| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
৮. জলূকঙ্গপঞ্হো
8. Jalūkaṅgapañho
৮. ‘‘ভন্তে নাগসেন, ‘জলূকায একং অঙ্গং গহেতব্ব’ন্তি যং ৰদেসি, কতমং তং একং অঙ্গং গহেতব্ব’’ন্তি? ‘‘যথা, মহারাজ, জলূকা যত্থ অল্লীযতি, তত্থেৰ দল়্হং অল্লীযিত্ৰা রুহিরং পিৰতি, এৰমেৰ খো, মহারাজ, যোগিনা যোগাৰচরেন যস্মিং আরম্মণে চিত্তং অল্লীযতি, তং আরম্মণং ৰণ্ণতো চ সণ্ঠানতো চ দিসতো চ ওকাসতো চ পরিচ্ছেদতো চ লিঙ্গতো চ নিমিত্ততো চ দল়্হং পতিট্ঠাপেত্ৰা তেনেৰারম্মণেন ৰিমুত্তিরসমসেচনকং পাতব্বং। ইদং, মহারাজ, জলূকায একং অঙ্গং গহেতব্বং। ভাসিতম্পেতং, মহারাজ, থেরেন অনুরুদ্ধেন –
8. ‘‘Bhante nāgasena, ‘jalūkāya ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, jalūkā yattha allīyati, tattheva daḷhaṃ allīyitvā ruhiraṃ pivati, evameva kho, mahārāja, yoginā yogāvacarena yasmiṃ ārammaṇe cittaṃ allīyati, taṃ ārammaṇaṃ vaṇṇato ca saṇṭhānato ca disato ca okāsato ca paricchedato ca liṅgato ca nimittato ca daḷhaṃ patiṭṭhāpetvā tenevārammaṇena vimuttirasamasecanakaṃ pātabbaṃ. Idaṃ, mahārāja, jalūkāya ekaṃ aṅgaṃ gahetabbaṃ. Bhāsitampetaṃ, mahārāja, therena anuruddhena –
‘‘‘পরিসুদ্ধেন চিত্তেন, আরম্মণে পতিট্ঠায।
‘‘‘Parisuddhena cittena, ārammaṇe patiṭṭhāya;
তেন চিত্তেন পাতব্বং, ৰিমুত্তিরসমসেচন’’’ন্তি॥
Tena cittena pātabbaṃ, vimuttirasamasecana’’’nti.
জলূকঙ্গপঞ্হো অট্ঠমো।
Jalūkaṅgapañho aṭṭhamo.
