| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
៩. ឥន្ទ្រិយសម្បន្នសុត្តំ
9. Indriyasampannasuttaṃ
១៥៤. អថ ខោ អញ្ញតរោ ភិក្ខុ យេន ភគវា តេនុបសង្កមិ…បេ.… ឯកមន្តំ និសិន្នោ ខោ សោ ភិក្ខុ ភគវន្តំ ឯតទវោច – ‘‘‘ឥន្ទ្រិយសម្បន្នោ, ឥន្ទ្រិយសម្បន្នោ’តិ, ភន្តេ, វុច្ចតិ។ កិត្តាវតា នុ ខោ, ភន្តេ, ឥន្ទ្រិយសម្បន្នោ ហោតី’’តិ?
154. Atha kho aññataro bhikkhu yena bhagavā tenupasaṅkami…pe… ekamantaṃ nisinno kho so bhikkhu bhagavantaṃ etadavoca – ‘‘‘indriyasampanno, indriyasampanno’ti, bhante, vuccati. Kittāvatā nu kho, bhante, indriyasampanno hotī’’ti?
‘‘ចក្ខុន្ទ្រិយេ ចេ, ភិក្ខុ, ឧទយព្ពយានុបស្សី វិហរន្តោ ចក្ខុន្ទ្រិយេ និព្ពិន្ទតិ…បេ.… ជិវ្ហិន្ទ្រិយេ ចេ, ភិក្ខុ, ឧទយព្ពយានុបស្សី វិហរន្តោ ជិវ្ហិន្ទ្រិយេ និព្ពិន្ទតិ…បេ.… មនិន្ទ្រិយេ ចេ, ភិក្ខុ, ឧទយព្ពយានុបស្សី វិហរន្តោ មនិន្ទ្រិយេ និព្ពិន្ទតិ។ និព្ពិន្ទំ វិរជ្ជតិ…បេ.… វិមុត្តស្មិំ វិមុត្តមិតិ ញាណំ ហោតិ។ ‘ខីណា ជាតិ, វុសិតំ ព្រហ្មចរិយំ, កតំ ករណីយំ, នាបរំ ឥត្ថត្តាយា’តិ បជានាតិ។ ឯត្តាវតា ខោ, ភិក្ខុ, ឥន្ទ្រិយសម្បន្នោ ហោតី’’តិ។ នវមំ។
‘‘Cakkhundriye ce, bhikkhu, udayabbayānupassī viharanto cakkhundriye nibbindati…pe… jivhindriye ce, bhikkhu, udayabbayānupassī viharanto jivhindriye nibbindati…pe… manindriye ce, bhikkhu, udayabbayānupassī viharanto manindriye nibbindati. Nibbindaṃ virajjati…pe… vimuttasmiṃ vimuttamiti ñāṇaṃ hoti. ‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānāti. Ettāvatā kho, bhikkhu, indriyasampanno hotī’’ti. Navamaṃ.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៩-១០. ឥន្ទ្រិយសម្បន្នសុត្តាទិវណ្ណនា • 9-10. Indriyasampannasuttādivaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ៩-១០. ឥន្ទ្រិយសម្បន្នសុត្តាទិវណ្ណនា • 9-10. Indriyasampannasuttādivaṇṇanā
