| Library / Tipiṭaka / តិបិដក • Tipiṭaka / កង្ខាវិតរណី-អភិនវ-ដីកា • Kaṅkhāvitaraṇī-abhinava-ṭīkā |
៦. ជោតិសិក្ខាបទវណ្ណនា
6. Jotisikkhāpadavaṇṇanā
អគិលានោតិ យស្ស វិនា អគ្គិនា ផាសុ ហោតិ, សោ ឥធ អគិលានោ នាម។ ជោតិន្តិ អគ្គិំ។
Agilānoti yassa vinā agginā phāsu hoti, so idha agilāno nāma. Jotinti aggiṃ.
ភគ្គេសូតិ ឯវំនាមកេ ជនបទេ។ ភគ្គានាម ជានបទិនោ រាជកុមារា, តេសំ និវាសោ ឯកោបិ ជនបទោ រុឡ្ហិសទ្ទេន ‘‘ភគ្គា’’តិ វុច្ចតិ។ តេន វុត្តំ ‘‘ភគ្គេសូតិ ឯវំនាមកេ ជនបទេ’’តិ។ តថា បតិលាតំ ឧក្ខិបន្តស្សាតិ ឌយ្ហមានំ អលាតំ បតិតំ ឧក្ខិបន្តស្ស តថា ទុក្កដន្តិ អត្ថោ។ តញ្ចាតិ ទុក្កដំ បរាមសតិ។ អវិជ្ឈាតន្តិ អនិព្ពុតាលាតំ។ បទីបជោតិកជន្តាឃរេតិ បទីបុជ្ជលនបត្តបចនសេទកម្មាទីសុ ជោតិករណេ អគ្គិសាលាយញ្ច សមាទហន្តស្ស អនាបត្តីតិ អត្ថោ។ តថារូបប្បច្ចយេតិ ឋបេត្វា បទីបាទីនិ អញ្ញស្មិម្បិ តថារូបបច្ចយេ។ អាបទាសូតិ ទុដ្ឋវាឡមិគអមនុស្សេហិ ឧបទ្ទវេសុ។
Bhaggesūti evaṃnāmake janapade. Bhaggānāma jānapadino rājakumārā, tesaṃ nivāso ekopi janapado ruḷhisaddena ‘‘bhaggā’’ti vuccati. Tena vuttaṃ ‘‘bhaggesūti evaṃnāmake janapade’’ti. Tathā patilātaṃ ukkhipantassāti ḍayhamānaṃ alātaṃ patitaṃ ukkhipantassa tathā dukkaṭanti attho. Tañcāti dukkaṭaṃ parāmasati. Avijjhātanti anibbutālātaṃ. Padīpajotikajantāghareti padīpujjalanapattapacanasedakammādīsu jotikaraṇe aggisālāyañca samādahantassa anāpattīti attho. Tathārūpappaccayeti ṭhapetvā padīpādīni aññasmimpi tathārūpapaccaye. Āpadāsūti duṭṭhavāḷamigaamanussehi upaddavesu.
ជោតិសិក្ខាបទវណ្ណនា និដ្ឋិតា។
Jotisikkhāpadavaṇṇanā niṭṭhitā.
