| Library / Tipiṭaka / ತಿಪಿಟಕ • Tipiṭaka / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā |
ಹರಣಕಕಥಾವಣ್ಣನಾ
Haraṇakakathāvaṇṇanā
೧೧೧. ಹರಣಕಕಥಾಯಂ ಹರಣಕನ್ತಿ ಹರಿಯಮಾನಂ। ಅಭಿಮುಖಂ ಕತ್ವಾ ಕಡ್ಢನಂ ಆಕಡ್ಢನಂ, ಸೇಸದಿಸಾಕಡ್ಢನಂ ವಿಕಡ್ಢನಂ। ಪಾದಂ ಅಗ್ಘತಿ, ಪಾರಾಜಿಕಮೇವಾತಿ ಏತ್ಥ ಅನ್ತಂ ನ ಗಣ್ಹಾಮೀತಿ ಅಸಲ್ಲಕ್ಖಿತತ್ತಾ ಅನ್ತಸ್ಸ ಚ ಗಣ್ಹಿಸ್ಸಾಮೀತಿ ಸಲ್ಲಕ್ಖಿತಸ್ಸೇವ ಪಟಸ್ಸ ಏಕದೇಸತ್ತಾ ಪಾರಾಜಿಕಂ ವುತ್ತಂ। ಸಹಭಣ್ಡಹಾರಕನ್ತಿ ಭಣ್ಡಹಾರಕೇನ ಸದ್ಧಿಂ। ಸನ್ತಜ್ಜೇತ್ವಾತಿ ಧನುಆದೀಹಿ ಸನ್ತಜ್ಜೇತ್ವಾ।
111. Haraṇakakathāyaṃ haraṇakanti hariyamānaṃ. Abhimukhaṃ katvā kaḍḍhanaṃ ākaḍḍhanaṃ, sesadisākaḍḍhanaṃ vikaḍḍhanaṃ. Pādaṃ agghati, pārājikamevāti ettha antaṃ na gaṇhāmīti asallakkhitattā antassa ca gaṇhissāmīti sallakkhitasseva paṭassa ekadesattā pārājikaṃ vuttaṃ. Sahabhaṇḍahārakanti bhaṇḍahārakena saddhiṃ. Santajjetvāti dhanuādīhi santajjetvā.
ಸೋತಿ ಭಣ್ಡಹಾರಕೋ। ಅನಜ್ಝಾವುತ್ಥಕನ್ತಿ ಅಪರಿಗ್ಗಹಿತಕಂ, ಅಸಾಮಿಕನ್ತಿ ಅತ್ಥೋ।
Soti bhaṇḍahārako. Anajjhāvutthakanti apariggahitakaṃ, asāmikanti attho.
ಆಹರಾಪೇನ್ತೇ ದಾತಬ್ಬನ್ತಿ ಏತ್ಥ ‘‘ಛಡ್ಡೇತ್ವಾ ಧುರಂ ನಿಕ್ಖಿಪಿತ್ವಾ ಗತಾನಮ್ಪಿ ನಿರಾಲಯಾನಂ ಪುನ ಆಹರಾಪನಸ್ಸ ವುತ್ತತ್ತಾ ಭಿಕ್ಖೂನಮ್ಪಿ ಅತ್ತನೋ ಸನ್ತಕೇ ಪರಿಕ್ಖಾರೇ ಅಚ್ಛಿನ್ದಿತ್ವಾ ಪರೇಹಿ ಗಹಿತೇ ತತ್ಥ ಧುರನಿಕ್ಖೇಪಂ ಕತ್ವಾಪಿ ಪುನ ತಂ ಬಲಕ್ಕಾರೇನಪಿ ಆಹರಾಪೇತುಂ ವಟ್ಟತೀ’’ತಿ ದೇಸವಾಸಿನೋ ಆಚರಿಯಾ ವದನ್ತಿ, ಸೀಹಳದೀಪವಾಸಿನೋ ಪನ ತಂ ಕೇಚಿ ಆಚರಿಯಾ ನ ಇಚ್ಛನ್ತಿ। ತೇನೇವ ಮಹಾಗಣ್ಠಿಪದೇ ಮಜ್ಝಿಮಗಣ್ಠಿಪದೇ ಚ ವುತ್ತಂ ‘‘ಅಮ್ಹಾಕಂ ಪನ ತಂ ನ ರುಚ್ಚತೀ’’ತಿ। ಅಞ್ಞೇಸೂತಿ ಮಹಾಪಚ್ಚರಿಆದೀಸು। ವಿಚಾರಣಾ ಏವ ನತ್ಥೀತಿ ತತ್ಥಾಪಿ ಪಟಿಕ್ಖೇಪಾಭಾವತೋ ಅಯಮೇವತ್ಥೋತಿ ವುತ್ತಂ ಹೋತಿ।
Āharāpente dātabbanti ettha ‘‘chaḍḍetvā dhuraṃ nikkhipitvā gatānampi nirālayānaṃ puna āharāpanassa vuttattā bhikkhūnampi attano santake parikkhāre acchinditvā parehi gahite tattha dhuranikkhepaṃ katvāpi puna taṃ balakkārenapi āharāpetuṃ vaṭṭatī’’ti desavāsino ācariyā vadanti, sīhaḷadīpavāsino pana taṃ keci ācariyā na icchanti. Teneva mahāgaṇṭhipade majjhimagaṇṭhipade ca vuttaṃ ‘‘amhākaṃ pana taṃ na ruccatī’’ti. Aññesūti mahāpaccariādīsu. Vicāraṇā eva natthīti tatthāpi paṭikkhepābhāvato ayamevatthoti vuttaṃ hoti.
ಹರಣಕಕಥಾವಣ್ಣನಾ ನಿಟ್ಠಿತಾ।
Haraṇakakathāvaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಿಭಙ್ಗ • Mahāvibhaṅga / ೨. ದುತಿಯಪಾರಾಜಿಕಂ • 2. Dutiyapārājikaṃ
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಮಹಾವಿಭಙ್ಗ-ಅಟ್ಠಕಥಾ • Mahāvibhaṅga-aṭṭhakathā / ೨. ದುತಿಯಪಾರಾಜಿಕಂ • 2. Dutiyapārājikaṃ
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಭೂಮಟ್ಠಕಥಾದಿವಣ್ಣನಾ • Bhūmaṭṭhakathādivaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಹರಣಕಕಥಾವಣ್ಣನಾ • Haraṇakakathāvaṇṇanā
