| Library / Tipiṭaka / តិបិដក • Tipiṭaka / បាចិត្យាទិយោជនាបាឡិ • Pācityādiyojanāpāḷi |
៩. ជន្តាឃរវត្តាទិកថា
9. Jantāgharavattādikathā
៣៧១. ជន្តាឃរវត្តេ ឯវំ វិនិច្ឆយោ វេទិតព្ពោតិ យោជនា។ ពហិជគតីតិ ពហិអាលិន្ទោ។
371. Jantāgharavatte evaṃ vinicchayo veditabboti yojanā. Bahijagatīti bahiālindo.
៣៧៣. អាចមនវត្ថុស្មិំ ឯវមត្ថោ វេទិតព្ពោតិ យោជនា។ នីហរិត្វាតិ ឧទកំ នីហរិត្វា។ អាចមិតព្ពន្តិ ធោវិតព្ពំ។ ‘‘អាបុព្ពោ ចមុ ធោវនេ’’តិ ហិ ធាតុបាឋេសុ វុត្តំ។ ឥទំ អតិវិវដន្តិ ឥទំ ឋានំ អតិវិវដំ, ន កេនចិ បដិច្ឆន្នន្តិ អត្ថោ។ ឧទកំ អលភន្តស្សេវាតិ ឧទកំ អលភន្តេយេវ។
373. Ācamanavatthusmiṃ evamattho veditabboti yojanā. Nīharitvāti udakaṃ nīharitvā. Ācamitabbanti dhovitabbaṃ. ‘‘Āpubbo camu dhovane’’ti hi dhātupāṭhesu vuttaṃ. Idaṃ ativivaṭanti idaṃ ṭhānaṃ ativivaṭaṃ, na kenaci paṭicchannanti attho. Udakaṃ alabhantassevāti udakaṃ alabhanteyeva.
៣៧៤. វច្ចកុដិវត្តេ ឯវំ វិនិច្ឆយោ វេទិតព្ពោតិ យោជនា។ អយន្តិ ទន្តកដ្ឋំ ខាទតោ វច្ចករណំ។ សព្ពត្ថេវាតិ សព្ពស្មិំ ឯវ ឋានេ។ ‘‘ន ផរុសេន កដ្ឋេនា’’តិ ឯត្ថ ន កេវលំ ខរកដ្ឋមេវ, ផាលិតកដ្ឋាទយោបិ ឆវិអវលេខនកដ្ឋា ផរុសាយេវ នាមាតិ ទស្សេន្តោ អាហ ‘‘ផាលិតកដ្ឋេន វា’’តិអាទិ។ បវិដ្ឋស្សាតិ វច្ចកុដិំ បវិដ្ឋស្ស។
374. Vaccakuṭivatte evaṃ vinicchayo veditabboti yojanā. Ayanti dantakaṭṭhaṃ khādato vaccakaraṇaṃ. Sabbatthevāti sabbasmiṃ eva ṭhāne. ‘‘Na pharusena kaṭṭhenā’’ti ettha na kevalaṃ kharakaṭṭhameva, phālitakaṭṭhādayopi chaviavalekhanakaṭṭhā pharusāyeva nāmāti dassento āha ‘‘phālitakaṭṭhena vā’’tiādi. Paviṭṭhassāti vaccakuṭiṃ paviṭṭhassa.
សព្ពសាធារណដ្ឋានន្តិ សព្ពេសំ ភិក្ខូនំ, សព្ពេហិ វា សាធារណំ វច្ចកុដិសង្ខាតំ ឋានំ។ តត្រាតិ តស្មិំ សព្ពសាធារណេ ឋានេ។ និពទ្ធគមនត្ថាយាតិ អត្តនោ និពទ្ធគមនត្ថាយ កតំ យំ ឋានំ វា យំ បុគ្គលិកដ្ឋានំ វា ហោតីតិ យោជនា។
Sabbasādhāraṇaṭṭhānanti sabbesaṃ bhikkhūnaṃ, sabbehi vā sādhāraṇaṃ vaccakuṭisaṅkhātaṃ ṭhānaṃ. Tatrāti tasmiṃ sabbasādhāraṇe ṭhāne. Nibaddhagamanatthāyāti attano nibaddhagamanatthāya kataṃ yaṃ ṭhānaṃ vā yaṃ puggalikaṭṭhānaṃ vā hotīti yojanā.
ឧហតាតិ ឯត្ថ ឧបុព្ពោ ហទធាតូតិ ទស្សេន្តោ អាហ ‘‘ឧហទិតា’’តិ។ ‘‘ហទ ករីសោស្សគ្គេ’’តិ ធាតុបាឋេសុ (បាណិនី ៩៧៧ ធាតុបាឋេ; សទ្ទនីតិធាតុមាលាយំ ១៥ ទការន្តធាតុ) វុត្តត្តា វច្ចកូបតោ ពហិ ករីសស្ស ឱស្សជ្ជនន្តិ អាហ ‘‘ពហិ វច្ចមក្ខិតា’’តិ។ ធោវិតព្ពាតិ ឧទកេន ធោវិតព្ពា។ ឯតម្បីតិ ឧទកស្ស អវិជ្ជមានម្បិ។ សព្ពត្ថាតិ សព្ពស្មិំ វត្តក្ខន្ធកេ។
Uhatāti ettha upubbo hadadhātūti dassento āha ‘‘uhaditā’’ti. ‘‘Hada karīsossagge’’ti dhātupāṭhesu (pāṇinī 977 dhātupāṭhe; saddanītidhātumālāyaṃ 15 dakārantadhātu) vuttattā vaccakūpato bahi karīsassa ossajjananti āha ‘‘bahi vaccamakkhitā’’ti. Dhovitabbāti udakena dhovitabbā. Etampīti udakassa avijjamānampi. Sabbatthāti sabbasmiṃ vattakkhandhake.
ឥតិ វត្តក្ខន្ធកវណ្ណនាយ យោជនា សមត្តា។
Iti vattakkhandhakavaṇṇanāya yojanā samattā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / ចូឡវគ្គបាឡិ • Cūḷavaggapāḷi
៩. ជន្តាឃរវត្តកថា • 9. Jantāgharavattakathā
១០. វច្ចកុដិវត្តកថា • 10. Vaccakuṭivattakathā
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / ចូឡវគ្គ-អដ្ឋកថា • Cūḷavagga-aṭṭhakathā / ជន្តាឃរវត្តាទិកថា • Jantāgharavattādikathā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / វច្ចកុដិវត្តកថាវណ្ណនា • Vaccakuṭivattakathāvaṇṇanā
