၄. ဟီနာဓိမုတ္တိကသုတ္တံ

4. Hīnādhimuttikasuttaṃ

၉၈. သာဝတ္ထိယံ ဝိဟရတိ။ပေ.။ ‘‘ဓာတုသောဝ ¹, ဘိက္ခဝေ, သတ္တာ သံသန္ဒန္တိ သမေန္တိ။ ဟီနာဓိမုတ္တိကာ ဟီနာဓိမုတ္တိကေဟိ သဒ္ဓိံ သံသန္ဒန္တိ သမေန္တိ; ကလ္ယာဏာဓိမုတ္တိကာ ကလ္ယာဏာဓိမုတ္တိကေဟိ သဒ္ဓိံ သံသန္ဒန္တိ သမေန္တိ’’။

98. Sāvatthiyaṃ viharati…pe… ‘‘dhātusova ², bhikkhave, sattā saṃsandanti samenti. Hīnādhimuttikā hīnādhimuttikehi saddhiṃ saṃsandanti samenti; kalyāṇādhimuttikā kalyāṇādhimuttikehi saddhiṃ saṃsandanti samenti’’.

‘‘အတီတမ္ပိ ခော ³, ဘိက္ခဝေ, အဒ္ဓာနံ ဓာတုသောဝ ⁴ သတ္တာ သံသန္ဒိံသု သမိံသု။ ဟီနာဓိမုတ္တိကာ ဟီနာဓိမုတ္တိကေဟိ သဒ္ဓိံ သံသန္ဒိံသု သမိံသု; ကလ္ယာဏာဓိမုတ္တိကာ ကလ္ယာဏာဓိမုတ္တိကေဟိ သဒ္ဓိံ သံသန္ဒိံသု သမိံသု။

‘‘Atītampi kho ⁵, bhikkhave, addhānaṃ dhātusova ⁶ sattā saṃsandiṃsu samiṃsu. Hīnādhimuttikā hīnādhimuttikehi saddhiṃ saṃsandiṃsu samiṃsu; kalyāṇādhimuttikā kalyāṇādhimuttikehi saddhiṃ saṃsandiṃsu samiṃsu.

‘‘အနာဂတမ္ပိ ခော ⁷, ဘိက္ခဝေ, အဒ္ဓာနံ ဓာတုသောဝ ⁸ သတ္တာ သံသန္ဒိသ္သန္တိ သမေသ္သန္တိ။ ဟီနာဓိမုတ္တိကာ ဟီနာဓိမုတ္တိကေဟိ သဒ္ဓိံ သံသန္ဒိသ္သန္တိ သမေသ္သန္တိ; ကလ္ယာဏာဓိမုတ္တိကာ ကလ္ယာဏာဓိမုတ္တိကေဟိ သဒ္ဓိံ သံသန္ဒိသ္သန္တိ သမေသ္သန္တိ။

‘‘Anāgatampi kho ⁹, bhikkhave, addhānaṃ dhātusova ¹⁰ sattā saṃsandissanti samessanti. Hīnādhimuttikā hīnādhimuttikehi saddhiṃ saṃsandissanti samessanti; kalyāṇādhimuttikā kalyāṇādhimuttikehi saddhiṃ saṃsandissanti samessanti.

‘‘ဧတရဟိပိ ခော ¹¹, ဘိက္ခဝေ, ပစ္စုပ္ပန္နံ အဒ္ဓာနံ ဓာတုသောဝ ¹² သတ္တာ သံသန္ဒန္တိ သမေန္တိ။ ဟီနာဓိမုတ္တိကာ ဟီနာဓိမုတ္တိကေဟိ သဒ္ဓိံ သံသန္ဒန္တိ သမေန္တိ; ကလ္ယာဏာဓိမုတ္တိကာ ကလ္ယာဏာဓိမုတ္တိကေဟိ သဒ္ဓိံ သံသန္ဒန္တိ သမေန္တီ’’တိ။ စတုတ္ထံ။

‘‘Etarahipi kho ¹³, bhikkhave, paccuppannaṃ addhānaṃ dhātusova ¹⁴ sattā saṃsandanti samenti. Hīnādhimuttikā hīnādhimuttikehi saddhiṃ saṃsandanti samenti; kalyāṇādhimuttikā kalyāṇādhimuttikehi saddhiṃ saṃsandanti samentī’’ti. Catutthaṃ.

Next: ၅. စင္ကမသုတ္တံ • 5. Caṅkamasuttaṃ

Footnotes:

1. ဓာတုသော (သီ. ပီ.) အယဉ္စ ပဌမာရမ္ဘဝာက္ယေယေဝ, န သဗ္ဗတ္ထ။ တီသု ပန အဒ္ဓာသု စ ဥပမာသံသန္ဒနနိဂမနဋ္ဌာနေ စ ဣဒံ ပာဌနာနတ္တံ နတ္ထိ

2. dhātuso (sī. pī.) ayañca paṭhamārambhavākyeyeva, na sabbattha. tīsu pana addhāsu ca upamāsaṃsandananigamanaṭṭhāne ca idaṃ pāṭhanānattaṃ natthi

3. ခောသဒ္ဒော သီ. သ္ယာ. ကံ. ပီ. ပောတ္ထကေသု နတ္ထိ

4. ဤဒိသေသု ဌာနေသု ပာဌနာနတ္တံ နတ္ထိ

5. khosaddo sī. syā. kaṃ. pī. potthakesu natthi

6. īdisesu ṭhānesu pāṭhanānattaṃ natthi

7. ခောသဒ္ဒော သီ. သ္ယာ. ကံ. ပီ. ပောတ္ထကေသု နတ္ထိ

8. ဤဒိသေသု ဌာနေသု ပာဌနာနတ္တံ နတ္ထိ

9. khosaddo sī. syā. kaṃ. pī. potthakesu natthi

10. īdisesu ṭhānesu pāṭhanānattaṃ natthi

11. ခောသဒ္ဒော သီ. သ္ယာ. ကံ. ပီ. ပောတ္ထကေသု နတ္ထိ

12. ဤဒိသေသု ဌာနေသု ပာဌနာနတ္တံ နတ္ထိ

13. khosaddo sī. syā. kaṃ. pī. potthakesu natthi

14. īdisesu ṭhānesu pāṭhanānattaṃ natthi

Related texts:

အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၄. ဟီနာဓိမုတ္တိကသုတ္တဝဏ္ဏနာ • 4. Hīnādhimuttikasuttavaṇṇanā

ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၄. ဟီနာဓိမုတ္တိကသုတ္တဝဏ္ဏနာ • 4. Hīnādhimuttikasuttavaṇṇanā

© 1991-2026 Titi Tudorancea Yoga Bulletin | Titi Tudorancea^® is a Registered Trademark | Terms of use and privacy policy
Contact