| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৬. জটাসুত্তং
6. Jaṭāsuttaṃ
১৯২. সাৰত্থিনিদানং । অথ খো জটাভারদ্ৰাজো ব্রাহ্মণো যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি। সম্মোদনীযং কথং সারণীযং ৰীতিসারেত্ৰা একমন্তং নিসীদি। একমন্তং নিসিন্নো খো জটাভারদ্ৰাজো ব্রাহ্মণো ভগৰন্তং গাথায অজ্ঝভাসি –
192. Sāvatthinidānaṃ . Atha kho jaṭābhāradvājo brāhmaṇo yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho jaṭābhāradvājo brāhmaṇo bhagavantaṃ gāthāya ajjhabhāsi –
‘‘অন্তোজটা বহিজটা, জটায জটিতা পজা।
‘‘Antojaṭā bahijaṭā, jaṭāya jaṭitā pajā;
তং তং গোতম পুচ্ছামি, কো ইমং ৰিজটযে জট’’ন্তি॥
Taṃ taṃ gotama pucchāmi, ko imaṃ vijaṭaye jaṭa’’nti.
‘‘সীলে পতিট্ঠায নরো সপঞ্ঞো, চিত্তং পঞ্ঞঞ্চ ভাৰযং।
‘‘Sīle patiṭṭhāya naro sapañño, cittaṃ paññañca bhāvayaṃ;
আতাপী নিপকো ভিক্খু, সো ইমং ৰিজটযে জটং॥
Ātāpī nipako bhikkhu, so imaṃ vijaṭaye jaṭaṃ.
‘‘যেসং রাগো চ দোসো চ, অৰিজ্জা চ ৰিরাজিতা।
‘‘Yesaṃ rāgo ca doso ca, avijjā ca virājitā;
খীণাসৰা অরহন্তো, তেসং ৰিজটিতা জটা॥
Khīṇāsavā arahanto, tesaṃ vijaṭitā jaṭā.
‘‘যত্থ নামঞ্চ রূপঞ্চ, অসেসং উপরুজ্ঝতি।
‘‘Yattha nāmañca rūpañca, asesaṃ uparujjhati;
পটিঘং রূপসঞ্ঞা চ, এত্থেসা ছিজ্জতে জটা’’তি॥
Paṭighaṃ rūpasaññā ca, etthesā chijjate jaṭā’’ti.
এৰং ৰুত্তে, জটাভারদ্ৰাজো ভগৰন্তং এতদৰোচ – ‘‘অভিক্কন্তং, ভো গোতম…পে॰… অঞ্ঞতরো চ পনাযস্মা ভারদ্ৰাজো অরহতং অহোসী’’তি।
Evaṃ vutte, jaṭābhāradvājo bhagavantaṃ etadavoca – ‘‘abhikkantaṃ, bho gotama…pe… aññataro ca panāyasmā bhāradvājo arahataṃ ahosī’’ti.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৬. জটাসুত্তৰণ্ণনা • 6. Jaṭāsuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৬. জটাসুত্তৰণ্ণনা • 6. Jaṭāsuttavaṇṇanā
