| Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi |
၁၆၃. ဂုဠာဒိအနုဇာနနာ
163. Guḷādianujānanā
၂၇၂. အထ ခော ဘဂဝာ သာဝတ္ထိယံ ယထာဘိရန္တံ ဝိဟရိတ္ဝာ ယေန ရာဇဂဟံ တေန စာရိကံ ပက္ကာမိ။ အဒ္ဒသာ ခော အာယသ္မာ ကင္ခာရေဝတော အန္တရာမဂ္ဂေ ဂုဠကရဏံ, ဩက္ကမိတ္ဝာ ဂုဠေ ပိဋ္ဌမ္ပိ ဆာရိကမ္ပိ ပက္ခိပန္တေ, ဒိသ္ဝာန ‘‘အကပ္ပိယော ဂုဠော သာမိသော, န ကပ္ပတိ ဂုဠော ဝိကာလေ ပရိဘုဉ္ဇိတု’’န္တိ ကုက္ကုစ္စာယန္တော သပရိသော ဂုဠံ န ပရိဘုဉ္ဇတိ။ ယေပိသ္သ သောတဗ္ဗံ မညန္တိ, တေပိ ဂုဠံ န ပရိဘုဉ္ဇန္တိ။ ဘဂဝတော ဧတမတ္ထံ အာရောစေသုံ။ ကိမတ္ထာယ 1, ဘိက္ခဝေ, ဂုဠေ ပိဋ္ဌမ္ပိ ဆာရိကမ္ပိ ပက္ခိပန္တီတိ? ထဒ္ဓတ္ထာယ 2 ဘဂဝာတိ။ သစေ, ဘိက္ခဝေ, ထဒ္ဓတ္ထာယ ဂုဠေ ပိဋ္ဌမ္ပိ ဆာရိကမ္ပိ ပက္ခိပန္တိ, သော စ ဂုဠောတ္ဝေဝ သင္ခံ ဂစ္ဆတိ။ အနုဇာနာမိ, ဘိက္ခဝေ, ယထာသုခံ ဂုဠံ ပရိဘုဉ္ဇိတုန္တိ။
272. Atha kho bhagavā sāvatthiyaṃ yathābhirantaṃ viharitvā yena rājagahaṃ tena cārikaṃ pakkāmi. Addasā kho āyasmā kaṅkhārevato antarāmagge guḷakaraṇaṃ, okkamitvā guḷe piṭṭhampi chārikampi pakkhipante, disvāna ‘‘akappiyo guḷo sāmiso, na kappati guḷo vikāle paribhuñjitu’’nti kukkuccāyanto sapariso guḷaṃ na paribhuñjati. Yepissa sotabbaṃ maññanti, tepi guḷaṃ na paribhuñjanti. Bhagavato etamatthaṃ ārocesuṃ. Kimatthāya 3, bhikkhave, guḷe piṭṭhampi chārikampi pakkhipantīti? Thaddhatthāya 4 bhagavāti. Sace, bhikkhave, thaddhatthāya guḷe piṭṭhampi chārikampi pakkhipanti, so ca guḷotveva saṅkhaṃ gacchati. Anujānāmi, bhikkhave, yathāsukhaṃ guḷaṃ paribhuñjitunti.
အဒ္ဒသာ ခော အာယသ္မာ ကင္ခာရေဝတော အန္တရာမဂ္ဂေ ဝစ္စေ မုဂ္ဂံ ဇာတံ, ပသ္သိတ္ဝာ ‘‘အကပ္ပိယာ မုဂ္ဂာ; ပက္ကာပိ မုဂ္ဂာ ဇာယန္တီတိ’’ ကုက္ကုစ္စာယန္တော သပရိသော မုဂ္ဂံ န ပရိဘုဉ္ဇတိ။ ယေပိသ္သ သောတဗ္ဗံ မညန္တိ, တေပိ မုဂ္ဂံ န ပရိဘုဉ္ဇန္တိ။ ဘဂဝတော ဧတမတ္ထံ အာရောစေသုံ။ သစေ 5, ဘိက္ခဝေ, ပက္ကာပိ မုဂ္ဂာ ဇာယန္တိ , အနုဇာနာမိ, ဘိက္ခဝေ, ယထာသုခံ မုဂ္ဂံ ပရိဘုဉ္ဇိတုန္တိ။
Addasā kho āyasmā kaṅkhārevato antarāmagge vacce muggaṃ jātaṃ, passitvā ‘‘akappiyā muggā; pakkāpi muggā jāyantīti’’ kukkuccāyanto sapariso muggaṃ na paribhuñjati. Yepissa sotabbaṃ maññanti, tepi muggaṃ na paribhuñjanti. Bhagavato etamatthaṃ ārocesuṃ. Sace 6, bhikkhave, pakkāpi muggā jāyanti , anujānāmi, bhikkhave, yathāsukhaṃ muggaṃ paribhuñjitunti.
၂၇၃. တေန ခော ပန သမယေန အညတရသ္သ ဘိက္ခုနော ဥဒရဝာတာဗာဓော ဟောတိ။ သော လောဏသောဝီရကံ အပာယိ။ တသ္သ သော ဥဒရဝာတာဗာဓော ပဋိပ္ပသ္သမ္ဘိ။ ဘဂဝတော ဧတမတ္ထံ အာရောစေသုံ ။ အနုဇာနာမိ, ဘိက္ခဝေ, ဂိလာနသ္သ လောဏသောဝီရကံ; အဂိလာနသ္သ ဥဒကသမ္ဘိန္နံ ပာနပရိဘောဂေန ပရိဘုဉ္ဇိတုန္တိ။
273. Tena kho pana samayena aññatarassa bhikkhuno udaravātābādho hoti. So loṇasovīrakaṃ apāyi. Tassa so udaravātābādho paṭippassambhi. Bhagavato etamatthaṃ ārocesuṃ . Anujānāmi, bhikkhave, gilānassa loṇasovīrakaṃ; agilānassa udakasambhinnaṃ pānaparibhogena paribhuñjitunti.
ဂုဠာဒိအနုဇာနနာ နိဋ္ဌိတာ။
Guḷādianujānanā niṭṭhitā.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝဂ္ဂ-အဋ္ဌကထာ • Mahāvagga-aṭṭhakathā / ဂုဠာဒိအနုဇာနနကထာ • Guḷādianujānanakathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ဂုဠာဒိအနုဇာနနကထာဝဏ္ဏနာ • Guḷādianujānanakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ဂုဠာဒိအနုဇာနနကထာဝဏ္ဏနာ • Guḷādianujānanakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၁၆၃. ဂုဠာဒိအနုဇာနနကထာ • 163. Guḷādianujānanakathā
