| Library / Tipiṭaka / д̇ибидага • Tipiṭaka / бадисамбхид̣̇аамаг̇г̇абаал̣и • Paṭisambhidāmaggapāḷi |
50. ид̣̇д̇хивид̇хан̃аан̣анид̣̇д̣̇зсо
50. Iddhividhañāṇaniddeso
101. гат̇ам̣ гааяамби жид̇д̇амби згававад̇т̇аанад̇аа сукасан̃н̃ан̃жа лахусан̃н̃ан̃жа ад̇хидтаанавасзна иж̇жханадтз бан̃н̃аа ид̣̇д̇хивид̇хз н̃аан̣ам̣? ид̇ха бхигку чанд̣̇асамаад̇хибад̇хаанасан̇каарасаманнааг̇ад̇ам̣ ид̣̇д̇хибаад̣̇ам̣ бхаавзд̇и, вийрияасамаад̇хибад̇хаанасан̇каарасаманнааг̇ад̇ам̣ ид̣̇д̇хибаад̣̇ам̣ бхаавзд̇и, жид̇д̇асамаад̇хибад̇хаанасан̇каарасаманнааг̇ад̇ам̣ ид̣̇д̇хибаад̣̇ам̣ бхаавзд̇и, виймам̣саасамаад̇хибад̇хаанасан̇каарасаманнааг̇ад̇ам̣ ид̣̇д̇хибаад̣̇ам̣ бхаавзд̇и. со имзсу жад̇уусу ид̣̇д̇хибаад̣̇зсу жид̇д̇ам̣ барибхаавзд̇и барид̣̇амзд̇и, муд̣̇ум̣ гарод̇и гамманияам̣. со имзсу жад̇уусу ид̣̇д̇хибаад̣̇зсу жид̇д̇ам̣ барибхаавзд̇ваа барид̣̇амзд̇ваа муд̣̇ум̣ гарид̇ваа гамманияам̣ гааяамби жид̇д̇з самод̣̇ахад̇и, жид̇д̇амби гааяз самод̣̇ахад̇и, гааяавасзна жид̇д̇ам̣ барин̣аамзд̇и, жид̇д̇авасзна гааяам̣ барин̣аамзд̇и, гааяавасзна жид̇д̇ам̣ ад̇хидтаад̇и, жид̇д̇авасзна гааяам̣ ад̇хидтаад̇и; гааяавасзна жид̇д̇ам̣ барин̣аамзд̇ваа жид̇д̇авасзна гааяам̣ барин̣аамзд̇ваа гааяавасзна жид̇д̇ам̣ ад̇хидтахид̇ваа жид̇д̇авасзна гааяам̣ ад̇хидтахид̇ваа сукасан̃н̃ан̃жа лахусан̃н̃ан̃жа гааяз оггамид̇ваа вихарад̇и. со д̇ат̇аабхаавид̇зна жид̇д̇зна барисуд̣̇д̇хзна барияод̣̇аад̇зна ид̣̇д̇хивид̇хан̃аан̣ааяа жид̇д̇ам̣ абхинийхарад̇и абхининнаамзд̇и. со анзгавихид̇ам̣ ид̣̇д̇хивид̇хам̣ бажжанубход̇и.
101. Kathaṃ kāyampi cittampi ekavavatthānatā sukhasaññañca lahusaññañca adhiṭṭhānavasena ijjhanaṭṭhe paññā iddhividhe ñāṇaṃ? Idha bhikkhu chandasamādhipadhānasaṅkhārasamannāgataṃ iddhipādaṃ bhāveti, vīriyasamādhipadhānasaṅkhārasamannāgataṃ iddhipādaṃ bhāveti, cittasamādhipadhānasaṅkhārasamannāgataṃ iddhipādaṃ bhāveti, vīmaṃsāsamādhipadhānasaṅkhārasamannāgataṃ iddhipādaṃ bhāveti. So imesu catūsu iddhipādesu cittaṃ paribhāveti paridameti, muduṃ karoti kammaniyaṃ. So imesu catūsu iddhipādesu cittaṃ paribhāvetvā paridametvā muduṃ karitvā kammaniyaṃ kāyampi citte samodahati, cittampi kāye samodahati, kāyavasena cittaṃ pariṇāmeti, cittavasena kāyaṃ pariṇāmeti, kāyavasena cittaṃ adhiṭṭhāti, cittavasena kāyaṃ adhiṭṭhāti; kāyavasena cittaṃ pariṇāmetvā cittavasena kāyaṃ pariṇāmetvā kāyavasena cittaṃ adhiṭṭhahitvā cittavasena kāyaṃ adhiṭṭhahitvā sukhasaññañca lahusaññañca kāye okkamitvā viharati. So tathābhāvitena cittena parisuddhena pariyodātena iddhividhañāṇāya cittaṃ abhinīharati abhininnāmeti. So anekavihitaṃ iddhividhaṃ paccanubhoti.
102. згоби худ̇ваа б̣ахуд̇хаа ход̇и, б̣ахуд̇хааби худ̇ваа зго ход̇и; аавибхаавам̣ д̇иробхаавам̣; д̇ирогуддам̣ 1 д̇иробаагаарам̣ д̇иробаб̣б̣ад̇ам̣ асаж̇ж̇амаано г̇ажчад̇и, сзяяат̇ааби аагаасз; бат̇авияааби уммуж̇ж̇анимуж̇ж̇ам̣ гарод̇и, сзяяат̇ааби уд̣̇агз; уд̣̇агзби абхиж̇ж̇амаанз г̇ажчад̇и, сзяяат̇ааби бат̇авияам̣ ; аагаасзби баллан̇гзна гамад̇и 2 сзяяат̇ааби багкий сагун̣о имзби жанд̣̇имасуурияз звам̣махид̣̇д̇хигз звам̣махаанубхаавз баан̣инаа бараамасад̇и 3 баримаж̇ж̇ад̇и; яаава б̣рахмалогааби гааязна васам̣ вад̇д̇зд̇и. д̇ам̣ н̃аад̇адтзна н̃аан̣ам̣, баж̇аананадтзна бан̃н̃аа. д̇зна вужжад̇и – ‘‘гааяамби жид̇д̇амби згававад̇т̇аанад̇аа сукасан̃н̃ан̃жа лахусан̃н̃ан̃жа ад̇хидтаанавасзна иж̇жханадтз бан̃н̃аа ид̣̇д̇хивид̇хз н̃аан̣ам̣’’.
102. Ekopi hutvā bahudhā hoti, bahudhāpi hutvā eko hoti; āvibhāvaṃ tirobhāvaṃ; tirokuṭṭaṃ 4 tiropākāraṃ tiropabbataṃ asajjamāno gacchati, seyyathāpi ākāse; pathaviyāpi ummujjanimujjaṃ karoti, seyyathāpi udake; udakepi abhijjamāne gacchati, seyyathāpi pathaviyaṃ ; ākāsepi pallaṅkena kamati 5 seyyathāpi pakkhī sakuṇo imepi candimasūriye evaṃmahiddhike evaṃmahānubhāve pāṇinā parāmasati 6 parimajjati; yāva brahmalokāpi kāyena vasaṃ vatteti. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘kāyampi cittampi ekavavatthānatā sukhasaññañca lahusaññañca adhiṭṭhānavasena ijjhanaṭṭhe paññā iddhividhe ñāṇaṃ’’.
ид̣̇д̇хивид̇хан̃аан̣анид̣̇д̣̇зсо бан̃н̃аасамо.
Iddhividhañāṇaniddeso paññāsamo.
Footnotes:
Related texts:
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / куд̣̇д̣̇аганигааяа (адтагат̇аа) • Khuddakanikāya (aṭṭhakathā) / бадисамбхид̣̇аамаг̇г̇а-адтагат̇аа • Paṭisambhidāmagga-aṭṭhakathā / 50. ид̣̇д̇хивид̇хан̃аан̣анид̣̇д̣̇зсаван̣н̣анаа • 50. Iddhividhañāṇaniddesavaṇṇanā
