| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၈. ကလ္ယာဏမိတ္တသုတ္တဝဏ္ဏနာ
8. Kalyāṇamittasuttavaṇṇanā
၁၂၉. အဋ္ဌမေ သော စ ခော ကလ္ယာဏမိတ္တသ္သာတိ သော စာယံ ဓမ္မော ကလ္ယာဏမိတ္တသ္သေဝ သ္ဝာက္ခာတော နာမ ဟောတိ, န ပာပမိတ္တသ္သာတိ။ ကိဉ္စာပိ ဟိ ဓမ္မော သဗ္ဗေသမ္ပိ သ္ဝာက္ခာတောဝ, ကလ္ယာဏမိတ္တသ္သ ပန သုသ္သူသန္တသ္သ သဒ္ဒဟန္တသ္သ အတ္ထံ ပူရေတိ ဘေသဇ္ဇံ ဝိယ ဝဠဉ္ဇန္တသ္သ န ဣတရသ္သာတိ။ တေနေတံ ဝုတ္တံ။ ဓမ္မောတိ စေတ္ထ ဒေသနာဓမ္မော ဝေဒိတဗ္ဗော။
129. Aṭṭhame so ca kho kalyāṇamittassāti so cāyaṃ dhammo kalyāṇamittasseva svākkhāto nāma hoti, na pāpamittassāti. Kiñcāpi hi dhammo sabbesampi svākkhātova, kalyāṇamittassa pana sussūsantassa saddahantassa atthaṃ pūreti bhesajjaṃ viya vaḷañjantassa na itarassāti. Tenetaṃ vuttaṃ. Dhammoti cettha desanādhammo veditabbo.
ဥပဍ္ဎမိဒန္တိ ထေရော ကိရ ရဟောဂတော စိန္တေသိ – ‘‘အယံ သမဏဓမ္မော နာမ ဩဝာဒကေ အနုသာသကေ ကလ္ယာဏမိတ္တေ သတိ ပစ္စတ္တပုရိသကာရေ ဌိတသ္သ သမ္ပဇ္ဇတိ, ဥပဍ္ဎံ ကလ္ယာဏမိတ္တတော ဟောတိ, ဥပဍ္ဎံ ပစ္စတ္တပုရိသကာရတော’’တိ။ အထသ္သ ဧတဒဟောသိ – ‘‘အဟံ ပဒေသဉာဏေ ဌိတော နိပ္ပဒေသံ စိန္တေတုံ န သက္ကောမိ, သတ္ထာရံ ပုစ္ဆိတ္ဝာ နိက္ကင္ခော ဘဝိသ္သာမီ’’တိ။ တသ္မာ သတ္ထာရံ ဥပသင္ကမိတ္ဝာ ဧဝမာဟ။ ဗ္ရဟ္မစရိယသ္သာတိ အရိယမဂ္ဂသ္သ။ ယဒိဒံ ကလ္ယာဏမိတ္တတာတိ ယာ ဧသာ ကလ္ယာဏမိတ္တတာ နာမ, သာ ဥပဍ္ဎံ, တတော ဥပဍ္ဎံ အာဂစ္ဆတီတိ အတ္ထော။ ဣတိ ထေရေန ‘‘ဥပဍ္ဎုပဍ္ဎာ သမ္မာဒိဋ္ဌိအာဒယော ကလ္ယာဏမိတ္တတော အာဂစ္ဆန္တိ, ဥပဍ္ဎုပဍ္ဎာ ပစ္စတ္တပုရိသကာရတော’’တိ ဝုတ္တံ။ ကိဉ္စာပိ ထေရသ္သ အယံ မနောရထော, ယထာ ပန ဗဟူဟိ သိလာထမ္ဘေ ဥသ္သာပိတေ, ‘‘ဧတ္တကံ ဌာနံ အသုကေန ဥသ္သာပိတံ, ဧတ္တကံ အသုကေနာ’’တိ ဝိနိဗ္ဘောဂော နတ္ထိ, ယထာ စ မာတာပိတရော နိသ္သာယ ဥပ္ပန္နေသု ပုတ္တေသု ‘‘ဧတ္တကံ မာတိတော နိဗ္ဗတ္တံ, ဧတ္တကံ ပိတိတော’’တိ ဝိနိဗ္ဘောဂော နတ္ထိ, ဧဝံ ဣဓာပိ အဝိနိဗ္ဘောဂဓမ္မော ဟေသ, ‘‘ဧတ္တကံ သမ္မာဒိဋ္ဌိအာဒီနံ ကလ္ယာဏမိတ္တတော နိဗ္ဗတ္တံ, ဧတ္တကံ ပစ္စတ္တပုရိသကာရတော’’တိ န သက္ကာ လဒ္ဓုံ, ကလ္ယာဏမိတ္တတာယ ပန ဥပဍ္ဎဂုဏော လဗ္ဘတီတိ ထေရသ္သ အဇ္ဈာသယေန ဥပဍ္ဎံ နာမ ဇာတံ, သကလဂုဏော ပဋိလဗ္ဘတီတိ ဘဂဝတော အဇ္ဈာသယေန သကလံ နာမ ဇာတံ။ ကလ္ယာဏမိတ္တတာတိ စေတံ ပုဗ္ဗဘာဂပဋိလာဘင္ဂံ နာမာတိ ဂဟိတံ။ အတ္ထတော ကလ္ယာဏမိတ္တံ နိသ္သာယ လဒ္ဓာ သီလသမာဓိဝိပသ္သနာဝသေန စတ္တာရော ခန္ဓာ။ သင္ခာရက္ခန္ဓောတိပိ ဝဒန္တိယေဝ။
Upaḍḍhamidanti thero kira rahogato cintesi – ‘‘ayaṃ samaṇadhammo nāma ovādake anusāsake kalyāṇamitte sati paccattapurisakāre ṭhitassa sampajjati, upaḍḍhaṃ kalyāṇamittato hoti, upaḍḍhaṃ paccattapurisakārato’’ti. Athassa etadahosi – ‘‘ahaṃ padesañāṇe ṭhito nippadesaṃ cintetuṃ na sakkomi, satthāraṃ pucchitvā nikkaṅkho bhavissāmī’’ti. Tasmā satthāraṃ upasaṅkamitvā evamāha. Brahmacariyassāti ariyamaggassa. Yadidaṃ kalyāṇamittatāti yā esā kalyāṇamittatā nāma, sā upaḍḍhaṃ, tato upaḍḍhaṃ āgacchatīti attho. Iti therena ‘‘upaḍḍhupaḍḍhā sammādiṭṭhiādayo kalyāṇamittato āgacchanti, upaḍḍhupaḍḍhā paccattapurisakārato’’ti vuttaṃ. Kiñcāpi therassa ayaṃ manoratho, yathā pana bahūhi silāthambhe ussāpite, ‘‘ettakaṃ ṭhānaṃ asukena ussāpitaṃ, ettakaṃ asukenā’’ti vinibbhogo natthi, yathā ca mātāpitaro nissāya uppannesu puttesu ‘‘ettakaṃ mātito nibbattaṃ, ettakaṃ pitito’’ti vinibbhogo natthi, evaṃ idhāpi avinibbhogadhammo hesa, ‘‘ettakaṃ sammādiṭṭhiādīnaṃ kalyāṇamittato nibbattaṃ, ettakaṃ paccattapurisakārato’’ti na sakkā laddhuṃ, kalyāṇamittatāya pana upaḍḍhaguṇo labbhatīti therassa ajjhāsayena upaḍḍhaṃ nāma jātaṃ, sakalaguṇo paṭilabbhatīti bhagavato ajjhāsayena sakalaṃ nāma jātaṃ. Kalyāṇamittatāti cetaṃ pubbabhāgapaṭilābhaṅgaṃ nāmāti gahitaṃ. Atthato kalyāṇamittaṃ nissāya laddhā sīlasamādhivipassanāvasena cattāro khandhā. Saṅkhārakkhandhotipi vadantiyeva.
မာ ဟေဝံ, အာနန္ဒာတိ, အာနန္ဒ, မာ ဧဝံ အဘဏိ, ဗဟုသ္သုတော တ္ဝံ သေခပဋိသမ္ဘိဒပ္ပတ္တော အဋ္ဌ ဝရေ ဂဟေတ္ဝာ မံ ဥပဋ္ဌဟသိ, စတူဟိ အစ္ဆရိယဗ္ဘုတဓမ္မေဟိ သမန္နာဂတော, တာဒိသသ္သ ဧဝံ ကထေတုံ န ဝဋ္ဋတိ။ သကလမေဝ ဟိဒံ, အာနန္ဒ, ဗ္ရဟ္မစရိယံ, ယဒိဒံ ကလ္ယာဏမိတ္တတာတိ ဣဒံ ဘဂဝာ – ‘‘စတ္တာရော မဂ္ဂာ စတ္တာရိ ဖလာနိ တိသ္သော ဝိဇ္ဇာ ဆ အဘိညာ သဗ္ဗံ ကလ္ယာဏမိတ္တမူလကမေဝ ဟောတီ’’တိ သန္ဓာယာဟ။ ဣဒာနိ ဝစီဘေဒေနေဝ ကာရဏံ ဒသ္သေန္တော ကလ္ယာဏမိတ္တသ္သေတန္တိအာဒိမာဟ။ တတ္ထ ပာဋိကင္ခန္တိ ပာဋိကင္ခိတဗ္ဗံ ဣစ္ဆိတဗ္ဗံ, အဝသ္သံဘာဝီတိ အတ္ထော။
Mā hevaṃ, ānandāti, ānanda, mā evaṃ abhaṇi, bahussuto tvaṃ sekhapaṭisambhidappatto aṭṭha vare gahetvā maṃ upaṭṭhahasi, catūhi acchariyabbhutadhammehi samannāgato, tādisassa evaṃ kathetuṃ na vaṭṭati. Sakalameva hidaṃ, ānanda, brahmacariyaṃ, yadidaṃ kalyāṇamittatāti idaṃ bhagavā – ‘‘cattāro maggā cattāri phalāni tisso vijjā cha abhiññā sabbaṃ kalyāṇamittamūlakameva hotī’’ti sandhāyāha. Idāni vacībhedeneva kāraṇaṃ dassento kalyāṇamittassetantiādimāha. Tattha pāṭikaṅkhanti pāṭikaṅkhitabbaṃ icchitabbaṃ, avassaṃbhāvīti attho.
ဣဓာတိ ဣမသ္မိံ သာသနေ။ သမ္မာဒိဋ္ဌိံ ဘာဝေတီတိအာဒီသု အဋ္ဌန္နံ အာဒိပဒာနံယေဝ တာဝ အယံ သင္ခေပဝဏ္ဏနာ – သမ္မာ ဒသ္သနလက္ခဏာ သမ္မာဒိဋ္ဌိ။ သမ္မာ အဘိနိရောပနလက္ခဏော သမ္မာသင္ကပ္ပော။ သမ္မာ ပရိဂ္ဂဟဏလက္ခဏာ သမ္မာဝာစာ။ သမ္မာ သမုဋ္ဌာပနလက္ခဏော သမ္မာကမ္မန္တော။ သမ္မာ ဝောဒာပနလက္ခဏာ သမ္မာအာဇီဝော။ သမ္မာ ပဂ္ဂဟလက္ခဏော သမ္မာဝာယာမော။ သမ္မာ ဥပဋ္ဌာနလက္ခဏာ သမ္မာသတိ။ သမ္မာ သမာဓာနလက္ခဏော သမ္မာသမာဓိ။
Idhāti imasmiṃ sāsane. Sammādiṭṭhiṃ bhāvetītiādīsu aṭṭhannaṃ ādipadānaṃyeva tāva ayaṃ saṅkhepavaṇṇanā – sammā dassanalakkhaṇā sammādiṭṭhi. Sammā abhiniropanalakkhaṇo sammāsaṅkappo. Sammā pariggahaṇalakkhaṇā sammāvācā. Sammā samuṭṭhāpanalakkhaṇo sammākammanto. Sammā vodāpanalakkhaṇā sammāājīvo. Sammā paggahalakkhaṇo sammāvāyāmo. Sammā upaṭṭhānalakkhaṇā sammāsati. Sammā samādhānalakkhaṇo sammāsamādhi.
တေသု ဧကေကသ္သ တီဏိ ကိစ္စာနိ ဟောန္တိ။ သေယ္ယာထိဒံ – သမ္မာဒိဋ္ဌိ တာဝ အညေဟိပိ အတ္တနော ပစ္စနီကကိလေသေဟိ သဒ္ဓိံ မိစ္ဆာဒိဋ္ဌိံ ပဇဟတိ, နိရောဓံ အာရမ္မဏံ ကရောတိ, သမ္ပယုတ္တဓမ္မေ စ ပသ္သတိ တပ္ပဋိစ္ဆာဒကမောဟဝိဓမနဝသေန အသမ္မောဟတော။ သမ္မာသင္ကပ္ပာဒယောပိ တထေဝ မိစ္ဆာသင္ကပ္ပာဒီနိ စ ပဇဟန္တိ, နိရောဓဉ္စ အာရမ္မဏံ ကရောန္တိ။ ဝိသေသတော ပနေတ္ထ သမ္မာဒိဋ္ဌိ သဟဇာတဓမ္မေ သမ္မာ ဒသ္သေတိ ။ သမ္မာသင္ကပ္ပော သဟဇာတဓမ္မေ အဘိနိရောပေတိ, သမ္မာဝာစာ သမ္မာ ပရိဂ္ဂဏ္ဟာတိ, သမ္မာကမ္မန္တော သမ္မာ သမုဋ္ဌာပေတိ, သမ္မာအာဇီဝော သမ္မာ ဝောဒာပေတိ , သမ္မာဝာယာမော သမ္မာ ပဂ္ဂဏ္ဟာတိ, သမ္မာသတိ သမ္မာ ဥပဋ္ဌာပေတိ, သမ္မာသမာဓိ သမ္မာ ဒဟတိ။
Tesu ekekassa tīṇi kiccāni honti. Seyyāthidaṃ – sammādiṭṭhi tāva aññehipi attano paccanīkakilesehi saddhiṃ micchādiṭṭhiṃ pajahati, nirodhaṃ ārammaṇaṃ karoti, sampayuttadhamme ca passati tappaṭicchādakamohavidhamanavasena asammohato. Sammāsaṅkappādayopi tatheva micchāsaṅkappādīni ca pajahanti, nirodhañca ārammaṇaṃ karonti. Visesato panettha sammādiṭṭhi sahajātadhamme sammā dasseti . Sammāsaṅkappo sahajātadhamme abhiniropeti, sammāvācā sammā pariggaṇhāti, sammākammanto sammā samuṭṭhāpeti, sammāājīvo sammā vodāpeti , sammāvāyāmo sammā paggaṇhāti, sammāsati sammā upaṭṭhāpeti, sammāsamādhi sammā dahati.
အပိစေသာ သမ္မာဒိဋ္ဌိ နာမ ပုဗ္ဗဘာဂေ နာနာခဏာ နာနာရမ္မဏာ ဟောတိ, မဂ္ဂကာလေ ဧကက္ခဏာ ဧကာရမ္မဏာ။ ကိစ္စတော ပန သမ္မာဒိဋ္ဌိ ဒုက္ခေ ဉာဏန္တိအာဒီနိ စတ္တာရိ နာမာနိ လဘတိ။ သမ္မာသင္ကပ္ပာဒယောပိ ပုဗ္ဗဘာဂေ နာနာခဏာ နာနာရမ္မဏာ ဟောန္တိ, မဂ္ဂကာလေ ဧကက္ခဏာ ဧကာရမ္မဏာ။ တေသု သမ္မာသင္ကပ္ပော ကိစ္စတော နေက္ခမ္မသင္ကပ္ပောတိအာဒီနိ တီဏိ နာမာနိ လဘတိ။ သမ္မာဝာစာဒယော တယော ဝိရတိယောပိ ဟောန္တိ စေတနာယောပိ, မဂ္ဂက္ခဏေ ပန ဝိရတိယောဝ။ သမ္မာဝာယာမော သမ္မာသတီတိ ဣဒမ္ပိ ဒ္ဝယံ ကိစ္စတော သမ္မပ္ပဓာနသတိပဋ္ဌာနဝသေန စတ္တာရိ နာမာနိ လဘတိ။ သမ္မာသမာဓိ ပန ပုဗ္ဗဘာဂေပိ မဂ္ဂက္ခဏေပိ သမ္မာသမာဓိယေဝ။
Apicesā sammādiṭṭhi nāma pubbabhāge nānākhaṇā nānārammaṇā hoti, maggakāle ekakkhaṇā ekārammaṇā. Kiccato pana sammādiṭṭhi dukkhe ñāṇantiādīni cattāri nāmāni labhati. Sammāsaṅkappādayopi pubbabhāge nānākhaṇā nānārammaṇā honti, maggakāle ekakkhaṇā ekārammaṇā. Tesu sammāsaṅkappo kiccato nekkhammasaṅkappotiādīni tīṇi nāmāni labhati. Sammāvācādayo tayo viratiyopi honti cetanāyopi, maggakkhaṇe pana viratiyova. Sammāvāyāmo sammāsatīti idampi dvayaṃ kiccato sammappadhānasatipaṭṭhānavasena cattāri nāmāni labhati. Sammāsamādhi pana pubbabhāgepi maggakkhaṇepi sammāsamādhiyeva.
ဧဝံ တာဝ ‘‘သမ္မာဒိဋ္ဌိ’’န္တိအာဒိနာ နယေန ဝုတ္တာနံ အဋ္ဌန္နံ အာဒိပဒာနံယေဝ အတ္ထဝဏ္ဏနံ ဉတ္ဝာ ဣဒာနိ ဘာဝေတိ ဝိဝေကနိသ္သိတန္တိအာဒီသု ဧဝံ ဉာတဗ္ဗော။ ဘာဝေတီတိ ဝဍ္ဎေတိ, အတ္တနော စိတ္တသန္တာနေ ပုနပ္ပုနံ ဇနေတိ, အဘိနိဗ္ဗတ္တေတီတိ အတ္ထော။ ဝိဝေကနိသ္သိတန္တိ ဝိဝေကံ နိသ္သိတံ, ဝိဝေကေ ဝာ နိသ္သိတန္တိ ဝိဝေကနိသ္သိတံ။ ဝိဝေကောတိ ဝိဝိတ္တတာ။ ဝိဝိတ္တတာ စာယံ တဒင္ဂဝိဝေကော, ဝိက္ခမ္ဘန-သမုစ္ဆေဒ-ပဋိပ္ပသ္သဒ္ဓိ-နိသ္သရဏဝိဝေကောတိ ပဉ္စဝိဓော။ ဧဝမေတသ္မိံ ပဉ္စဝိဓေ ဝိဝေကေ။ ဝိဝေကနိသ္သိတန္တိ တဒင္ဂဝိဝေကနိသ္သိတံ သမုစ္ဆေဒဝိဝေကနိသ္သိတံ နိသ္သရဏဝိဝေကနိသ္သိတဉ္စ သမ္မာဒိဋ္ဌိံ ဘာဝေတီတိ အယမတ္ထော ဝေဒိတဗ္ဗော။ တထာ ဟိ အယံ အရိယမဂ္ဂဘာဝနာနုယုတ္တော ယောဂီ ဝိပသ္သနာက္ခဏေ ကိစ္စတော တဒင္ဂဝိဝေကနိသ္သိတံ, အဇ္ဈာသယတော နိသ္သရဏဝိဝေကနိသ္သိတံ, မဂ္ဂကာလေ ပန ကိစ္စတော သမုစ္ဆေဒဝိဝေကနိသ္သိတံ, အာရမ္မဏတော နိသ္သရဏဝိဝေကနိသ္သိတံ သမ္မာဒိဋ္ဌိံ ဘာဝေတိ။ ဧသ နယော ဝိရာဂနိသ္သိတာဒီသု။ ဝိဝေကတ္ထာ ဧဝ ဟိ ဝိရာဂာဒယော ။
Evaṃ tāva ‘‘sammādiṭṭhi’’ntiādinā nayena vuttānaṃ aṭṭhannaṃ ādipadānaṃyeva atthavaṇṇanaṃ ñatvā idāni bhāveti vivekanissitantiādīsu evaṃ ñātabbo. Bhāvetīti vaḍḍheti, attano cittasantāne punappunaṃ janeti, abhinibbattetīti attho. Vivekanissitanti vivekaṃ nissitaṃ, viveke vā nissitanti vivekanissitaṃ. Vivekoti vivittatā. Vivittatā cāyaṃ tadaṅgaviveko, vikkhambhana-samuccheda-paṭippassaddhi-nissaraṇavivekoti pañcavidho. Evametasmiṃ pañcavidhe viveke. Vivekanissitanti tadaṅgavivekanissitaṃ samucchedavivekanissitaṃ nissaraṇavivekanissitañca sammādiṭṭhiṃ bhāvetīti ayamattho veditabbo. Tathā hi ayaṃ ariyamaggabhāvanānuyutto yogī vipassanākkhaṇe kiccato tadaṅgavivekanissitaṃ, ajjhāsayato nissaraṇavivekanissitaṃ, maggakāle pana kiccato samucchedavivekanissitaṃ, ārammaṇato nissaraṇavivekanissitaṃ sammādiṭṭhiṃ bhāveti. Esa nayo virāganissitādīsu. Vivekatthā eva hi virāgādayo .
ကေဝလဉ္စေတ္ထ ဝောသ္သဂ္ဂော ဒုဝိဓော ပရိစ္စာဂဝောသ္သဂ္ဂော စ ပက္ခန္ဒနဝောသ္သဂ္ဂော စာတိ။ တတ္ထ ပရိစ္စာဂဝောသ္သဂ္ဂောတိ ဝိပသ္သနာက္ခဏေ စ တဒင္ဂဝသေန, မဂ္ဂက္ခဏေ စ သမုစ္ဆေဒဝသေန ကိလေသပ္ပဟာနံ။ ပက္ခန္ဒနဝောသ္သဂ္ဂောတိ ဝိပသ္သနာက္ခဏေ တန္နိန္နဘာဝေန, မဂ္ဂက္ခဏေ ပန အာရမ္မဏကရဏေန နိဗ္ဗာနပက္ခန္ဒနံ, တဒုဘယမ္ပိ ဣမသ္မိံ လောကိယလောကုတ္တရမိသ္သကေ အတ္ထဝဏ္ဏနာနယေ ဝဋ္ဋတိ။ တထာ ဟိ အယံ သမ္မာဒိဋ္ဌိ ယထာဝုတ္တေန ပကာရေန ကိလေသေ စ ပရိစ္စဇတိ, နိဗ္ဗာနဉ္စ ပက္ခန္ဒတိ။
Kevalañcettha vossaggo duvidho pariccāgavossaggo ca pakkhandanavossaggo cāti. Tattha pariccāgavossaggoti vipassanākkhaṇe ca tadaṅgavasena, maggakkhaṇe ca samucchedavasena kilesappahānaṃ. Pakkhandanavossaggoti vipassanākkhaṇe tanninnabhāvena, maggakkhaṇe pana ārammaṇakaraṇena nibbānapakkhandanaṃ, tadubhayampi imasmiṃ lokiyalokuttaramissake atthavaṇṇanānaye vaṭṭati. Tathā hi ayaṃ sammādiṭṭhi yathāvuttena pakārena kilese ca pariccajati, nibbānañca pakkhandati.
ဝောသ္သဂ္ဂပရိဏာမိန္တိ ဣမိနာ ပန သကလေန ဝစနေန ဝောသ္သဂ္ဂတ္ထံ ပရိဏမန္တံ ပရိဏတဉ္စ, ပရိပစ္စန္တံ ပရိပက္ကဉ္စာတိ ဣဒံ ဝုတ္တံ ဟောတိ။ အယဉ္ဟိ အရိယမဂ္ဂဘာဝနာနုယုတ္တော ဘိက္ခု ယထာ သမ္မာဒိဋ္ဌိ ကိလေသပရိစ္စာဂဝောသ္သဂ္ဂတ္ထံ နိဗ္ဗာနပက္ခန္ဒနဝောသ္သဂ္ဂတ္ထဉ္စ ပရိပစ္စတိ, ယထာ စ ပရိပက္ကာ ဟောတိ, တထာ နံ ဘာဝေတီတိ။ ဧသ နယော သေသမဂ္ဂင္ဂေသု။
Vossaggapariṇāminti iminā pana sakalena vacanena vossaggatthaṃ pariṇamantaṃ pariṇatañca, paripaccantaṃ paripakkañcāti idaṃ vuttaṃ hoti. Ayañhi ariyamaggabhāvanānuyutto bhikkhu yathā sammādiṭṭhi kilesapariccāgavossaggatthaṃ nibbānapakkhandanavossaggatthañca paripaccati, yathā ca paripakkā hoti, tathā naṃ bhāvetīti. Esa nayo sesamaggaṅgesu.
အာဂမ္မာတိ အာရဗ္ဘ သန္ဓာယ ပဋိစ္စ။ ဇာတိဓမ္မာတိ ဇာတိသဘာဝာ ဇာတိပကတိကာ။ တသ္မာတိ ယသ္မာ သကလော အရိယမဂ္ဂောပိ ကလ္ယာဏမိတ္တံ နိသ္သာယ လဗ္ဘတိ, တသ္မာ။ ဟန္ဒာတိ ဝဝသ္သဂ္ဂတ္ထေ နိပာတော။ အပ္ပမာဒံ ပသံသန္တီတိ အပ္ပမာဒံ ဝဏ္ဏယန္တိ, တသ္မာ အပ္ပမာဒော ကာတဗ္ဗော။ အတ္ထာဘိသမယာတိ အတ္ထပဋိလာဘာ။ အဋ္ဌမံ။
Āgammāti ārabbha sandhāya paṭicca. Jātidhammāti jātisabhāvā jātipakatikā. Tasmāti yasmā sakalo ariyamaggopi kalyāṇamittaṃ nissāya labbhati, tasmā. Handāti vavassaggatthe nipāto. Appamādaṃ pasaṃsantīti appamādaṃ vaṇṇayanti, tasmā appamādo kātabbo. Atthābhisamayāti atthapaṭilābhā. Aṭṭhamaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၈. ကလ္ယာဏမိတ္တသုတ္တံ • 8. Kalyāṇamittasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၈. ကလ္ယာဏမိတ္တသုတ္တဝဏ္ဏနာ • 8. Kalyāṇamittasuttavaṇṇanā
