| Library / Tipiṭaka / तिपिटक • Tipiṭaka / जातकपाळि • Jātakapāḷi |
३६३. हिरिजातकं (५-२-३)
363. Hirijātakaṃ (5-2-3)
७०.
70.
हिरिं तरन्तं विजिगुच्छमानं, तवाहमस्मी इति भासमानं।
Hiriṃ tarantaṃ vijigucchamānaṃ, tavāhamasmī iti bhāsamānaṃ;
सेय्यानि कम्मानि अनादियन्तं, नेसो ममन्ति इति नं विजञ्ञा॥
Seyyāni kammāni anādiyantaṃ, neso mamanti iti naṃ vijaññā.
७१.
71.
यञ्हि कयिरा तञ्हि वदे, यं न कयिरा न तं वदे।
Yañhi kayirā tañhi vade, yaṃ na kayirā na taṃ vade;
अकरोन्तं भासमानं, परिजानन्ति पण्डिता॥
Akarontaṃ bhāsamānaṃ, parijānanti paṇḍitā.
७२.
72.
न सो मित्तो यो सदा अप्पमत्तो, भेदासङ्की रन्धमेवानुपस्सी।
Na so mitto yo sadā appamatto, bhedāsaṅkī randhamevānupassī;
यस्मिञ्च सेती उरसीव पुत्तो, स वे मित्तो यो अभेज्जो परेहि॥
Yasmiñca setī urasīva putto, sa ve mitto yo abhejjo parehi.
७३.
73.
पामोज्जकरणं ठानं, पसंसावहनं सुखं।
Pāmojjakaraṇaṃ ṭhānaṃ, pasaṃsāvahanaṃ sukhaṃ;
फलानिसंसो भावेति, वहन्तो पोरिसं धुरं॥
Phalānisaṃso bhāveti, vahanto porisaṃ dhuraṃ.
७४.
74.
पविवेकरसं पित्वा, रसं उपसमस्स च।
Pavivekarasaṃ pitvā, rasaṃ upasamassa ca;
निद्दरो होति निप्पापो, धम्मप्पीतिरसं पिवन्ति॥
Niddaro hoti nippāpo, dhammappītirasaṃ pivanti.
हिरिजातकं ततियं।
Hirijātakaṃ tatiyaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / जातक-अट्ठकथा • Jātaka-aṭṭhakathā / [३६३] ३. हिरिजातकवण्णना • [363] 3. Hirijātakavaṇṇanā
