| Library / Tipiṭaka / ತಿಪಿಟಕ • Tipiṭaka / ಥೇರೀಗಾಥಾಪಾಳಿ • Therīgāthāpāḷi |
೭. ಗುತ್ತಾಥೇರೀಗಾಥಾ
7. Guttātherīgāthā
೧೬೩.
163.
‘‘ಗುತ್ತೇ ಯದತ್ಥಂ ಪಬ್ಬಜ್ಜಾ, ಹಿತ್ವಾ ಪುತ್ತಂ ವಸುಂ ಪಿಯಂ।
‘‘Gutte yadatthaṃ pabbajjā, hitvā puttaṃ vasuṃ piyaṃ;
ತಮೇವ ಅನುಬ್ರೂಹೇಹಿ, ಮಾ ಚಿತ್ತಸ್ಸ ವಸಂ ಗಮಿ॥
Tameva anubrūhehi, mā cittassa vasaṃ gami.
೧೬೪.
164.
‘‘ಚಿತ್ತೇನ ವಞ್ಚಿತಾ ಸತ್ತಾ, ಮಾರಸ್ಸ ವಿಸಯೇ ರತಾ।
‘‘Cittena vañcitā sattā, mārassa visaye ratā;
ಅನೇಕಜಾತಿಸಂಸಾರಂ, ಸನ್ಧಾವನ್ತಿ ಅವಿದ್ದಸೂ॥
Anekajātisaṃsāraṃ, sandhāvanti aviddasū.
೧೬೫.
165.
‘‘ಕಾಮಚ್ಛನ್ದಞ್ಚ ಬ್ಯಾಪಾದಂ, ಸಕ್ಕಾಯದಿಟ್ಠಿಮೇವ ಚ।
‘‘Kāmacchandañca byāpādaṃ, sakkāyadiṭṭhimeva ca;
ಸೀಲಬ್ಬತಪರಾಮಾಸಂ, ವಿಚಿಕಿಚ್ಛಞ್ಚ ಪಞ್ಚಮಂ॥
Sīlabbataparāmāsaṃ, vicikicchañca pañcamaṃ.
೧೬೬.
166.
‘‘ಸಂಯೋಜನಾನಿ ಏತಾನಿ, ಪಜಹಿತ್ವಾನ ಭಿಕ್ಖುನೀ।
‘‘Saṃyojanāni etāni, pajahitvāna bhikkhunī;
ಓರಮ್ಭಾಗಮನೀಯಾನಿ, ನಯಿದಂ ಪುನರೇಹಿಸಿ॥
Orambhāgamanīyāni, nayidaṃ punarehisi.
೧೬೭.
167.
‘‘ರಾಗಂ ಮಾನಂ ಅವಿಜ್ಜಞ್ಚ, ಉದ್ಧಚ್ಚಞ್ಚ ವಿವಜ್ಜಿಯ।
‘‘Rāgaṃ mānaṃ avijjañca, uddhaccañca vivajjiya;
ಸಂಯೋಜನಾನಿ ಛೇತ್ವಾನ, ದುಕ್ಖಸ್ಸನ್ತಂ ಕರಿಸ್ಸಸಿ॥
Saṃyojanāni chetvāna, dukkhassantaṃ karissasi.
೧೬೮.
168.
‘‘ಖೇಪೇತ್ವಾ ಜಾತಿಸಂಸಾರಂ, ಪರಿಞ್ಞಾಯ ಪುನಬ್ಭವಂ।
‘‘Khepetvā jātisaṃsāraṃ, pariññāya punabbhavaṃ;
ದಿಟ್ಠೇವ ಧಮ್ಮೇ ನಿಚ್ಛಾತಾ, ಉಪಸನ್ತಾ ಚರಿಸ್ಸತೀ’’ತಿ॥
Diṭṭheva dhamme nicchātā, upasantā carissatī’’ti.
… ಗುತ್ತಾ ಥೇರೀ…।
… Guttā therī….
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಥೇರೀಗಾಥಾ-ಅಟ್ಠಕಥಾ • Therīgāthā-aṭṭhakathā / ೭. ಗುತ್ತಾಥೇರೀಗಾಥಾವಣ್ಣನಾ • 7. Guttātherīgāthāvaṇṇanā
