| Library / Tipiṭaka / ತಿಪಿಟಕ • Tipiṭaka / ಕಙ್ಖಾವಿತರಣೀ-ಅಭಿನವ-ಟೀಕಾ • Kaṅkhāvitaraṇī-abhinava-ṭīkā |
೬. ಜೋತಿಸಿಕ್ಖಾಪದವಣ್ಣನಾ
6. Jotisikkhāpadavaṇṇanā
ಅಗಿಲಾನೋತಿ ಯಸ್ಸ ವಿನಾ ಅಗ್ಗಿನಾ ಫಾಸು ಹೋತಿ, ಸೋ ಇಧ ಅಗಿಲಾನೋ ನಾಮ। ಜೋತಿನ್ತಿ ಅಗ್ಗಿಂ।
Agilānoti yassa vinā agginā phāsu hoti, so idha agilāno nāma. Jotinti aggiṃ.
ಭಗ್ಗೇಸೂತಿ ಏವಂನಾಮಕೇ ಜನಪದೇ। ಭಗ್ಗಾನಾಮ ಜಾನಪದಿನೋ ರಾಜಕುಮಾರಾ, ತೇಸಂ ನಿವಾಸೋ ಏಕೋಪಿ ಜನಪದೋ ರುಳ್ಹಿಸದ್ದೇನ ‘‘ಭಗ್ಗಾ’’ತಿ ವುಚ್ಚತಿ। ತೇನ ವುತ್ತಂ ‘‘ಭಗ್ಗೇಸೂತಿ ಏವಂನಾಮಕೇ ಜನಪದೇ’’ತಿ। ತಥಾ ಪತಿಲಾತಂ ಉಕ್ಖಿಪನ್ತಸ್ಸಾತಿ ಡಯ್ಹಮಾನಂ ಅಲಾತಂ ಪತಿತಂ ಉಕ್ಖಿಪನ್ತಸ್ಸ ತಥಾ ದುಕ್ಕಟನ್ತಿ ಅತ್ಥೋ। ತಞ್ಚಾತಿ ದುಕ್ಕಟಂ ಪರಾಮಸತಿ। ಅವಿಜ್ಝಾತನ್ತಿ ಅನಿಬ್ಬುತಾಲಾತಂ। ಪದೀಪಜೋತಿಕಜನ್ತಾಘರೇತಿ ಪದೀಪುಜ್ಜಲನಪತ್ತಪಚನಸೇದಕಮ್ಮಾದೀಸು ಜೋತಿಕರಣೇ ಅಗ್ಗಿಸಾಲಾಯಞ್ಚ ಸಮಾದಹನ್ತಸ್ಸ ಅನಾಪತ್ತೀತಿ ಅತ್ಥೋ। ತಥಾರೂಪಪ್ಪಚ್ಚಯೇತಿ ಠಪೇತ್ವಾ ಪದೀಪಾದೀನಿ ಅಞ್ಞಸ್ಮಿಮ್ಪಿ ತಥಾರೂಪಪಚ್ಚಯೇ। ಆಪದಾಸೂತಿ ದುಟ್ಠವಾಳಮಿಗಅಮನುಸ್ಸೇಹಿ ಉಪದ್ದವೇಸು।
Bhaggesūti evaṃnāmake janapade. Bhaggānāma jānapadino rājakumārā, tesaṃ nivāso ekopi janapado ruḷhisaddena ‘‘bhaggā’’ti vuccati. Tena vuttaṃ ‘‘bhaggesūti evaṃnāmake janapade’’ti. Tathā patilātaṃ ukkhipantassāti ḍayhamānaṃ alātaṃ patitaṃ ukkhipantassa tathā dukkaṭanti attho. Tañcāti dukkaṭaṃ parāmasati. Avijjhātanti anibbutālātaṃ. Padīpajotikajantāghareti padīpujjalanapattapacanasedakammādīsu jotikaraṇe aggisālāyañca samādahantassa anāpattīti attho. Tathārūpappaccayeti ṭhapetvā padīpādīni aññasmimpi tathārūpapaccaye. Āpadāsūti duṭṭhavāḷamigaamanussehi upaddavesu.
ಜೋತಿಸಿಕ್ಖಾಪದವಣ್ಣನಾ ನಿಟ್ಠಿತಾ।
Jotisikkhāpadavaṇṇanā niṭṭhitā.
