| Library / Tipiṭaka / তিপিটক • Tipiṭaka / চূল়ৰগ্গ-অট্ঠকথা • Cūḷavagga-aṭṭhakathā |
জন্তাঘরৰত্তাদিকথা
Jantāgharavattādikathā
৩৭১. জন্তাঘরৰত্তে – পরিভণ্ডন্তি বহিজগতি।
371. Jantāgharavatte – paribhaṇḍanti bahijagati.
৩৭৩. আচমনৰত্থুস্মিং – সতি উদকেতি এত্থ সচে উদকং অত্থি, পটিচ্ছন্নট্ঠানং পন নত্থি, ভাজনেন নীহরিত্ৰা আচমিতব্বং। ভাজনে অসতি পত্তেন নীহরিতব্বং। পত্তেপি অসতি অসন্তং নাম হোতি। ‘‘ইদং অতিৰিৰটং পুরতো অঞ্ঞং উদকং ভৰিস্সতী’’তি গতস্স উদকং অলভন্তস্সেৰ ভিক্খাচারৰেলা হোতি, কট্ঠেন ৰা কেনচি ৰা পুঞ্ছিত্ৰা গন্তব্বং, ভুঞ্জিতুম্পি অনুমোদনম্পি কাতুং ৰট্টতি। আগতপটিপাটিযাতি ৰচ্চকুটিযং পস্সাৰট্ঠানে ন্হানতিত্থেতি তীসুপি আগতপটিপাটিযেৰ পমাণং।
373. Ācamanavatthusmiṃ – sati udaketi ettha sace udakaṃ atthi, paṭicchannaṭṭhānaṃ pana natthi, bhājanena nīharitvā ācamitabbaṃ. Bhājane asati pattena nīharitabbaṃ. Pattepi asati asantaṃ nāma hoti. ‘‘Idaṃ ativivaṭaṃ purato aññaṃ udakaṃ bhavissatī’’ti gatassa udakaṃ alabhantasseva bhikkhācāravelā hoti, kaṭṭhena vā kenaci vā puñchitvā gantabbaṃ, bhuñjitumpi anumodanampi kātuṃ vaṭṭati. Āgatapaṭipāṭiyāti vaccakuṭiyaṃ passāvaṭṭhāne nhānatittheti tīsupi āgatapaṭipāṭiyeva pamāṇaṃ.
৩৭৪. ৰচ্চকুটিৰত্তে – ন দন্তকট্ঠং খাদন্তেনাতি অযং ৰচ্চকুটিযাপি অৰচ্চকুটিযাপি সব্বত্থেৰ পটিক্খেপো। ন ফরুসেন কট্ঠেনাতি ফালিতকট্ঠেন ৰা খরেন ৰা গণ্ঠিকেন ৰা কণ্টকেন ৰা সুসিরেন ৰা পূতিনা ৰা ন অৰলেখিতব্বং। অৰলেখনকট্ঠং পন অগ্গহেত্ৰা পৰিট্ঠস্স আপত্তি নত্থি।
374. Vaccakuṭivatte – na dantakaṭṭhaṃ khādantenāti ayaṃ vaccakuṭiyāpi avaccakuṭiyāpi sabbattheva paṭikkhepo. Na pharusena kaṭṭhenāti phālitakaṭṭhena vā kharena vā gaṇṭhikena vā kaṇṭakena vā susirena vā pūtinā vā na avalekhitabbaṃ. Avalekhanakaṭṭhaṃ pana aggahetvā paviṭṭhassa āpatti natthi.
ন আচমনসরাৰকেতি সব্বসাধারণট্ঠানং সন্ধাযেতং ৰুত্তং। তত্র হি অঞ্ঞে অঞ্ঞে আগচ্ছন্তি, তস্মা উদকং ন সেসেতব্বং। যং পন সঙ্ঘিকেপি ৰিহারে একদেসে নিবদ্ধগমনত্থায কতং ঠানং হোতি পুগ্গলিকট্ঠানং ৰা, তস্মিং ৰট্টতি। ৰিরেচনং পিৰিত্ৰা পুনপ্পুনং পৰিসন্তস্সাপি ৰট্টতিযেৰ।
Na ācamanasarāvaketi sabbasādhāraṇaṭṭhānaṃ sandhāyetaṃ vuttaṃ. Tatra hi aññe aññe āgacchanti, tasmā udakaṃ na sesetabbaṃ. Yaṃ pana saṅghikepi vihāre ekadese nibaddhagamanatthāya kataṃ ṭhānaṃ hoti puggalikaṭṭhānaṃ vā, tasmiṃ vaṭṭati. Virecanaṃ pivitvā punappunaṃ pavisantassāpi vaṭṭatiyeva.
ঊহতাতি ঊহদিতা; বহি ৰচ্চমক্খিতাতি অত্থো। ধোৰিতব্বাতি উদকং আহরিত্ৰা ধোৰিতব্বা। উদকং অত্থি, ভাজনং নত্থি, অসন্তং নাম হোতি। ভাজনং অত্থি, উদকং নত্থি, এতম্পি অসন্তং। উভযে পন অসতি অসন্তমেৰ, কট্ঠেন ৰা কেনচি ৰা পুঞ্ছিত্ৰা গন্তব্বং। সেসং সব্বত্থ উত্তানমেৰাতি।
Ūhatāti ūhaditā; bahi vaccamakkhitāti attho. Dhovitabbāti udakaṃ āharitvā dhovitabbā. Udakaṃ atthi, bhājanaṃ natthi, asantaṃ nāma hoti. Bhājanaṃ atthi, udakaṃ natthi, etampi asantaṃ. Ubhaye pana asati asantameva, kaṭṭhena vā kenaci vā puñchitvā gantabbaṃ. Sesaṃ sabbattha uttānamevāti.
জন্তাঘরৰত্তাদিকথা নিট্ঠিতা।
Jantāgharavattādikathā niṭṭhitā.
ৰত্তক্খন্ধকৰণ্ণনা নিট্ঠিতা।
Vattakkhandhakavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi
৯. জন্তাঘরৰত্তকথা • 9. Jantāgharavattakathā
১০. ৰচ্চকুটিৰত্তকথা • 10. Vaccakuṭivattakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৰচ্চকুটিৰত্তকথাৰণ্ণনা • Vaccakuṭivattakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / পিণ্ডচারিকৰত্তকথাদিৰণ্ণনা • Piṇḍacārikavattakathādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৯. জন্তাঘরৰত্তাদিকথা • 9. Jantāgharavattādikathā
