| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၆. သူရိယပေယ္ယာလဝဂ္ဂော
6. Sūriyapeyyālavaggo
၁. ကလ္ယာဏမိတ္တသုတ္တံ
1. Kalyāṇamittasuttaṃ
၄၉. သာဝတ္ထိနိဒာနံ ။ ‘‘သူရိယသ္သ, ဘိက္ခဝေ, ဥဒယတော ဧတံ ပုဗ္ဗင္ဂမံ ဧတံ ပုဗ္ဗနိမိတ္တံ, ယဒိဒံ – အရုဏုဂ္ဂံ; ဧဝမေဝ ခော, ဘိက္ခဝေ , ဘိက္ခုနော အရိယသ္သ အဋ္ဌင္ဂိကသ္သ မဂ္ဂသ္သ ဥပ္ပာဒာယ ဧတံ ပုဗ္ဗင္ဂမံ ဧတံ ပုဗ္ဗနိမိတ္တံ, ယဒိဒံ – ကလ္ယာဏမိတ္တတာ။ ကလ္ယာဏမိတ္တသ္သေတံ, ဘိက္ခဝေ, ဘိက္ခုနော ပာဋိကင္ခံ – အရိယံ အဋ္ဌင္ဂိကံ မဂ္ဂံ ဘာဝေသ္သတိ, အရိယံ အဋ္ဌင္ဂိကံ မဂ္ဂံ ဗဟုလီကရိသ္သတိ။ ကထဉ္စ, ဘိက္ခဝေ, ဘိက္ခု ကလ္ယာဏမိတ္တော အရိယံ အဋ္ဌင္ဂိကံ မဂ္ဂံ ဘာဝေတိ, အရိယံ အဋ္ဌင္ဂိကံ မဂ္ဂံ ဗဟုလီကရောတိ? ဣဓ, ဘိက္ခဝေ, ဘိက္ခု သမ္မာဒိဋ္ဌိံ ဘာဝေတိ ဝိဝေကနိသ္သိတံ ဝိရာဂနိသ္သိတံ နိရောဓနိသ္သိတံ ဝောသ္သဂ္ဂပရိဏာမိံ။ပေ.။ သမ္မာသမာဓိံ ဘာဝေတိ ဝိဝေကနိသ္သိတံ ဝိရာဂနိသ္သိတံ နိရောဓနိသ္သိတံ ဝောသ္သဂ္ဂပရိဏာမိံ။ ဧဝံ ခော, ဘိက္ခဝေ, ဘိက္ခု ကလ္ယာဏမိတ္တော အရိယံ အဋ္ဌင္ဂိကံ မဂ္ဂံ ဘာဝေတိ, အရိယံ အဋ္ဌင္ဂိကံ မဂ္ဂံ ဗဟုလီကရောတီ’’တိ။ ပဌမံ။
49. Sāvatthinidānaṃ . ‘‘Sūriyassa, bhikkhave, udayato etaṃ pubbaṅgamaṃ etaṃ pubbanimittaṃ, yadidaṃ – aruṇuggaṃ; evameva kho, bhikkhave , bhikkhuno ariyassa aṭṭhaṅgikassa maggassa uppādāya etaṃ pubbaṅgamaṃ etaṃ pubbanimittaṃ, yadidaṃ – kalyāṇamittatā. Kalyāṇamittassetaṃ, bhikkhave, bhikkhuno pāṭikaṅkhaṃ – ariyaṃ aṭṭhaṅgikaṃ maggaṃ bhāvessati, ariyaṃ aṭṭhaṅgikaṃ maggaṃ bahulīkarissati. Kathañca, bhikkhave, bhikkhu kalyāṇamitto ariyaṃ aṭṭhaṅgikaṃ maggaṃ bhāveti, ariyaṃ aṭṭhaṅgikaṃ maggaṃ bahulīkaroti? Idha, bhikkhave, bhikkhu sammādiṭṭhiṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ…pe… sammāsamādhiṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ. Evaṃ kho, bhikkhave, bhikkhu kalyāṇamitto ariyaṃ aṭṭhaṅgikaṃ maggaṃ bhāveti, ariyaṃ aṭṭhaṅgikaṃ maggaṃ bahulīkarotī’’ti. Paṭhamaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၆. သူရိယပေယ္ယာလဝဂ္ဂဝဏ္ဏနာ • 6. Sūriyapeyyālavaggavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၆. သူရိယပေယ္ယာလဝဂ္ဂဝဏ္ဏနာ • 6. Sūriyapeyyālavaggavaṇṇanā
