutto āgāmī hoti āgantā 2 itthattaṃ. Kāmayogavisaṃyutto, bhikkhave, bhavayogayutto anāgāmī hoti anāgantā itthattaṃ. Kāmayogavisaṃyutto, bhikkhave, bhavayogavisaṃyutto arahā hoti, khīṇāsavo’’ti. Etamatthaṃ bhagavā avoca. Tatthetaṃ iti vuccati –
‘‘কামযোগেন সংযুত্তা, ভৰযোগেন চূভযং।
‘‘Kāmayogena saṃyuttā, bhavayogena cūbhayaṃ;
সত্তা গচ্ছন্তি সংসারং, জাতিমরণগামিনো॥
Sattā gacchanti saṃsāraṃ, jātimaraṇagāmino.
‘‘যে চ কামে পহন্ত্ৰান, অপ্পত্তা আসৰক্খযং।
‘‘Ye ca kāme pahantvāna, appattā āsavakkhayaṃ;
ভৰযোগেন সংযুত্তা, অনাগামীতি ৰুচ্চরে॥
Bhavayogena saṃyuttā, anāgāmīti vuccare.
‘‘যে চ খো ছিন্নসংসযা, খীণমানপুনব্ভৰা।
‘‘Ye ca kho chinnasaṃsayā, khīṇamānapunabbhavā;
তে ৰে পারঙ্গতা লোকে, যে পত্তা আসৰক্খয’’ন্তি॥
Te ve pāraṅgatā loke, ye pattā āsavakkhaya’’nti.
অযম্পি অত্থো ৰুত্তো ভগৰতা, ইতি মে সুতন্তি। সত্তমং।
Ayampi attho vutto bhagavatā, iti me sutanti. Sattamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ইতিৰুত্তক-অট্ঠকথা • Itivuttaka-aṭṭhakathā / ৭. কামযোগসুত্তৰণ্ণনা • 7. Kāmayogasuttavaṇṇanā
