| Library / Tipiṭaka / ತಿಪಿಟಕ • Tipiṭaka / ಥೇರೀಗಾಥಾ-ಅಟ್ಠಕಥಾ • Therīgāthā-aṭṭhakathā |
೨. ಜೇನ್ತಾಥೇರೀಗಾಥಾವಣ್ಣನಾ
2. Jentātherīgāthāvaṇṇanā
ಯೇ ಇಮೇ ಸತ್ತ ಬೋಜ್ಝಙ್ಗಾತಿಆದಿಕಾ ಜೇನ್ತಾಯ ಥೇರಿಯಾ ಗಾಥಾ। ತಸ್ಸಾ ಅತೀತಂ ಪಚ್ಚುಪ್ಪನ್ನಞ್ಚ ವತ್ಥು ಅಭಿರೂಪನನ್ದಾವತ್ಥುಸದಿಸಂ। ಅಯಂ ಪನ ವೇಸಾಲಿಯಂ ಲಿಚ್ಛವಿರಾಜಕುಲೇ ನಿಬ್ಬತ್ತೀತಿ ಅಯಮೇವ ವಿಸೇಸೋ। ಸತ್ಥಾರಾ ದೇಸಿತಂ ಧಮ್ಮಂ ಸುತ್ವಾ ದೇಸನಾಪರಿಯೋಸಾನೇ ಅರಹತ್ತಂ ಪತ್ವಾ ಅತ್ತನಾ ಅಧಿಗತಂ ವಿಸೇಸಂ ಪಚ್ಚವೇಕ್ಖಿತ್ವಾ ಪೀತಿವಸೇನ –
Yeime satta bojjhaṅgātiādikā jentāya theriyā gāthā. Tassā atītaṃ paccuppannañca vatthu abhirūpanandāvatthusadisaṃ. Ayaṃ pana vesāliyaṃ licchavirājakule nibbattīti ayameva viseso. Satthārā desitaṃ dhammaṃ sutvā desanāpariyosāne arahattaṃ patvā attanā adhigataṃ visesaṃ paccavekkhitvā pītivasena –
೨೧.
21.
‘‘ಯೇ ಇಮೇ ಸತ್ತ ಬೋಜ್ಝಙ್ಗಾ, ಮಗ್ಗಾ ನಿಬ್ಬಾನಪತ್ತಿಯಾ।
‘‘Ye ime satta bojjhaṅgā, maggā nibbānapattiyā;
ಭಾವಿತಾ ತೇ ಮಯಾ ಸಬ್ಬೇ, ಯಥಾ ಬುದ್ಧೇನ ದೇಸಿತಾ॥
Bhāvitā te mayā sabbe, yathā buddhena desitā.
೨೨.
22.
‘‘ದಿಟ್ಠೋ ಹಿ ಮೇ ಸೋ ಭಗವಾ, ಅನ್ತಿಮೋಯಂ ಸಮುಸ್ಸಯೋ।
‘‘Diṭṭho hi me so bhagavā, antimoyaṃ samussayo;
ವಿಕ್ಖೀಣೋ ಜಾತಿಸಂಸಾರೋ, ನತ್ಥಿ ದಾನಿ ಪುನಬ್ಭವೋ’’ತಿ॥ –
Vikkhīṇo jātisaṃsāro, natthi dāni punabbhavo’’ti. –
ಇಮಾ ದ್ವೇ ಗಾಥಾ ಅಭಾಸಿ।
Imā dve gāthā abhāsi.
ತತ್ಥ ಯೇ ಇಮೇ ಸತ್ತ ಬೋಜ್ಝಙ್ಗಾತಿ ಯೇ ಇಮೇ ಸತಿಧಮ್ಮವಿಚಯವೀರಿಯಪೀತಿಪಸ್ಸದ್ಧಿಸಮಾಧಿಉಪೇಕ್ಖಾಸಙ್ಖಾತಾ ಬೋಧಿಯಾ ಯಥಾವುತ್ತಾಯ ಧಮ್ಮಸಾಮಗ್ಗಿಯಾ , ಬೋಧಿಸ್ಸ ವಾ ಬುಜ್ಝನಕಸ್ಸ ತಂಸಮಙ್ಗಿನೋ ಪುಗ್ಗಲಸ್ಸ ಅಙ್ಗಭೂತತ್ತಾ ‘‘ಬೋಜ್ಝಙ್ಗಾ’’ತಿ ಲದ್ಧನಾಮಾ ಸತ್ತ ಧಮ್ಮಾ। ಮಗ್ಗಾ ನಿಬ್ಬಾನಪತ್ತಿಯಾತಿ ನಿಬ್ಬಾನಾಧಿಗಮಸ್ಸ ಉಪಾಯಭೂತಾ। ಭಾವಿತಾ ತೇ ಮಯಾ ಸಬ್ಬೇ, ಯಥಾ ಬುದ್ಧೇನ ದೇಸಿತಾತಿ ತೇ ಸತ್ತತಿಂಸ ಬೋಧಿಪಕ್ಖಿಯಧಮ್ಮಾ ಸಬ್ಬೇಪಿ ಮಯಾ ಯಥಾ ಬುದ್ಧೇನ ಭಗವತಾ ದೇಸಿತಾ, ತಥಾ ಮಯಾ ಉಪ್ಪಾದಿತಾ ಚ ವಡ್ಢಿತಾ ಚ।
Tattha ye ime satta bojjhaṅgāti ye ime satidhammavicayavīriyapītipassaddhisamādhiupekkhāsaṅkhātā bodhiyā yathāvuttāya dhammasāmaggiyā , bodhissa vā bujjhanakassa taṃsamaṅgino puggalassa aṅgabhūtattā ‘‘bojjhaṅgā’’ti laddhanāmā satta dhammā. Maggā nibbānapattiyāti nibbānādhigamassa upāyabhūtā. Bhāvitā te mayā sabbe, yathā buddhena desitāti te sattatiṃsa bodhipakkhiyadhammā sabbepi mayā yathā buddhena bhagavatā desitā, tathā mayā uppāditā ca vaḍḍhitā ca.
ದಿಟ್ಠೋ ಹಿ ಮೇ ಸೋ ಭಗವಾತಿ ಹಿ-ಸದ್ದೋ ಹೇತುಅತ್ಥೋ। ಯಸ್ಮಾ ಸೋ ಭಗವಾ ಧಮ್ಮಕಾಯೋ ಸಮ್ಮಾಸಮ್ಬುದ್ಧೋ ಅತ್ತನಾ ಅಧಿಗತಅರಿಯಧಮ್ಮದಸ್ಸನೇನ ದಿಟ್ಠೋ, ತಸ್ಮಾ ಅನ್ತಿಮೋಯಂ ಸಮುಸ್ಸಯೋತಿ ಯೋಜನಾ। ಅರಿಯಧಮ್ಮದಸ್ಸನೇನ ಹಿ ಬುದ್ಧಾ ಭಗವನ್ತೋ ಅಞ್ಞೇ ಚ ಅರಿಯಾ ದಿಟ್ಠಾ ನಾಮ ಹೋನ್ತಿ, ನ ರೂಪಕಾಯದಸ್ಸನಮತ್ತೇನ। ಯಥಾಹ – ‘‘ಯೋ ಖೋ, ವಕ್ಕಲಿ, ಧಮ್ಮಂ ಪಸ್ಸತಿ, ಸೋ ಮಂ ಪಸ್ಸತೀ’’ತಿ (ಸಂ॰ ನಿ॰ ೩.೮೭) ಚ ‘‘ಸುತವಾ ಚ ಖೋ, ಭಿಕ್ಖವೇ, ಅರಿಯಸಾವಕೋ ಅರಿಯಾನಂ ದಸ್ಸಾವೀ’’ತಿ (ಮ॰ ನಿ॰ ೧.೨೦; ಸಂ॰ ನಿ॰ ೩.೧) ಚ ಆದಿ। ಸೇಸಂ ವುತ್ತನಯಮೇವ।
Diṭṭho hi me so bhagavāti hi-saddo hetuattho. Yasmā so bhagavā dhammakāyo sammāsambuddho attanā adhigataariyadhammadassanena diṭṭho, tasmā antimoyaṃ samussayoti yojanā. Ariyadhammadassanena hi buddhā bhagavanto aññe ca ariyā diṭṭhā nāma honti, na rūpakāyadassanamattena. Yathāha – ‘‘yo kho, vakkali, dhammaṃ passati, so maṃ passatī’’ti (saṃ. ni. 3.87) ca ‘‘sutavā ca kho, bhikkhave, ariyasāvako ariyānaṃ dassāvī’’ti (ma. ni. 1.20; saṃ. ni. 3.1) ca ādi. Sesaṃ vuttanayameva.
ಜೇನ್ತಾಥೇರೀಗಾಥಾವಣ್ಣನಾ ನಿಟ್ಠಿತಾ।
Jentātherīgāthāvaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಥೇರೀಗಾಥಾಪಾಳಿ • Therīgāthāpāḷi / ೨. ಜೇನ್ತಾಥೇರೀಗಾಥಾ • 2. Jentātherīgāthā
