| Library / Tipiṭaka / തിപിടക • Tipiṭaka / കങ്ഖാവിതരണീ-അഭിനവ-ടീകാ • Kaṅkhāvitaraṇī-abhinava-ṭīkā |
൬. ജോതിസിക്ഖാപദവണ്ണനാ
6. Jotisikkhāpadavaṇṇanā
അഗിലാനോതി യസ്സ വിനാ അഗ്ഗിനാ ഫാസു ഹോതി, സോ ഇധ അഗിലാനോ നാമ. ജോതിന്തി അഗ്ഗിം.
Agilānoti yassa vinā agginā phāsu hoti, so idha agilāno nāma. Jotinti aggiṃ.
ഭഗ്ഗേസൂതി ഏവംനാമകേ ജനപദേ. ഭഗ്ഗാനാമ ജാനപദിനോ രാജകുമാരാ, തേസം നിവാസോ ഏകോപി ജനപദോ രുള്ഹിസദ്ദേന ‘‘ഭഗ്ഗാ’’തി വുച്ചതി. തേന വുത്തം ‘‘ഭഗ്ഗേസൂതി ഏവംനാമകേ ജനപദേ’’തി. തഥാ പതിലാതം ഉക്ഖിപന്തസ്സാതി ഡയ്ഹമാനം അലാതം പതിതം ഉക്ഖിപന്തസ്സ തഥാ ദുക്കടന്തി അത്ഥോ. തഞ്ചാതി ദുക്കടം പരാമസതി. അവിജ്ഝാതന്തി അനിബ്ബുതാലാതം. പദീപജോതികജന്താഘരേതി പദീപുജ്ജലനപത്തപചനസേദകമ്മാദീസു ജോതികരണേ അഗ്ഗിസാലായഞ്ച സമാദഹന്തസ്സ അനാപത്തീതി അത്ഥോ. തഥാരൂപപ്പച്ചയേതി ഠപേത്വാ പദീപാദീനി അഞ്ഞസ്മിമ്പി തഥാരൂപപച്ചയേ. ആപദാസൂതി ദുട്ഠവാളമിഗഅമനുസ്സേഹി ഉപദ്ദവേസു.
Bhaggesūti evaṃnāmake janapade. Bhaggānāma jānapadino rājakumārā, tesaṃ nivāso ekopi janapado ruḷhisaddena ‘‘bhaggā’’ti vuccati. Tena vuttaṃ ‘‘bhaggesūti evaṃnāmake janapade’’ti. Tathā patilātaṃ ukkhipantassāti ḍayhamānaṃ alātaṃ patitaṃ ukkhipantassa tathā dukkaṭanti attho. Tañcāti dukkaṭaṃ parāmasati. Avijjhātanti anibbutālātaṃ. Padīpajotikajantāghareti padīpujjalanapattapacanasedakammādīsu jotikaraṇe aggisālāyañca samādahantassa anāpattīti attho. Tathārūpappaccayeti ṭhapetvā padīpādīni aññasmimpi tathārūpapaccaye. Āpadāsūti duṭṭhavāḷamigaamanussehi upaddavesu.
ജോതിസിക്ഖാപദവണ്ണനാ നിട്ഠിതാ.
Jotisikkhāpadavaṇṇanā niṭṭhitā.
