| Library / Tipiṭaka / ತಿಪಿಟಕ • Tipiṭaka / ಕಥಾವತ್ಥುಪಾಳಿ • Kathāvatthupāḷi |
೮. ಅಟ್ಠಮವಗ್ಗೋ
8. Aṭṭhamavaggo
(೭೬) ೪. ಕಾಮಕಥಾ
(76) 4. Kāmakathā
೫೧೩. ಪಞ್ಚೇವಾಯತನಾ ಕಾಮಾತಿ? ಆಮನ್ತಾ। ನನು ಅತ್ಥಿ ತಪ್ಪಟಿಸಂಯುತ್ತೋ ಛನ್ದೋತಿ? ಆಮನ್ತಾ। ಹಞ್ಚಿ ಅತ್ಥಿ ತಪ್ಪಟಿಸಂಯುತ್ತೋ ಛನ್ದೋ, ನೋ ಚ ವತ ರೇ ವತ್ತಬ್ಬೇ – ‘‘ಪಞ್ಚೇವಾಯತನಾ ಕಾಮಾ’’ತಿ। ನನು ಅತ್ಥಿ ತಪ್ಪಟಿಸಂಯುತ್ತೋ ರಾಗೋ ತಪ್ಪಟಿಸಂಯುತ್ತೋ ಛನ್ದೋ ತಪ್ಪಟಿಸಂಯುತ್ತೋ ಛನ್ದರಾಗೋ ತಪ್ಪಟಿಸಂಯುತ್ತೋ ಸಙ್ಕಪ್ಪೋ ತಪ್ಪಟಿಸಂಯುತ್ತೋ ರಾಗೋ ತಪ್ಪಟಿಸಂಯುತ್ತೋ ಸಙ್ಕಪ್ಪರಾಗೋ ತಪ್ಪಟಿಸಂಯುತ್ತಾ ಪೀತಿ ತಪ್ಪಟಿಸಂಯುತ್ತಂ ಸೋಮನಸ್ಸಂ ತಪ್ಪಟಿಸಂಯುತ್ತಂ ಪೀತಿಸೋಮನಸ್ಸನ್ತಿ? ಆಮನ್ತಾ । ಹಞ್ಚಿ ಅತ್ಥಿ ತಪ್ಪಟಿಸಂಯುತ್ತಂ ಪೀತಿಸೋಮನಸ್ಸಂ, ನೋ ಚ ವತ ರೇ ವತ್ತಬ್ಬೇ – ‘‘ಪಞ್ಚೇವಾಯತನಾ ಕಾಮಾ’’ತಿ।
513. Pañcevāyatanā kāmāti? Āmantā. Nanu atthi tappaṭisaṃyutto chandoti? Āmantā. Hañci atthi tappaṭisaṃyutto chando, no ca vata re vattabbe – ‘‘pañcevāyatanā kāmā’’ti. Nanu atthi tappaṭisaṃyutto rāgo tappaṭisaṃyutto chando tappaṭisaṃyutto chandarāgo tappaṭisaṃyutto saṅkappo tappaṭisaṃyutto rāgo tappaṭisaṃyutto saṅkapparāgo tappaṭisaṃyuttā pīti tappaṭisaṃyuttaṃ somanassaṃ tappaṭisaṃyuttaṃ pītisomanassanti? Āmantā . Hañci atthi tappaṭisaṃyuttaṃ pītisomanassaṃ, no ca vata re vattabbe – ‘‘pañcevāyatanā kāmā’’ti.
೫೧೪. ನ ವತ್ತಬ್ಬಂ – ‘‘ಪಞ್ಚೇವಾಯತನಾ ಕಾಮಾ’’ತಿ? ಆಮನ್ತಾ। ನನು ವುತ್ತಂ ಭಗವತಾ – ‘‘ಪಞ್ಚಿಮೇ, ಭಿಕ್ಖವೇ, ಕಾಮಗುಣಾ! ಕತಮೇ ಪಞ್ಚ? ಚಕ್ಖುವಿಞ್ಞೇಯ್ಯಾ ರೂಪಾ…ಪೇ॰… ಕಾಯವಿಞ್ಞೇಯ್ಯಾ ಫೋಟ್ಠಬ್ಬಾ ಇಟ್ಠಾ ಕನ್ತಾ ಮನಾಪಾ ಪಿಯರೂಪಾ ಕಾಮೂಪಸಂಹಿತಾ ರಜನೀಯಾ – ಇಮೇ ಖೋ, ಭಿಕ್ಖವೇ, ಪಞ್ಚ ಕಾಮಗುಣಾ’’ತಿ। ಅತ್ಥೇವ ಸುತ್ತನ್ತೋತಿ? ಆಮನ್ತಾ। ತೇನ ಹಿ ಪಞ್ಚೇವಾಯತನಾ ಕಾಮಾತಿ।
514. Na vattabbaṃ – ‘‘pañcevāyatanā kāmā’’ti? Āmantā. Nanu vuttaṃ bhagavatā – ‘‘pañcime, bhikkhave, kāmaguṇā! Katame pañca? Cakkhuviññeyyā rūpā…pe… kāyaviññeyyā phoṭṭhabbā iṭṭhā kantā manāpā piyarūpā kāmūpasaṃhitā rajanīyā – ime kho, bhikkhave, pañca kāmaguṇā’’ti. Attheva suttantoti? Āmantā. Tena hi pañcevāyatanā kāmāti.
ಪಞ್ಚೇವಾಯತನಾ ಕಾಮಾತಿ? ಆಮನ್ತಾ। ನನು ವುತ್ತಂ ಭಗವತಾ – ‘‘ಪಞ್ಚಿಮೇ, ಭಿಕ್ಖವೇ, ಕಾಮಗುಣಾ! ಕತಮೇ ಪಞ್ಚ? ಚಕ್ಖುವಿಞ್ಞೇಯ್ಯಾ ರೂಪಾ…ಪೇ॰… ಕಾಯವಿಞ್ಞೇಯ್ಯಾ ಫೋಟ್ಠಬ್ಬಾ ಇಟ್ಠಾ ಕನ್ತಾ ಮನಾಪಾ ಪಿಯರೂಪಾ ಕಾಮೂಪಸಂಹಿತಾ ರಜನೀಯಾ – ಇಮೇ ಖೋ, ಭಿಕ್ಖವೇ, ಪಞ್ಚ ಕಾಮಗುಣಾ । ಅಪಿ ಚ, ಭಿಕ್ಖವೇ, ನೇತೇ ಕಾಮಾ ಕಾಮಗುಣಾ ನಾಮೇತೇ ಅರಿಯಸ್ಸ ವಿನಯೇ ವುಚ್ಚ’’ನ್ತಿ –
Pañcevāyatanā kāmāti? Āmantā. Nanu vuttaṃ bhagavatā – ‘‘pañcime, bhikkhave, kāmaguṇā! Katame pañca? Cakkhuviññeyyā rūpā…pe… kāyaviññeyyā phoṭṭhabbā iṭṭhā kantā manāpā piyarūpā kāmūpasaṃhitā rajanīyā – ime kho, bhikkhave, pañca kāmaguṇā . Api ca, bhikkhave, nete kāmā kāmaguṇā nāmete ariyassa vinaye vucca’’nti –
‘‘ಸಙ್ಕಪ್ಪರಾಗೋ ಪುರಿಸಸ್ಸ ಕಾಮೋ,
‘‘Saṅkapparāgo purisassa kāmo,
ನ ತೇ ಕಾಮಾ ಯಾನಿ ಚಿತ್ರಾನಿ ಲೋಕೇ।
Na te kāmā yāni citrāni loke;
ಸಙ್ಕಪ್ಪರಾಗೋ ಪುರಿಸಸ್ಸ ಕಾಮೋ,
Saṅkapparāgo purisassa kāmo,
ತಿಟ್ಠನ್ತಿ ಚಿತ್ರಾನಿ ತಥೇವ ಲೋಕೇ।
Tiṭṭhanti citrāni tatheva loke;
ಅತ್ಥೇವ ಸುತ್ತನ್ತೋತಿ? ಆಮನ್ತಾ। ತೇನ ಹಿ ನ ವತ್ತಬ್ಬಂ – ‘‘ಪಞ್ಚೇವಾಯತನಾ ಕಾಮಾ’’ತಿ।
Attheva suttantoti? Āmantā. Tena hi na vattabbaṃ – ‘‘pañcevāyatanā kāmā’’ti.
ಕಾಮಕಥಾ ನಿಟ್ಠಿತಾ।
Kāmakathā niṭṭhitā.
Footnotes:
Related texts:
ಅಟ್ಠಕಥಾ • Aṭṭhakathā / ಅಭಿಧಮ್ಮಪಿಟಕ (ಅಟ್ಠಕಥಾ) • Abhidhammapiṭaka (aṭṭhakathā) / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā / ೪. ಕಾಮಕಥಾವಣ್ಣನಾ • 4. Kāmakathāvaṇṇanā
