| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၁၀. ဇနပဒကလ္ယာဏီသုတ္တဝဏ္ဏနာ
10. Janapadakalyāṇīsuttavaṇṇanā
၃၈၆. ဒသမေ ဇနပဒကလ္ယာဏီတိ ဇနပဒမ္ဟိ ကလ္ယာဏီ ဥတ္တမာ ဆသရီရဒောသရဟိတာ ပဉ္စကလ္ယာဏသမန္နာဂတာ။ သာ ဟိ ယသ္မာ နာတိဒီဃာ နာတိရသ္သာ, နာတိကိသာ နာတိထူလာ, နာတိကာဠာ နာစ္စောဒာတာ, အတိက္ကန္တာ, မာနုသဝဏ္ဏံ အပ္ပတ္တာ ဒိဗ္ဗဝဏ္ဏံ, တသ္မာ ဆသရီရဒောသရဟိတာ။ ဆဝိကလ္ယာဏံ, မံသကလ္ယာဏံ, န္ဟာရုကလ္ယာဏံ, အဋ္ဌိကလ္ယာဏံ, ဝယကလ္ယာဏန္တိ ဣမေဟိ ပန ကလ္ယာဏေဟိ သမန္နာဂတတ္တာ ပဉ္စကလ္ယာဏေဟိ သမန္နာဂတာ နာမ။ တသ္သာ ဟိ အာဂန္တုကောဘာသကိစ္စံ နတ္ထိ, အတ္တနော သရီရောဘာသေနေဝ ဒ္ဝာဒသဟတ္ထဋ္ဌာနေ အာလောကံ ကရောတိ, ပိယင္ဂုသာမာ ဝာ ဟောတိ, သုဝဏ္ဏသာမာ ဝာ, အယမသ္သာ ဆဝိကလ္ယာဏတာ။ စတ္တာရော ပနသ္သာ ဟတ္ထပာဒာ မုခပရိယောသာနဉ္စ လာခာရသပရိကမ္မကတံ ဝိယ ရတ္တပဝာဠရတ္တကမ္ဗလသဒိသံ ဟောတိ, အယမသ္သာ မံသကလ္ယာဏတာ။ ဝီသတိ ပန နခပတ္တာနိ မံသတော အမုတ္တဋ္ဌာနေ လာခာရသပူရိတာနိ ဝိယ, မုတ္တဋ္ဌာနေ ခီရဓာရာသဒိသာနိ, ဟောန္တိ အယမသ္သာ န္ဟာရုကလ္ယာဏကတာ။ ဒ္ဝတ္တိံသ ဒန္တာ သုဖုသိတာ သုဓောတဝဇိရပန္တိ ဝိယ ခာယန္တိ, အယမသ္သာ အဋ္ဌိကလ္ယာဏတာ။ ဝီသတိဝသ္သသတိကာပိ ပန သမာနာ သောဠသဝသ္သုဒ္ဒေသိကာ ဝိယ ဟောတိ နိပ္ပလိတာ, အယမသ္သာ ဝယကလ္ယာဏတာ။
386. Dasame janapadakalyāṇīti janapadamhi kalyāṇī uttamā chasarīradosarahitā pañcakalyāṇasamannāgatā. Sā hi yasmā nātidīghā nātirassā, nātikisā nātithūlā, nātikāḷā nāccodātā, atikkantā, mānusavaṇṇaṃ appattā dibbavaṇṇaṃ, tasmā chasarīradosarahitā. Chavikalyāṇaṃ, maṃsakalyāṇaṃ, nhārukalyāṇaṃ, aṭṭhikalyāṇaṃ, vayakalyāṇanti imehi pana kalyāṇehi samannāgatattā pañcakalyāṇehi samannāgatā nāma. Tassā hi āgantukobhāsakiccaṃ natthi, attano sarīrobhāseneva dvādasahatthaṭṭhāne ālokaṃ karoti, piyaṅgusāmā vā hoti, suvaṇṇasāmā vā, ayamassā chavikalyāṇatā. Cattāro panassā hatthapādā mukhapariyosānañca lākhārasaparikammakataṃ viya rattapavāḷarattakambalasadisaṃ hoti, ayamassā maṃsakalyāṇatā. Vīsati pana nakhapattāni maṃsato amuttaṭṭhāne lākhārasapūritāni viya, muttaṭṭhāne khīradhārāsadisāni, honti ayamassā nhārukalyāṇakatā. Dvattiṃsa dantā suphusitā sudhotavajirapanti viya khāyanti, ayamassā aṭṭhikalyāṇatā. Vīsativassasatikāpi pana samānā soḷasavassuddesikā viya hoti nippalitā, ayamassā vayakalyāṇatā.
ပရမပာသာဝိနီတိ ဧတ္ထ ပသဝနံ ပသာဝော, ပဝတ္တီတိ အတ္ထော။ ပသာဝော ဧဝ ပာသာဝော။ ပရမော ပာသာဝော ပရမပာသာဝော, သော အသ္သာ အတ္ထီတိ ပရမပာသာဝိနီ။ နစ္စေ စ ဂီတေ စ ဥတ္တမပဝတ္တိ သေဋ္ဌကိရိယာ, ဥတ္တမမေဝ နစ္စံ နစ္စတိ, ဂီတံ ဝာ ဂာယတီတိ ဝုတ္တံ ဟောတိ။ သေသံ သဗ္ဗတ္ထ ဥတ္တာနတ္ထမေဝ။ ဣမေသု ပန ဒ္ဝီသု သုတ္တေသု ပုဗ္ဗဘာဂဝိပသ္သနာဝ ကထိတာတိ။
Paramapāsāvinīti ettha pasavanaṃ pasāvo, pavattīti attho. Pasāvo eva pāsāvo. Paramo pāsāvo paramapāsāvo, so assā atthīti paramapāsāvinī. Nacce ca gīte ca uttamapavatti seṭṭhakiriyā, uttamameva naccaṃ naccati, gītaṃ vā gāyatīti vuttaṃ hoti. Sesaṃ sabbattha uttānatthameva. Imesu pana dvīsu suttesu pubbabhāgavipassanāva kathitāti.
နာလန္ဒဝဂ္ဂော ဒုတိယော။
Nālandavaggo dutiyo.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁၀. ဇနပဒကလ္ယာဏီသုတ္တံ • 10. Janapadakalyāṇīsuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁၀. ဇနပဒကလ္ယာဏီသုတ္တဝဏ္ဏနာ • 10. Janapadakalyāṇīsuttavaṇṇanā
