| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৫. জন্তুসুত্তং
5. Jantusuttaṃ
১০৬. এৰং মে সুতং – একং সমযং সম্বহুলা ভিক্খূ, কোসলেসু ৰিহরন্তি হিমৰন্তপস্সে অরঞ্ঞকুটিকায উদ্ধতা উন্নল়া চপলা মুখরা ৰিকিণ্ণৰাচা মুট্ঠস্সতিনো অসম্পজানা অসমাহিতা ৰিব্ভন্তচিত্তা পাকতিন্দ্রিযা।
106. Evaṃ me sutaṃ – ekaṃ samayaṃ sambahulā bhikkhū, kosalesu viharanti himavantapasse araññakuṭikāya uddhatā unnaḷā capalā mukharā vikiṇṇavācā muṭṭhassatino asampajānā asamāhitā vibbhantacittā pākatindriyā.
অথ খো জন্তু দেৰপুত্তো তদহুপোসথে পন্নরসে যেন তে ভিক্খূ তেনুপসঙ্কমি; উপসঙ্কমিত্ৰা তে ভিক্খূ গাথাহি অজ্ঝভাসি –
Atha kho jantu devaputto tadahuposathe pannarase yena te bhikkhū tenupasaṅkami; upasaṅkamitvā te bhikkhū gāthāhi ajjhabhāsi –
‘‘সুখজীৰিনো পুরে আসুং, ভিক্খূ গোতমসাৰকা।
‘‘Sukhajīvino pure āsuṃ, bhikkhū gotamasāvakā;
লোকে অনিচ্চতং ঞত্ৰা, দুক্খস্সন্তং অকংসু তে॥
Loke aniccataṃ ñatvā, dukkhassantaṃ akaṃsu te.
‘‘দুপ্পোসং কত্ৰা অত্তানং, গামে গামণিকা ৰিয।
‘‘Dupposaṃ katvā attānaṃ, gāme gāmaṇikā viya;
ভুত্ৰা ভুত্ৰা নিপজ্জন্তি, পরাগারেসু মুচ্ছিতা॥
Bhutvā bhutvā nipajjanti, parāgāresu mucchitā.
‘‘যে খো পমত্তা ৰিহরন্তি, তে মে সন্ধায ভাসিতং।
‘‘Ye kho pamattā viharanti, te me sandhāya bhāsitaṃ;
যে অপ্পমত্তা ৰিহরন্তি, নমো তেসং করোমহ’’ন্তি॥
Ye appamattā viharanti, namo tesaṃ karomaha’’nti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৫. জন্তুসুত্তৰণ্ণনা • 5. Jantusuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৫. জন্তুসুত্তৰণ্ণনা • 5. Jantusuttavaṇṇanā
