| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
၆. ဇောတိသိက္ခာပဒဝဏ္ဏနာ
6. Jotisikkhāpadavaṇṇanā
အဂိလာနောတိ ယသ္သ ဝိနာ အဂ္ဂိနာ ဖာသု ဟောတိ, သော ဣဓ အဂိလာနော နာမ။ ဇောတိန္တိ အဂ္ဂိံ။
Agilānoti yassa vinā agginā phāsu hoti, so idha agilāno nāma. Jotinti aggiṃ.
ဘဂ္ဂေသူတိ ဧဝံနာမကေ ဇနပဒေ။ ဘဂ္ဂာနာမ ဇာနပဒိနော ရာဇကုမာရာ, တေသံ နိဝာသော ဧကောပိ ဇနပဒော ရုဠ္ဟိသဒ္ဒေန ‘‘ဘဂ္ဂာ’’တိ ဝုစ္စတိ။ တေန ဝုတ္တံ ‘‘ဘဂ္ဂေသူတိ ဧဝံနာမကေ ဇနပဒေ’’တိ။ တထာ ပတိလာတံ ဥက္ခိပန္တသ္သာတိ ဍယ္ဟမာနံ အလာတံ ပတိတံ ဥက္ခိပန္တသ္သ တထာ ဒုက္ကဋန္တိ အတ္ထော။ တဉ္စာတိ ဒုက္ကဋံ ပရာမသတိ။ အဝိဇ္ဈာတန္တိ အနိဗ္ဗုတာလာတံ။ ပဒီပဇောတိကဇန္တာဃရေတိ ပဒီပုဇ္ဇလနပတ္တပစနသေဒကမ္မာဒီသု ဇောတိကရဏေ အဂ္ဂိသာလာယဉ္စ သမာဒဟန္တသ္သ အနာပတ္တီတိ အတ္ထော။ တထာရူပပ္ပစ္စယေတိ ဌပေတ္ဝာ ပဒီပာဒီနိ အညသ္မိမ္ပိ တထာရူပပစ္စယေ။ အာပဒာသူတိ ဒုဋ္ဌဝာဠမိဂအမနုသ္သေဟိ ဥပဒ္ဒဝေသု။
Bhaggesūti evaṃnāmake janapade. Bhaggānāma jānapadino rājakumārā, tesaṃ nivāso ekopi janapado ruḷhisaddena ‘‘bhaggā’’ti vuccati. Tena vuttaṃ ‘‘bhaggesūti evaṃnāmake janapade’’ti. Tathā patilātaṃ ukkhipantassāti ḍayhamānaṃ alātaṃ patitaṃ ukkhipantassa tathā dukkaṭanti attho. Tañcāti dukkaṭaṃ parāmasati. Avijjhātanti anibbutālātaṃ. Padīpajotikajantāghareti padīpujjalanapattapacanasedakammādīsu jotikaraṇe aggisālāyañca samādahantassa anāpattīti attho. Tathārūpappaccayeti ṭhapetvā padīpādīni aññasmimpi tathārūpapaccaye. Āpadāsūti duṭṭhavāḷamigaamanussehi upaddavesu.
ဇောတိသိက္ခာပဒဝဏ္ဏနာ နိဋ္ဌိတာ။
Jotisikkhāpadavaṇṇanā niṭṭhitā.
