| Library / Tipiṭaka / ติปิฎก • Tipiṭaka / สุตฺตนิปาตปาฬิ • Suttanipātapāḷi |
๑๑. ชตุกณฺณิมาณวปุจฺฉา
11. Jatukaṇṇimāṇavapucchā
๑๑๐๒.
1102.
‘‘สุตฺวานหํ วีรมกามกามิํ, (อิจฺจายสฺมา ชตุกณฺณิ)
‘‘Sutvānahaṃ vīramakāmakāmiṃ, (iccāyasmā jatukaṇṇi)
โอฆาติคํ ปุฎฺฐุมกามมาคมํ;
Oghātigaṃ puṭṭhumakāmamāgamaṃ;
สนฺติปทํ พฺรูหิ สหชเนตฺต, ยถาตจฺฉํ ภควา พฺรูหิ เม ตํฯ
Santipadaṃ brūhi sahajanetta, yathātacchaṃ bhagavā brūhi me taṃ.
๑๑๐๓.
1103.
‘‘ภควา หิ กาเม อภิภุยฺย อิริยติ, อาทิโจฺจว ปถวิํ เตชี เตชสา;
‘‘Bhagavā hi kāme abhibhuyya iriyati, ādiccova pathaviṃ tejī tejasā;
ปริตฺตปญฺญสฺส เม ภูริปญฺญ, อาจิกฺข ธมฺมํ ยมหํ วิชญฺญํ;
Parittapaññassa me bhūripañña, ācikkha dhammaṃ yamahaṃ vijaññaṃ;
ชาติชราย อิธ วิปฺปหานํ’’ฯ
Jātijarāya idha vippahānaṃ’’.
๑๑๐๔.
1104.
‘‘กาเมสุ วินย เคธํ, (ชตุกณฺณีติ ภควา) เนกฺขมฺมํ ทฎฺฐุ เขมโต;
‘‘Kāmesu vinaya gedhaṃ, (jatukaṇṇīti bhagavā) nekkhammaṃ daṭṭhu khemato;
อุคฺคหีตํ นิรตฺตํ วา, มา เต วิชฺชิตฺถ กิญฺจนํฯ
Uggahītaṃ nirattaṃ vā, mā te vijjittha kiñcanaṃ.
๑๑๐๕.
1105.
‘‘ยํ ปุเพฺพ ตํ วิโสเสหิ, ปจฺฉา เต มาหุ กิญฺจนํ;
‘‘Yaṃ pubbe taṃ visosehi, pacchā te māhu kiñcanaṃ;
มเชฺฌ เจ โน คเหสฺสสิ, อุปสโนฺต จริสฺสสิฯ
Majjhe ce no gahessasi, upasanto carissasi.
๑๑๐๖.
1106.
‘‘สพฺพโส นามรูปสฺมิํ, วีตเคธสฺส พฺราหฺมณ;
‘‘Sabbaso nāmarūpasmiṃ, vītagedhassa brāhmaṇa;
อาสวาสฺส น วิชฺชนฺติ, เยหิ มจฺจุวสํ วเช’’ติฯ
Āsavāssa na vijjanti, yehi maccuvasaṃ vaje’’ti.
ชตุกณฺณิมาณวปุจฺฉา เอกาทสมา นิฎฺฐิตาฯ
Jatukaṇṇimāṇavapucchā ekādasamā niṭṭhitā.
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / สุตฺตนิปาต-อฎฺฐกถา • Suttanipāta-aṭṭhakathā / ๑๑. ชตุกณฺณิสุตฺตวณฺณนา • 11. Jatukaṇṇisuttavaṇṇanā
