| Library / Tipiṭaka / तिपिटक • Tipiṭaka / चूळनिद्देसपाळि • Cūḷaniddesapāḷi |
८. हेमकमाणवपुच्छा
8. Hemakamāṇavapucchā
१०९.
109.
‘‘ये मे पुब्बे वियाकंसु, [इच्चायस्मा हेमको]
‘‘Ye me pubbe viyākaṃsu, [iccāyasmā hemako]
हुरं गोतमसासना।
Huraṃ gotamasāsanā;
इच्चासि इति भविस्सति, सब्बं तं इतिहीतिहं।
Iccāsi iti bhavissati, sabbaṃ taṃ itihītihaṃ;
सब्बं तं तक्कवड्ढनं, नाहं तत्थ अभिरमिं॥
Sabbaṃ taṃ takkavaḍḍhanaṃ, nāhaṃ tattha abhiramiṃ.
११०.
110.
‘‘त्वञ्च मे धम्ममक्खाहि, तण्हानिग्घातनं मुनि।
‘‘Tvañca me dhammamakkhāhi, taṇhānigghātanaṃ muni;
यं विदित्वा सतो चरं, तरे लोके विसत्तिकं’’॥
Yaṃ viditvā sato caraṃ, tare loke visattikaṃ’’.
१११.
111.
‘‘इध दिट्ठसुतमुतविञ्ञातेसु, पियरूपेसु हेमक।
‘‘Idha diṭṭhasutamutaviññātesu, piyarūpesu hemaka;
छन्दरागविनोदनं, निब्बानपदमच्चुतं॥
Chandarāgavinodanaṃ, nibbānapadamaccutaṃ.
११२.
112.
‘‘एतदञ्ञाय ये सता, दिट्ठधम्माभिनिब्बुता।
‘‘Etadaññāya ye satā, diṭṭhadhammābhinibbutā;
उपसन्ता च ते सदा, तिण्णा लोके विसत्तिक’’न्ति॥
Upasantā ca te sadā, tiṇṇā loke visattika’’nti.
हेमकमाणवपुच्छा अट्ठमा।
Hemakamāṇavapucchā aṭṭhamā.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / चूळनिद्देस-अट्ठकथा • Cūḷaniddesa-aṭṭhakathā / ८. हेमकमाणवसुत्तनिद्देसवण्णना • 8. Hemakamāṇavasuttaniddesavaṇṇanā
