| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi |
၂. ဣန္ဒ္ရိယနိဒ္ဒေသော
2. Indriyaniddeso
၂၇. သဒ္ဓိန္ဒ္ရိယသ္သ ပဉ္စ ဝိဝေကာ, ပဉ္စ ဝိရာဂာ, ပဉ္စ နိရောဓာ, ပဉ္စ ဝောသ္သဂ္ဂာ, ဒ္ဝာဒသ နိသ္သယာ။ ဝီရိယိန္ဒ္ရိယသ္သ။ပေ.။ သတိန္ဒ္ရိယသ္သ။ သမာဓိန္ဒ္ရိယသ္သ။ ပညိန္ဒ္ရိယသ္သ ပဉ္စ ဝိဝေကာ, ပဉ္စ ဝိရာဂာ, ပဉ္စ နိရောဓာ, ပဉ္စ ဝောသ္သဂ္ဂာ, ဒ္ဝာဒသ နိသ္သယာ။
27. Saddhindriyassa pañca vivekā, pañca virāgā, pañca nirodhā, pañca vossaggā, dvādasa nissayā. Vīriyindriyassa…pe… satindriyassa… samādhindriyassa… paññindriyassa pañca vivekā, pañca virāgā, pañca nirodhā, pañca vossaggā, dvādasa nissayā.
သဒ္ဓိန္ဒ္ရိယသ္သ ကတမေ ပဉ္စ ဝိဝေကာ? ဝိက္ခမ္ဘနဝိဝေကော, တဒင္ဂဝိဝေကော, သမုစ္ဆေဒဝိဝေကော, ပဋိပ္ပသ္သဒ္ဓိဝိဝေကော, နိသ္သရဏဝိဝေကော။ ဝိက္ခမ္ဘနဝိဝေကော စ နီဝရဏာနံ ပဌမဇ္ဈာနံ ဘာဝယတော, တဒင္ဂဝိဝေကော စ ဒိဋ္ဌိဂတာနံ နိဗ္ဗေဓဘာဂိယံ သမာဓိံ ဘာဝယတော, သမုစ္ဆေဒဝိဝေကော စ လောကုတ္တရံ ခယဂာမိမဂ္ဂံ ဘာဝယတော, ပဋိပ္ပသ္သဒ္ဓိဝိဝေကော စ ဖလက္ခဏေ, နိသ္သရဏဝိဝေကော စ နိရောဓော နိဗ္ဗာနံ။ သဒ္ဓိန္ဒ္ရိယသ္သ ဣမေ ပဉ္စ ဝိဝေကာ။ ဣမေသု ပဉ္စသု ဝိဝေကေသု ဆန္ဒဇာတော ဟောတိ သဒ္ဓာဓိမုတ္တော, စိတ္တဉ္စသ္သ သ္ဝာဓိဋ္ဌိတံ။ပေ.။ သဒ္ဓိန္ဒ္ရိယသ္သ ဣမေ ပဉ္စ ဝိဝေကာ, ပဉ္စ ဝိရာဂာ, ပဉ္စ နိရောဓာ, ပဉ္စ ဝောသ္သဂ္ဂာ, ဒ္ဝာဒသ နိသ္သယာ။
Saddhindriyassa katame pañca vivekā? Vikkhambhanaviveko, tadaṅgaviveko, samucchedaviveko, paṭippassaddhiviveko, nissaraṇaviveko. Vikkhambhanaviveko ca nīvaraṇānaṃ paṭhamajjhānaṃ bhāvayato, tadaṅgaviveko ca diṭṭhigatānaṃ nibbedhabhāgiyaṃ samādhiṃ bhāvayato, samucchedaviveko ca lokuttaraṃ khayagāmimaggaṃ bhāvayato, paṭippassaddhiviveko ca phalakkhaṇe, nissaraṇaviveko ca nirodho nibbānaṃ. Saddhindriyassa ime pañca vivekā. Imesu pañcasu vivekesu chandajāto hoti saddhādhimutto, cittañcassa svādhiṭṭhitaṃ…pe… saddhindriyassa ime pañca vivekā, pañca virāgā, pañca nirodhā, pañca vossaggā, dvādasa nissayā.
ဝီရိယိန္ဒ္ရိယသ္သ။ပေ.။ သတိန္ဒ္ရိယသ္သ။ပေ.။ သမာဓိန္ဒ္ရိယသ္သ။ ပညိန္ဒ္ရိယသ္သ ကတမေ ပဉ္စ ဝိဝေကာ? ဝိက္ခမ္ဘနဝိဝေကော, တဒင္ဂဝိဝေကော, သမုစ္ဆေဒဝိဝေကော, ပဋိပ္ပသ္သဒ္ဓိဝိဝေကော, နိသ္သရဏဝိဝေကော။ပေ.။ ပညိန္ဒ္ရိယသ္သ ဣမေ ပဉ္စ ဝိဝေကာ, ပဉ္စ ဝိရာဂာ, ပဉ္စ နိရောဓာ , ပဉ္စ ဝောသ္သဂ္ဂာ, ဒ္ဝာဒသ နိသ္သယာတိ။
Vīriyindriyassa…pe… satindriyassa…pe… samādhindriyassa… paññindriyassa katame pañca vivekā? Vikkhambhanaviveko, tadaṅgaviveko, samucchedaviveko, paṭippassaddhiviveko, nissaraṇaviveko…pe… paññindriyassa ime pañca vivekā, pañca virāgā, pañca nirodhā , pañca vossaggā, dvādasa nissayāti.
ဝိဝေကကထာ နိဋ္ဌိတာ။
Vivekakathā niṭṭhitā.
