| Library / Tipiṭaka / တိပိဋက • Tipiṭaka / သုတ္တနိပာတပာဠိ • Suttanipātapāḷi |
၈. ဟေမကမာဏဝပုစ္ဆာ
8. Hemakamāṇavapucchā
၁၀၉၀.
1090.
‘‘ယေ မေ ပုဗ္ဗေ ဝိယာကံသု၊ (ဣစ္စာယသ္မာ ဟေမကော)
‘‘Ye me pubbe viyākaṃsu, (iccāyasmā hemako)
ဟုရံ ဂောတမသာသနာ။
Huraṃ gotamasāsanā;
ဣစ္စာသိ ဣတိ ဘဝိသ္သတိ၊ သဗ္ဗံ တံ ဣတိဟီတိဟံ။
Iccāsi iti bhavissati, sabbaṃ taṃ itihītihaṃ;
သဗ္ဗံ တံ တက္ကဝဍ္ဎနံ၊ နာဟံ တတ္ထ အဘိရမိံ။
Sabbaṃ taṃ takkavaḍḍhanaṃ, nāhaṃ tattha abhiramiṃ.
၁၀၉၁.
1091.
‘‘တ္ဝဉ္စ မေ ဓမ္မမက္ခာဟိ၊ တဏ္ဟာနိဂ္ဃာတနံ မုနိ။
‘‘Tvañca me dhammamakkhāhi, taṇhānigghātanaṃ muni;
ယံ ဝိဒိတ္ဝာ သတော စရံ၊ တရေ လောကေ ဝိသတ္တိကံ’’။
Yaṃ viditvā sato caraṃ, tare loke visattikaṃ’’.
၁၀၉၂.
1092.
‘‘ဣဓ ဒိဋ္ဌသုတမုတဝိညာတေသု၊ ပိယရူပေသု ဟေမက။
‘‘Idha diṭṭhasutamutaviññātesu, piyarūpesu hemaka;
ဆန္ဒရာဂဝိနောဒနံ၊ နိဗ္ဗာနပဒမစ္စုတံ။
Chandarāgavinodanaṃ, nibbānapadamaccutaṃ.
၁၀၉၃.
1093.
‘‘ဧတဒညာယ ယေ သတာ၊ ဒိဋ္ဌဓမ္မာဘိနိဗ္ဗုတာ။
‘‘Etadaññāya ye satā, diṭṭhadhammābhinibbutā;
ဥပသန္တာ စ တေ သဒာ၊ တိဏ္ဏာ လောကေ ဝိသတ္တိက’’န္တိ။
Upasantā ca te sadā, tiṇṇā loke visattika’’nti.
ဟေမကမာဏဝပုစ္ဆာ အဋ္ဌမာ နိဋ္ဌိတာ။
Hemakamāṇavapucchā aṭṭhamā niṭṭhitā.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / သုတ္တနိပာတ-အဋ္ဌကထာ • Suttanipāta-aṭṭhakathā / ၈. ဟေမကသုတ္တဝဏ္ဏနာ • 8. Hemakasuttavaṇṇanā
