| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) |
༤. ཧིམཝནྟསུཏྟཝཎྞནཱ
4. Himavantasuttavaṇṇanā
༢༤. ཙཏུཏྠེ སམཱཔཏྟིཀུསལོ ཧོཏཱིཏི སམཱཔཛྫནཀུསལོ ཧོཏི། ཏེནཱཧ ‘‘སམཱཔཛྫིཏུཾ ཀུསལོ’’ཏི། ཏཏྠ ཨནྟོགཏཧེཏུཨཏྠོ ཋིཏི-སདྡོ, ཏསྨཱ ཋཔནཀུསལོཏི ཨཏྠོཏི ཨཱཧ ‘‘སམཱདྷིཾ ཋཔེཏུཾ སཀྐོཏཱིཏི ཨཏྠོ’’ཏི། ཏཏྠ ཋཔེཏུཾ སཀྐོཏཱིཏི སཏྟཊྛཨཙྪརཱམཏྟཾ ཁཎཾ ཛྷཱནཾ ཋཔེཏུཾ སཀྐོཏི ཨདྷིཊྛཱནཝསིབྷཱཝསྶ ནིཔྥཱདིཏཏྟཱ། ཡཐཱཔརིཙྪེདེནཱཏི ཡཐཱཔརིཙྪིནྣཀཱལེན། ཝུཊྛཱཏུཾ སཀྐོཏི ཝུཊྛཱནཝསིབྷཱཝསྶ ནིཔྥཱདིཏཏྟཱ། ཀལླཾ སཉྫཱཏཾ ཨསྶཱཏི ཀལླིཏཾ, ཏསྨིཾ ཀལླིཏེ ཀལླིཏབྷཱཝེ ཀུསལོ ཀལླིཏཀུསལོ། ཧཱསེཏུཾ ཏོསེཏུཾ སམྤཧཾསེཏུཾ། ཀལླཾ ཀཱཏུནྟི སམཱདྷཱནསྶ པཊིཔཀྑདྷམྨཱནཾ དཱུརཱིཀརཎེན སཧཀཱརཱིཀཱརཎཱནཉྩ སམཔྤདྷཱནེན སམཱཔཛྫནེ ཙིཏྟཾ སམཏྠཾ ཀཱཏུཾ། སམཱདྷིསྶ གོཙརཀུསལོཏི སམཱདྷིསྨིཾ ནིཔྥཱདེཏབྦེ ཏསྶ གོཙརེ ཀམྨཊྛཱནསཉྙིཏེ པཝཏྟིཊྛཱནེ བྷིཀྑཱཙཱརགོཙརེ སཏིསམྤཛཉྙཡོགཏོ ཀུསལོ ཚེཀོ། ཏེནཱཧ ‘‘སམཱདྷིསྶ ཨསཔྤཱཡེ ཨནུཔཀཱརཀེ དྷམྨེ ཝཛྫེཏྭཱ’’ཏིཨཱདི། པཋམཛ྄ཛྷཱནཱདིསམཱདྷིཾ ཨབྷིནཱིཧརིཏུནྟི པཋམཛ྄ཛྷཱནཱདིསམཱདྷིཾ ཝིསེསབྷཱགིཡཏཱཡ ཨབྷིནཱིཧརིཏུཾ ཨུཔནེཏུཾ།
24. Catutthe samāpattikusalo hotīti samāpajjanakusalo hoti. Tenāha ‘‘samāpajjituṃ kusalo’’ti. Tattha antogatahetuattho ṭhiti-saddo, tasmā ṭhapanakusaloti atthoti āha ‘‘samādhiṃ ṭhapetuṃ sakkotīti attho’’ti. Tattha ṭhapetuṃ sakkotīti sattaṭṭhaaccharāmattaṃ khaṇaṃ jhānaṃ ṭhapetuṃ sakkoti adhiṭṭhānavasibhāvassa nipphāditattā. Yathāparicchedenāti yathāparicchinnakālena. Vuṭṭhātuṃ sakkoti vuṭṭhānavasibhāvassa nipphāditattā. Kallaṃ sañjātaṃ assāti kallitaṃ, tasmiṃ kallite kallitabhāve kusalo kallitakusalo. Hāsetuṃ tosetuṃ sampahaṃsetuṃ. Kallaṃ kātunti samādhānassa paṭipakkhadhammānaṃ dūrīkaraṇena sahakārīkāraṇānañca samappadhānena samāpajjane cittaṃ samatthaṃ kātuṃ. Samādhissa gocarakusaloti samādhismiṃ nipphādetabbe tassa gocare kammaṭṭhānasaññite pavattiṭṭhāne bhikkhācāragocare satisampajaññayogato kusalo cheko. Tenāha ‘‘samādhissa asappāye anupakārake dhamme vajjetvā’’tiādi. Paṭhamajjhānādisamādhiṃ abhinīharitunti paṭhamajjhānādisamādhiṃ visesabhāgiyatāya abhinīharituṃ upanetuṃ.
ཧིམཝནྟསུཏྟཝཎྞནཱ ནིཊྛིཏཱ།
Himavantasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya / ༤. ཧིམཝནྟསུཏྟཾ • 4. Himavantasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༤. ཧིམཝནྟསུཏྟཝཎྞནཱ • 4. Himavantasuttavaṇṇanā
