| Library / Tipiṭaka / តិបិដក • Tipiṭaka / បដិសម្ភិទាមគ្គបាឡិ • Paṭisambhidāmaggapāḷi |
២. ឥន្ទ្រិយនិទ្ទេសោ
2. Indriyaniddeso
២៧. សទ្ធិន្ទ្រិយស្ស បញ្ច វិវេកា, បញ្ច វិរាគា, បញ្ច និរោធា, បញ្ច វោស្សគ្គា, ទ្វាទស និស្សយា។ វីរិយិន្ទ្រិយស្ស…បេ.… សតិន្ទ្រិយស្ស… សមាធិន្ទ្រិយស្ស… បញ្ញិន្ទ្រិយស្ស បញ្ច វិវេកា, បញ្ច វិរាគា, បញ្ច និរោធា, បញ្ច វោស្សគ្គា, ទ្វាទស និស្សយា។
27. Saddhindriyassa pañca vivekā, pañca virāgā, pañca nirodhā, pañca vossaggā, dvādasa nissayā. Vīriyindriyassa…pe… satindriyassa… samādhindriyassa… paññindriyassa pañca vivekā, pañca virāgā, pañca nirodhā, pañca vossaggā, dvādasa nissayā.
សទ្ធិន្ទ្រិយស្ស កតមេ បញ្ច វិវេកា? វិក្ខម្ភនវិវេកោ, តទង្គវិវេកោ, សមុច្ឆេទវិវេកោ, បដិប្បស្សទ្ធិវិវេកោ, និស្សរណវិវេកោ។ វិក្ខម្ភនវិវេកោ ច នីវរណានំ បឋមជ្ឈានំ ភាវយតោ, តទង្គវិវេកោ ច ទិដ្ឋិគតានំ និព្ពេធភាគិយំ សមាធិំ ភាវយតោ, សមុច្ឆេទវិវេកោ ច លោកុត្តរំ ខយគាមិមគ្គំ ភាវយតោ, បដិប្បស្សទ្ធិវិវេកោ ច ផលក្ខណេ, និស្សរណវិវេកោ ច និរោធោ និព្ពានំ។ សទ្ធិន្ទ្រិយស្ស ឥមេ បញ្ច វិវេកា។ ឥមេសុ បញ្ចសុ វិវេកេសុ ឆន្ទជាតោ ហោតិ សទ្ធាធិមុត្តោ, ចិត្តញ្ចស្ស ស្វាធិដ្ឋិតំ…បេ.… សទ្ធិន្ទ្រិយស្ស ឥមេ បញ្ច វិវេកា, បញ្ច វិរាគា, បញ្ច និរោធា, បញ្ច វោស្សគ្គា, ទ្វាទស និស្សយា។
Saddhindriyassa katame pañca vivekā? Vikkhambhanaviveko, tadaṅgaviveko, samucchedaviveko, paṭippassaddhiviveko, nissaraṇaviveko. Vikkhambhanaviveko ca nīvaraṇānaṃ paṭhamajjhānaṃ bhāvayato, tadaṅgaviveko ca diṭṭhigatānaṃ nibbedhabhāgiyaṃ samādhiṃ bhāvayato, samucchedaviveko ca lokuttaraṃ khayagāmimaggaṃ bhāvayato, paṭippassaddhiviveko ca phalakkhaṇe, nissaraṇaviveko ca nirodho nibbānaṃ. Saddhindriyassa ime pañca vivekā. Imesu pañcasu vivekesu chandajāto hoti saddhādhimutto, cittañcassa svādhiṭṭhitaṃ…pe… saddhindriyassa ime pañca vivekā, pañca virāgā, pañca nirodhā, pañca vossaggā, dvādasa nissayā.
វីរិយិន្ទ្រិយស្ស…បេ.… សតិន្ទ្រិយស្ស…បេ.… សមាធិន្ទ្រិយស្ស… បញ្ញិន្ទ្រិយស្ស កតមេ បញ្ច វិវេកា? វិក្ខម្ភនវិវេកោ, តទង្គវិវេកោ, សមុច្ឆេទវិវេកោ, បដិប្បស្សទ្ធិវិវេកោ, និស្សរណវិវេកោ…បេ.… បញ្ញិន្ទ្រិយស្ស ឥមេ បញ្ច វិវេកា, បញ្ច វិរាគា, បញ្ច និរោធា , បញ្ច វោស្សគ្គា, ទ្វាទស និស្សយាតិ។
Vīriyindriyassa…pe… satindriyassa…pe… samādhindriyassa… paññindriyassa katame pañca vivekā? Vikkhambhanaviveko, tadaṅgaviveko, samucchedaviveko, paṭippassaddhiviveko, nissaraṇaviveko…pe… paññindriyassa ime pañca vivekā, pañca virāgā, pañca nirodhā , pañca vossaggā, dvādasa nissayāti.
វិវេកកថា និដ្ឋិតា។
Vivekakathā niṭṭhitā.
