| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
3. ஹஸத⁴ம்மஸிக்கா²பத³வண்ணனா
3. Hasadhammasikkhāpadavaṇṇanā
335. ததியே – அப்பகதஞ்ஞுனோதி யங் ப⁴க³வதா பகதங் பஞ்ஞத்தங், தங் ந ஜானந்தீதி அத்தோ².
335. Tatiye – appakataññunoti yaṃ bhagavatā pakataṃ paññattaṃ, taṃ na jānantīti attho.
336. உத³கே ஹஸத⁴ம்மேதி உத³ககீளிகா வுச்சதி. உபரிகொ³ப்ப²கேதி கொ³ப்ப²கானங் உபரிபா⁴க³ப்பமாணே. ஹஸாதி⁴ப்பாயோதி கீளாதி⁴ப்பாயோ. நிமுஜ்ஜதி வாதிஆதீ³ஸு நிமுஜ்ஜனத்தா²ய ஓரோஹந்தஸ்ஸ பத³வாரே பத³வாரே து³க்கடங். நிமுஜ்ஜனும்முஜ்ஜனேஸு பயோகே³ பயோகே³ பாசித்தியங். நிமுஜ்ஜித்வா அந்தோஉத³கேயேவ க³ச்ச²ந்தஸ்ஸ ஹத்த²வாரபத³வாரேஸு ஸப்³ப³த்த² பாசித்தியங். பலவதீதி தரதி. ஹத்தே²ஹி தரந்தஸ்ஸ ஹத்த²வாரே ஹத்த²வாரே பாசித்தியங். பாதே³ஸுபி ஏஸேவ நயோ. யேன யேன அங்கே³ன தரதி, தஸ்ஸ தஸ்ஸ பயோகே³ பயோகே³ பாசித்தியங். தீரதோ வா ருக்க²தோ வா உத³கே பததி, பாசித்தியமேவ. நாவாய கீளதீதி பி²யாரித்தாதீ³ஹி நாவங் பாஜெந்தோ வா தீரே உஸ்ஸாரெந்தோ வா நாவாய கீளதி, து³க்கடங்.
336.Udake hasadhammeti udakakīḷikā vuccati. Uparigopphaketi gopphakānaṃ uparibhāgappamāṇe. Hasādhippāyoti kīḷādhippāyo. Nimujjati vātiādīsu nimujjanatthāya orohantassa padavāre padavāre dukkaṭaṃ. Nimujjanummujjanesu payoge payoge pācittiyaṃ. Nimujjitvā antoudakeyeva gacchantassa hatthavārapadavāresu sabbattha pācittiyaṃ. Palavatīti tarati. Hatthehi tarantassa hatthavāre hatthavāre pācittiyaṃ. Pādesupi eseva nayo. Yena yena aṅgena tarati, tassa tassa payoge payoge pācittiyaṃ. Tīrato vā rukkhato vā udake patati, pācittiyameva. Nāvāya kīḷatīti phiyārittādīhi nāvaṃ pājento vā tīre ussārento vā nāvāya kīḷati, dukkaṭaṃ.
ஹத்தே²ன வாதிஆதீ³ஸுபி பயோகே³ பயோகே³ து³க்கடங். கேசி ஹத்தே²ன உத³கே கி²த்தாய கத²லாய பதனுப்பதனவாரேஸு து³க்கடங் வத³ந்தி, தங் ந க³ஹேதப்³ப³ங். தத்த² ஹி ஏகபயோக³த்தா ஏகமேவ து³க்கடங், அபிச உபரிகொ³ப்ப²கே வுத்தானி உம்முஜ்ஜனாதீ³னி ட²பெத்வா அஞ்ஞேன யேன கேனசி ஆகாரேன உத³கங் ஓதரித்வா வா அனோதரித்வா வா யத்த² கத்த²சி டி²தங் உத³கங் அந்தமஸோ பி³ந்து³ங் க³ஹெத்வா கி²பனகீளாயபி கீளந்தஸ்ஸ து³க்கடமேவ, அத்த²ஜோதகங் பன அக்க²ரங் லிகி²துங் வட்டதி, அயமெத்த² வினிச்ச²யோ. ஸேஸமெத்த² உத்தானமேவ.
Hatthena vātiādīsupi payoge payoge dukkaṭaṃ. Keci hatthena udake khittāya kathalāya patanuppatanavāresu dukkaṭaṃ vadanti, taṃ na gahetabbaṃ. Tattha hi ekapayogattā ekameva dukkaṭaṃ, apica uparigopphake vuttāni ummujjanādīni ṭhapetvā aññena yena kenaci ākārena udakaṃ otaritvā vā anotaritvā vā yattha katthaci ṭhitaṃ udakaṃ antamaso binduṃ gahetvā khipanakīḷāyapi kīḷantassa dukkaṭameva, atthajotakaṃ pana akkharaṃ likhituṃ vaṭṭati, ayamettha vinicchayo. Sesamettha uttānameva.
பட²மபாராஜிகஸமுட்டா²னங் – கிரியங், ஸஞ்ஞாவிமொக்க²ங், ஸசித்தகங், லோகவஜ்ஜங், காயகம்மங், அகுஸலசித்தங், திவேத³னந்தி.
Paṭhamapārājikasamuṭṭhānaṃ – kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, akusalacittaṃ, tivedananti.
ஹஸத⁴ம்மஸிக்கா²பத³ங் ததியங்.
Hasadhammasikkhāpadaṃ tatiyaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 6. ஸுராபானவக்³கோ³ • 6. Surāpānavaggo
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 3. ஹஸத⁴ம்மஸிக்கா²பத³வண்ணனா • 3. Hasadhammasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 3. ஹஸத⁴ம்மஸிக்கா²பத³வண்ணனா • 3. Hasadhammasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 3. ஹஸத⁴ம்மஸிக்கா²பத³ங் • 3. Hasadhammasikkhāpadaṃ
