| Library / Tipiṭaka / तिपिटक • Tipiṭaka / अपदानपाळि • Apadānapāḷi |
६. कदम्बपुप्फियत्थेरअपदानं
6. Kadambapupphiyattheraapadānaṃ
२०.
20.
‘‘सुवण्णवण्णं सम्बुद्धं, गच्छन्तं अन्तरापणे।
‘‘Suvaṇṇavaṇṇaṃ sambuddhaṃ, gacchantaṃ antarāpaṇe;
कञ्चनग्घियसङ्कासं, बात्तिंसवरलक्खणं॥
Kañcanagghiyasaṅkāsaṃ, bāttiṃsavaralakkhaṇaṃ.
२१.
21.
‘‘निसज्ज पासादवरे, अद्दसं लोकनायकं।
‘‘Nisajja pāsādavare, addasaṃ lokanāyakaṃ;
कदम्बपुप्फं पग्गय्ह, विपस्सिं अभिपूजयिं॥
Kadambapupphaṃ paggayha, vipassiṃ abhipūjayiṃ.
२२.
22.
‘‘एकनवुतितो कप्पे, यं बुद्धमभिपूजयिं।
‘‘Ekanavutito kappe, yaṃ buddhamabhipūjayiṃ;
दुग्गतिं नाभिजानामि, बुद्धपूजायिदं फलं॥
Duggatiṃ nābhijānāmi, buddhapūjāyidaṃ phalaṃ.
२३.
23.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा कदम्बपुप्फियो थेरो इमा गाथायो अभासित्थाति।
Itthaṃ sudaṃ āyasmā kadambapupphiyo thero imā gāthāyo abhāsitthāti.
कदम्बपुप्फियत्थेरस्सापदानं छट्ठं।
Kadambapupphiyattherassāpadānaṃ chaṭṭhaṃ.
