| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৬. জরাৰগ্গো
6. Jarāvaggo
১. জরাসুত্তৰণ্ণনা
1. Jarāsuttavaṇṇanā
৫১. হিতস্স সাধনতো সাধু, যং কিঞ্চি অত্থজাতং। তং পন অত্থকামেন লভিতব্বতো উপসেৰিতব্বতো লদ্ধকং, কল্যাণট্ঠেন ভদ্দকন্তি ৰুচ্চতীতি আহ ‘‘সাধূতি লদ্ধকং ভদ্দক’’ন্তি। ‘‘সীলং যাৰ জরা সাধূ’’তি ৰুত্তমত্থং ব্যতিরেকতো ৰিভাৰেতুং ‘‘ইমিনা ইদং দস্সেতী’’তি ৰুত্তং। ইদন্তি ইদং অত্থজাতং।
51. Hitassa sādhanato sādhu, yaṃ kiñci atthajātaṃ. Taṃ pana atthakāmena labhitabbato upasevitabbato laddhakaṃ, kalyāṇaṭṭhena bhaddakanti vuccatīti āha ‘‘sādhūti laddhakaṃ bhaddaka’’nti. ‘‘Sīlaṃ yāva jarā sādhū’’ti vuttamatthaṃ byatirekato vibhāvetuṃ ‘‘iminā idaṃ dassetī’’ti vuttaṃ. Idanti idaṃ atthajātaṃ.
পতিট্ঠিতাতি চিত্তসন্তানে লদ্ধপতিট্ঠা, কেনচি অসংহারিযা। তেনাহ ‘‘মগ্গেন আগতা’’তি। চিত্তীকতট্ঠাদীহীতি পূজনীযভাৰাদীহি। ৰুত্তং হেতং পোরাণট্ঠকথাযং। চিত্তীকতন্তি রতনন্তি ইদং রতনং নাম লোকে চিত্তীকতং ৰত্থূনং সহস্সগ্ঘনতাদিৰসেন। যেপি লোকে চিত্তীকতা খত্তিযপণ্ডিত-চতুমহারাজ-সক্ক-সুযাম-মহাব্রহ্মাদযো, তেসং চিত্তীকতো তেহি সরণন্তি উপগন্তব্বতাদিৰসেন। রতিকরন্তি পীতিসুখাৰহং। ঝানরতিসুখেনাতি দুৰিধেনপি ঝানরতিসুখেন। তুলেতুন্তি পরিচ্ছিন্দিতুং। গুণপারমিন্তি গুণানং উক্কংসপারমিং। দুল্লভো অনেকানি অসঙ্খ্যেয্যানি অতিধাৰিত্ৰাপি লদ্ধুং অসক্কুণেয্যত্তা। অনোমোতি অনূনো পরিপুণ্ণো। তত্থ ৰিসেসতো অনোমসত্তপরিভোগতো তেহি ‘‘সম্মাসম্বুদ্ধো ভগৰা’’তি অনুস্সরিতব্বতোতি আহ ‘‘ভগৰা অনোমো সীলেনা’’তিআদি।
Patiṭṭhitāti cittasantāne laddhapatiṭṭhā, kenaci asaṃhāriyā. Tenāha ‘‘maggena āgatā’’ti. Cittīkataṭṭhādīhīti pūjanīyabhāvādīhi. Vuttaṃ hetaṃ porāṇaṭṭhakathāyaṃ. Cittīkatanti ratananti idaṃ ratanaṃ nāma loke cittīkataṃ vatthūnaṃ sahassagghanatādivasena. Yepi loke cittīkatā khattiyapaṇḍita-catumahārāja-sakka-suyāma-mahābrahmādayo, tesaṃ cittīkato tehi saraṇanti upagantabbatādivasena. Ratikaranti pītisukhāvahaṃ. Jhānaratisukhenāti duvidhenapi jhānaratisukhena. Tuletunti paricchindituṃ. Guṇapāraminti guṇānaṃ ukkaṃsapāramiṃ. Dullabho anekāni asaṅkhyeyyāni atidhāvitvāpi laddhuṃ asakkuṇeyyattā. Anomoti anūno paripuṇṇo. Tattha visesato anomasattaparibhogato tehi ‘‘sammāsambuddho bhagavā’’ti anussaritabbatoti āha ‘‘bhagavā anomo sīlenā’’tiādi.
অরিযমগ্গপঞ্ঞাযেৰ ইধ অধিপ্পেতাতি ‘‘ইধ পন দুল্লভপাতুভাৰট্ঠেন পঞ্ঞা ‘রতন’ন্তি ৰুত্ত’’ন্তি আহ। পুজ্জফলনিব্বত্তনতো, অত্তনো সন্তানং পুনাতীতি চ পুঞ্ঞচেতনা পুঞ্ঞং, সা পন যস্স উপ্পন্না, তস্সেৰ আৰেণিকতায অনঞ্ঞসাধারণত্তা কেনচিপি অনাহটা, অট্ঠকথাযং পন ‘‘অরূপত্তা’’তি ৰুত্তং।
Ariyamaggapaññāyeva idha adhippetāti ‘‘idha pana dullabhapātubhāvaṭṭhena paññā ‘ratana’nti vutta’’nti āha. Pujjaphalanibbattanato, attano santānaṃ punātīti ca puññacetanā puññaṃ, sā pana yassa uppannā, tasseva āveṇikatāya anaññasādhāraṇattā kenacipi anāhaṭā, aṭṭhakathāyaṃ pana ‘‘arūpattā’’ti vuttaṃ.
জরাসুত্তৰণ্ণনা নিট্ঠিতা।
Jarāsuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১. জরাসুত্তং • 1. Jarāsuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১. জরাসুত্তৰণ্ণনা • 1. Jarāsuttavaṇṇanā
