| Library / Tipiṭaka / তিপিটক • Tipiṭaka / থেরীগাথাপাল়ি • Therīgāthāpāḷi |
৭. গুত্তাথেরীগাথা
7. Guttātherīgāthā
১৬৩.
163.
‘‘গুত্তে যদত্থং পব্বজ্জা, হিত্ৰা পুত্তং ৰসুং পিযং।
‘‘Gutte yadatthaṃ pabbajjā, hitvā puttaṃ vasuṃ piyaṃ;
তমেৰ অনুব্রূহেহি, মা চিত্তস্স ৰসং গমি॥
Tameva anubrūhehi, mā cittassa vasaṃ gami.
১৬৪.
164.
‘‘চিত্তেন ৰঞ্চিতা সত্তা, মারস্স ৰিসযে রতা।
‘‘Cittena vañcitā sattā, mārassa visaye ratā;
অনেকজাতিসংসারং, সন্ধাৰন্তি অৰিদ্দসূ॥
Anekajātisaṃsāraṃ, sandhāvanti aviddasū.
১৬৫.
165.
‘‘কামচ্ছন্দঞ্চ ব্যাপাদং, সক্কাযদিট্ঠিমেৰ চ।
‘‘Kāmacchandañca byāpādaṃ, sakkāyadiṭṭhimeva ca;
সীলব্বতপরামাসং, ৰিচিকিচ্ছঞ্চ পঞ্চমং॥
Sīlabbataparāmāsaṃ, vicikicchañca pañcamaṃ.
১৬৬.
166.
‘‘সংযোজনানি এতানি, পজহিত্ৰান ভিক্খুনী।
‘‘Saṃyojanāni etāni, pajahitvāna bhikkhunī;
ওরম্ভাগমনীযানি, নযিদং পুনরেহিসি॥
Orambhāgamanīyāni, nayidaṃ punarehisi.
১৬৭.
167.
‘‘রাগং মানং অৰিজ্জঞ্চ, উদ্ধচ্চঞ্চ ৰিৰজ্জিয।
‘‘Rāgaṃ mānaṃ avijjañca, uddhaccañca vivajjiya;
সংযোজনানি ছেত্ৰান, দুক্খস্সন্তং করিস্সসি॥
Saṃyojanāni chetvāna, dukkhassantaṃ karissasi.
১৬৮.
168.
‘‘খেপেত্ৰা জাতিসংসারং, পরিঞ্ঞায পুনব্ভৰং।
‘‘Khepetvā jātisaṃsāraṃ, pariññāya punabbhavaṃ;
দিট্ঠেৰ ধম্মে নিচ্ছাতা, উপসন্তা চরিস্সতী’’তি॥
Diṭṭheva dhamme nicchātā, upasantā carissatī’’ti.
… গুত্তা থেরী…।
… Guttā therī….
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / থেরীগাথা-অট্ঠকথা • Therīgāthā-aṭṭhakathā / ৭. গুত্তাথেরীগাথাৰণ্ণনা • 7. Guttātherīgāthāvaṇṇanā
