| Tipiṭaka / तिपिटक • Tipiṭaka / संयुत्तनिकाय • Saṃyuttanikāya |
५. जन्तुसुत्तं
5. Jantusuttaṃ
१०६. एवं मे सुतं – एकं समयं सम्बहुला भिक्खू, कोसलेसु विहरन्ति हिमवन्तपस्से अरञ्ञकुटिकाय उद्धता उन्नळा चपला मुखरा विकिण्णवाचा मुट्ठस्सतिनो असम्पजाना असमाहिता विब्भन्तचित्ता पाकतिन्द्रिया।
106. Evaṃ me sutaṃ – ekaṃ samayaṃ sambahulā bhikkhū, kosalesu viharanti himavantapasse araññakuṭikāya uddhatā unnaḷā capalā mukharā vikiṇṇavācā muṭṭhassatino asampajānā asamāhitā vibbhantacittā pākatindriyā.
अथ खो जन्तु देवपुत्तो तदहुपोसथे पन्नरसे येन ते भिक्खू तेनुपसङ्कमि; उपसङ्कमित्वा ते भिक्खू गाथाहि अज्झभासि –
Atha kho jantu devaputto tadahuposathe pannarase yena te bhikkhū tenupasaṅkami; upasaṅkamitvā te bhikkhū gāthāhi ajjhabhāsi –
‘‘सुखजीविनो पुरे आसुं, भिक्खू गोतमसावका।
‘‘Sukhajīvino pure āsuṃ, bhikkhū gotamasāvakā;
लोके अनिच्चतं ञत्वा, दुक्खस्सन्तं अकंसु ते॥
Loke aniccataṃ ñatvā, dukkhassantaṃ akaṃsu te.
‘‘दुप्पोसं कत्वा अत्तानं, गामे गामणिका विय।
‘‘Dupposaṃ katvā attānaṃ, gāme gāmaṇikā viya;
भुत्वा भुत्वा निपज्जन्ति, परागारेसु मुच्छिता॥
Bhutvā bhutvā nipajjanti, parāgāresu mucchitā.
‘‘ये खो पमत्ता विहरन्ति, ते मे सन्धाय भासितं।
‘‘Ye kho pamattā viharanti, te me sandhāya bhāsitaṃ;
ये अप्पमत्ता विहरन्ति, नमो तेसं करोमह’’न्ति॥
Ye appamattā viharanti, namo tesaṃ karomaha’’nti.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / ५. जन्तुसुत्तवण्णना • 5. Jantusuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / ५. जन्तुसुत्तवण्णना • 5. Jantusuttavaṇṇanā
