| Library / Tipiṭaka / តិបិដក • Tipiṭaka / មិលិន្ទបញ្ហបាឡិ • Milindapañhapāḷi |
៦. ជរសិង្គាលង្គបញ្ហោ
6. Jarasiṅgālaṅgapañho
៦. ‘‘ភន្តេ នាគសេន, ‘ជរសិង្គាលស្ស ទ្វេ អង្គានិ គហេតព្ពានី’តិ យំ វទេសិ, កតមានិ តានិ ទ្វេ អង្គានិ គហេតព្ពានី’’តិ? ‘‘យថា, មហារាជ, ជរសិង្គាលោ ភោជនំ បដិលភិត្វា អជិគុច្ឆមានោ យាវទត្ថំ អាហរយតិ, ឯវមេវ ខោ, មហារាជ, យោគិនា យោគាវចរេន ភោជនំ បដិលភិត្វា អជិគុច្ឆមានេន សរីរយាបនមត្តមេវ បរិភុញ្ជិតព្ពំ។ ឥទំ, មហារាជ, ជរសិង្គាលស្ស បឋមំ អង្គំ គហេតព្ពំ។ ភាសិតម្បេតំ, មហារាជ, ថេរេន មហាកស្សបេន –
6. ‘‘Bhante nāgasena, ‘jarasiṅgālassa dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti? ‘‘Yathā, mahārāja, jarasiṅgālo bhojanaṃ paṭilabhitvā ajigucchamāno yāvadatthaṃ āharayati, evameva kho, mahārāja, yoginā yogāvacarena bhojanaṃ paṭilabhitvā ajigucchamānena sarīrayāpanamattameva paribhuñjitabbaṃ. Idaṃ, mahārāja, jarasiṅgālassa paṭhamaṃ aṅgaṃ gahetabbaṃ. Bhāsitampetaṃ, mahārāja, therena mahākassapena –
‘‘‘សេនាសនម្ហា ឱរុយ្ហ, គាមំ បិណ្ឌាយ បាវិសិំ;
‘‘‘Senāsanamhā oruyha, gāmaṃ piṇḍāya pāvisiṃ;
ភុញ្ជន្តំ បុរិសំ កុដ្ឋិំ, សក្កច្ច នំ ឧបដ្ឋហិំ។
Bhuñjantaṃ purisaṃ kuṭṭhiṃ, sakkacca naṃ upaṭṭhahiṃ.
‘‘‘សោ មេ បក្កេន ហត្ថេន, អាលោបំ ឧបនាមយិ;
‘‘‘So me pakkena hatthena, ālopaṃ upanāmayi;
អាលោបំ បក្ខិបន្តស្ស, អង្គុលិបេត្ថ ឆិជ្ជថ។
Ālopaṃ pakkhipantassa, aṅgulipettha chijjatha.
‘‘‘កុដ្ដមូលញ្ច និស្សាយ, អាលោបំ តំ អភុញ្ជិសំ;
‘‘‘Kuṭṭamūlañca nissāya, ālopaṃ taṃ abhuñjisaṃ;
ភុញ្ជមានេ វា ភុត្តេ វា, ជេគុច្ឆំ មេ ន វិជ្ជតី’តិ។
Bhuñjamāne vā bhutte vā, jegucchaṃ me na vijjatī’ti.
‘‘បុន ចបរំ, មហារាជ, ជរសិង្គាលោ ភោជនំ បដិលភិត្វា ន វិចិនាតិ លូខំ វា បណីតំ វាតិ, ឯវមេវ ខោ, មហារាជ, យោគិនា យោគាវចរេន ភោជនំ បដិលភិត្វា ន វិចិនិតព្ពំ ‘លូខំ វា បណីតំ វា សម្បន្នំ វា អសម្បន្នំ វា’តិ, យថាលទ្ធេន សន្តុស្សិតព្ពំ។ ឥទំ, មហារាជ, ជរសិង្គាលស្ស ទុតិយំ អង្គំ គហេតព្ពំ។ ភាសិតម្បេតំ, មហារាជ, ថេរេន ឧបសេនេន វង្គន្តបុត្តេន –
‘‘Puna caparaṃ, mahārāja, jarasiṅgālo bhojanaṃ paṭilabhitvā na vicināti lūkhaṃ vā paṇītaṃ vāti, evameva kho, mahārāja, yoginā yogāvacarena bhojanaṃ paṭilabhitvā na vicinitabbaṃ ‘lūkhaṃ vā paṇītaṃ vā sampannaṃ vā asampannaṃ vā’ti, yathāladdhena santussitabbaṃ. Idaṃ, mahārāja, jarasiṅgālassa dutiyaṃ aṅgaṃ gahetabbaṃ. Bhāsitampetaṃ, mahārāja, therena upasenena vaṅgantaputtena –
‘‘‘លូខេនបិ ច សន្តុស្សេ, នាញ្ញំ បត្ថេ រសំ ពហុំ;
‘‘‘Lūkhenapi ca santusse, nāññaṃ patthe rasaṃ bahuṃ;
ជរសិង្គាលង្គបញ្ហោ ឆដ្ឋោ។
Jarasiṅgālaṅgapañho chaṭṭho.
Footnotes:
