| Library / Tipiṭaka / តិបិដក • Tipiṭaka / បញ្ចបករណ-អដ្ឋកថា • Pañcapakaraṇa-aṭṭhakathā |
៤. ឥទ្ធិកថាវណ្ណនា
4. Iddhikathāvaṇṇanā
៨៨៣-៨៨៤. ឥទានិ ឥទ្ធិកថា នាម ហោតិ។ តត្ថ ឥទ្ធិ នាមេសា កត្ថចិ ឥជ្ឈតិ, កត្ថចិ ន ឥជ្ឈតិ, អនិច្ចាទីនំ និច្ចាទិករណេ ឯកន្តេនេវ ន ឥជ្ឈតិ។ សភាគសន្តតិំ បន បរិវត្តេត្វា វិសភាគសន្តតិករណេ វា សភាគសន្តតិវសេនេវ ចិរតរប្បវត្តនេ វា យេសំ អត្ថាយ ករិយតិ, តេសំ បុញ្ញាទីនិ ការណានិ និស្សាយ កត្ថចិ ឥជ្ឈតិ, ភិក្ខូនំ អត្ថាយ បានីយស្ស សប្បិខីរាទិករណេ វិយ មហាធាតុនិធានេ ទីបាទីនំ ចិរសន្តានប្បវត្តនេ វិយ ចាតិ ឥទំ សកសមយេ សន្និដ្ឋានំ។ យំ បន អាយស្មា បិលិន្ទវច្ឆោ រញ្ញោ បាសាទំ សុវណ្ណន្ត្វេវ អធិមុច្ចិ, តំ និស្សាយ យេសំ ‘‘អត្ថិ អធិប្បាយឥទ្ធី’’តិ លទ្ធិ, សេយ្យថាបិ អន្ធកានំ; តេ សន្ធាយ អត្ថិ អធិប្បាយឥទ្ធីតិ បុច្ឆា សកវាទិស្ស។ តត្ថ អធិប្បាយឥទ្ធីតិ អធិប្បាយឥទ្ធិ, យថាធិប្បាយំ ឥជ្ឈនឥទ្ធីតិ អត្ថោ។ អាមន្តាតិ លទ្ធិមត្តេ ឋត្វា បដិញ្ញា បរវាទិស្ស។ អថ នំ អនិច្ចាទីនំ និច្ចាទិតាយ អនុយុញ្ជិតុំ និច្ចបណ្ណា រុក្ខា ហោន្តូតិអាទិមាហ។ សេសមេត្ថ ឧត្តានត្ថមេវ។ លទ្ធិបតិដ្ឋាបនេ សុវណ្ណោ ច បនាសីតិ រញ្ញោ បុញ្ញូបនិស្សយេន អាសិ, ន កេវលំ ថេរស្ស អធិប្បាយេនេវ។ តស្មា អសាធកមេតន្តិ។
883-884. Idāni iddhikathā nāma hoti. Tattha iddhi nāmesā katthaci ijjhati, katthaci na ijjhati, aniccādīnaṃ niccādikaraṇe ekanteneva na ijjhati. Sabhāgasantatiṃ pana parivattetvā visabhāgasantatikaraṇe vā sabhāgasantativaseneva ciratarappavattane vā yesaṃ atthāya kariyati, tesaṃ puññādīni kāraṇāni nissāya katthaci ijjhati, bhikkhūnaṃ atthāya pānīyassa sappikhīrādikaraṇe viya mahādhātunidhāne dīpādīnaṃ cirasantānappavattane viya cāti idaṃ sakasamaye sanniṭṭhānaṃ. Yaṃ pana āyasmā pilindavaccho rañño pāsādaṃ suvaṇṇantveva adhimucci, taṃ nissāya yesaṃ ‘‘atthi adhippāyaiddhī’’ti laddhi, seyyathāpi andhakānaṃ; te sandhāya atthi adhippāyaiddhīti pucchā sakavādissa. Tattha adhippāyaiddhīti adhippāyaiddhi, yathādhippāyaṃ ijjhanaiddhīti attho. Āmantāti laddhimatte ṭhatvā paṭiññā paravādissa. Atha naṃ aniccādīnaṃ niccāditāya anuyuñjituṃ niccapaṇṇā rukkhā hontūtiādimāha. Sesamettha uttānatthameva. Laddhipatiṭṭhāpane suvaṇṇo ca panāsīti rañño puññūpanissayena āsi, na kevalaṃ therassa adhippāyeneva. Tasmā asādhakametanti.
ឥទ្ធិកថាវណ្ណនា។
Iddhikathāvaṇṇanā.
Related texts:
តិបិដក (មូល) • Tipiṭaka (Mūla) / អភិធម្មបិដក • Abhidhammapiṭaka / កថាវត្ថុបាឡិ • Kathāvatthupāḷi / (២០៣) ៤. ឥទ្ធិកថា • (203) 4. Iddhikathā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ៤. ឥទ្ធិកថាវណ្ណនា • 4. Iddhikathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ៤. ឥទ្ធិកថាវណ្ណនា • 4. Iddhikathāvaṇṇanā
