| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৪. ইদ্ধিকথাৰণ্ণনা
4. Iddhikathāvaṇṇanā
৮৮৩-৮৮৪. ইদানি ইদ্ধিকথা নাম হোতি। তত্থ ইদ্ধি নামেসা কত্থচি ইজ্ঝতি, কত্থচি ন ইজ্ঝতি, অনিচ্চাদীনং নিচ্চাদিকরণে একন্তেনেৰ ন ইজ্ঝতি। সভাগসন্ততিং পন পরিৰত্তেত্ৰা ৰিসভাগসন্ততিকরণে ৰা সভাগসন্ততিৰসেনেৰ চিরতরপ্পৰত্তনে ৰা যেসং অত্থায করিযতি, তেসং পুঞ্ঞাদীনি কারণানি নিস্সায কত্থচি ইজ্ঝতি, ভিক্খূনং অত্থায পানীযস্স সপ্পিখীরাদিকরণে ৰিয মহাধাতুনিধানে দীপাদীনং চিরসন্তানপ্পৰত্তনে ৰিয চাতি ইদং সকসমযে সন্নিট্ঠানং। যং পন আযস্মা পিলিন্দৰচ্ছো রঞ্ঞো পাসাদং সুৰণ্ণন্ত্ৰেৰ অধিমুচ্চি, তং নিস্সায যেসং ‘‘অত্থি অধিপ্পাযইদ্ধী’’তি লদ্ধি, সেয্যথাপি অন্ধকানং; তে সন্ধায অত্থি অধিপ্পাযইদ্ধীতি পুচ্ছা সকৰাদিস্স। তত্থ অধিপ্পাযইদ্ধীতি অধিপ্পাযইদ্ধি, যথাধিপ্পাযং ইজ্ঝনইদ্ধীতি অত্থো। আমন্তাতি লদ্ধিমত্তে ঠত্ৰা পটিঞ্ঞা পরৰাদিস্স। অথ নং অনিচ্চাদীনং নিচ্চাদিতায অনুযুঞ্জিতুং নিচ্চপণ্ণা রুক্খা হোন্তূতিআদিমাহ। সেসমেত্থ উত্তানত্থমেৰ। লদ্ধিপতিট্ঠাপনে সুৰণ্ণো চ পনাসীতি রঞ্ঞো পুঞ্ঞূপনিস্সযেন আসি, ন কেৰলং থেরস্স অধিপ্পাযেনেৰ। তস্মা অসাধকমেতন্তি।
883-884. Idāni iddhikathā nāma hoti. Tattha iddhi nāmesā katthaci ijjhati, katthaci na ijjhati, aniccādīnaṃ niccādikaraṇe ekanteneva na ijjhati. Sabhāgasantatiṃ pana parivattetvā visabhāgasantatikaraṇe vā sabhāgasantativaseneva ciratarappavattane vā yesaṃ atthāya kariyati, tesaṃ puññādīni kāraṇāni nissāya katthaci ijjhati, bhikkhūnaṃ atthāya pānīyassa sappikhīrādikaraṇe viya mahādhātunidhāne dīpādīnaṃ cirasantānappavattane viya cāti idaṃ sakasamaye sanniṭṭhānaṃ. Yaṃ pana āyasmā pilindavaccho rañño pāsādaṃ suvaṇṇantveva adhimucci, taṃ nissāya yesaṃ ‘‘atthi adhippāyaiddhī’’ti laddhi, seyyathāpi andhakānaṃ; te sandhāya atthi adhippāyaiddhīti pucchā sakavādissa. Tattha adhippāyaiddhīti adhippāyaiddhi, yathādhippāyaṃ ijjhanaiddhīti attho. Āmantāti laddhimatte ṭhatvā paṭiññā paravādissa. Atha naṃ aniccādīnaṃ niccāditāya anuyuñjituṃ niccapaṇṇā rukkhā hontūtiādimāha. Sesamettha uttānatthameva. Laddhipatiṭṭhāpane suvaṇṇo ca panāsīti rañño puññūpanissayena āsi, na kevalaṃ therassa adhippāyeneva. Tasmā asādhakametanti.
ইদ্ধিকথাৰণ্ণনা।
Iddhikathāvaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (২০৩) ৪. ইদ্ধিকথা • (203) 4. Iddhikathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৪. ইদ্ধিকথাৰণ্ণনা • 4. Iddhikathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৪. ইদ্ধিকথাৰণ্ণনা • 4. Iddhikathāvaṇṇanā
