22. Hatthivaggo

1. Hatthidāyakattheraapadānaṃ

1.

‘‘Siddhatthassa bhagavato, dvipadindassa tādino;

Nāgaseṭṭho mayā dinno, īsādanto urūḷhavā.

2.

‘‘Uttamatthaṃ anubhomi, santipadamanuttaraṃ;

Nāgadānaṃ ² mayā dinnaṃ, sabbalokahitesino.

3.

‘‘Catunnavutito kappe, yaṃ nāga ⁴ madadiṃ tadā;

Duggatiṃ nābhijānāmi, nāgadānassidaṃ phalaṃ.

4.

‘‘Aṭṭhasattatikappamhi, soḷasāsiṃsu khattiyā;

Samantapāsādikā nāma, cakkavattī mahabbalā.

5.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā hatthidāyako thero imā gāthāyo abhāsitthāti.

Hatthidāyakattherassāpadānaṃ paṭhamaṃ.