| Library / Tipiṭaka / තිපිටක • Tipiṭaka / කඞ්ඛාවිතරණී-අභිනව-ටීකා • Kaṅkhāvitaraṇī-abhinava-ṭīkā |
6. ජොතිසික්ඛාපදවණ්ණනා
6. Jotisikkhāpadavaṇṇanā
අගිලානොති යස්ස විනා අග්ගිනා ඵාසු හොති, සො ඉධ අගිලානො නාම. ජොතින්ති අග්ගිං.
Agilānoti yassa vinā agginā phāsu hoti, so idha agilāno nāma. Jotinti aggiṃ.
භග්ගෙසූති එවංනාමකෙ ජනපදෙ. භග්ගානාම ජානපදිනො රාජකුමාරා, තෙසං නිවාසො එකොපි ජනපදො රුළ්හිසද්දෙන ‘‘භග්ගා’’ති වුච්චති. තෙන වුත්තං ‘‘භග්ගෙසූති එවංනාමකෙ ජනපදෙ’’ති. තථා පතිලාතං උක්ඛිපන්තස්සාති ඩය්හමානං අලාතං පතිතං උක්ඛිපන්තස්ස තථා දුක්කටන්ති අත්ථො. තඤ්චාති දුක්කටං පරාමසති. අවිජ්ඣාතන්ති අනිබ්බුතාලාතං. පදීපජොතිකජන්තාඝරෙති පදීපුජ්ජලනපත්තපචනසෙදකම්මාදීසු ජොතිකරණෙ අග්ගිසාලායඤ්ච සමාදහන්තස්ස අනාපත්තීති අත්ථො. තථාරූපප්පච්චයෙති ඨපෙත්වා පදීපාදීනි අඤ්ඤස්මිම්පි තථාරූපපච්චයෙ. ආපදාසූති දුට්ඨවාළමිගඅමනුස්සෙහි උපද්දවෙසු.
Bhaggesūti evaṃnāmake janapade. Bhaggānāma jānapadino rājakumārā, tesaṃ nivāso ekopi janapado ruḷhisaddena ‘‘bhaggā’’ti vuccati. Tena vuttaṃ ‘‘bhaggesūti evaṃnāmake janapade’’ti. Tathā patilātaṃ ukkhipantassāti ḍayhamānaṃ alātaṃ patitaṃ ukkhipantassa tathā dukkaṭanti attho. Tañcāti dukkaṭaṃ parāmasati. Avijjhātanti anibbutālātaṃ. Padīpajotikajantāghareti padīpujjalanapattapacanasedakammādīsu jotikaraṇe aggisālāyañca samādahantassa anāpattīti attho. Tathārūpappaccayeti ṭhapetvā padīpādīni aññasmimpi tathārūpapaccaye. Āpadāsūti duṭṭhavāḷamigaamanussehi upaddavesu.
ජොතිසික්ඛාපදවණ්ණනා නිට්ඨිතා.
Jotisikkhāpadavaṇṇanā niṭṭhitā.
