| Library / Tipiṭaka / തിപിടക • Tipiṭaka / സുത്തനിപാതപാളി • Suttanipātapāḷi |
൨. ഗുഹട്ഠകസുത്തം
2. Guhaṭṭhakasuttaṃ
൭൭൮.
778.
സത്തോ ഗുഹായം ബഹുനാഭിഛന്നോ, തിട്ഠം നരോ മോഹനസ്മിം പഗാള്ഹോ;
Satto guhāyaṃ bahunābhichanno, tiṭṭhaṃ naro mohanasmiṃ pagāḷho;
ദൂരേ വിവേകാ ഹി തഥാവിധോ സോ, കാമാ ഹി ലോകേ ന ഹി സുപ്പഹായാ.
Dūre vivekā hi tathāvidho so, kāmā hi loke na hi suppahāyā.
൭൭൯.
779.
ഇച്ഛാനിദാനാ ഭവസാതബദ്ധാ, തേ ദുപ്പമുഞ്ചാ ന ഹി അഞ്ഞമോക്ഖാ;
Icchānidānā bhavasātabaddhā, te duppamuñcā na hi aññamokkhā;
പച്ഛാ പുരേ വാപി അപേക്ഖമാനാ, ഇമേവ കാമേ പുരിമേവ ജപ്പം.
Pacchā pure vāpi apekkhamānā, imeva kāme purimeva jappaṃ.
൭൮൦.
780.
കാമേസു ഗിദ്ധാ പസുതാ പമൂള്ഹാ, അവദാനിയാ തേ വിസമേ നിവിട്ഠാ;
Kāmesu giddhā pasutā pamūḷhā, avadāniyā te visame niviṭṭhā;
ദുക്ഖൂപനീതാ പരിദേവയന്തി, കിംസൂ ഭവിസ്സാമ ഇതോ ചുതാസേ.
Dukkhūpanītā paridevayanti, kiṃsū bhavissāma ito cutāse.
൭൮൧.
781.
തസ്മാ ഹി സിക്ഖേഥ ഇധേവ ജന്തു, യം കിഞ്ചി ജഞ്ഞാ വിസമന്തി ലോകേ;
Tasmā hi sikkhetha idheva jantu, yaṃ kiñci jaññā visamanti loke;
ന തസ്സ ഹേതൂ വിസമം ചരേയ്യ, അപ്പഞ്ഹിദം ജീവിതമാഹു ധീരാ.
Na tassa hetū visamaṃ careyya, appañhidaṃ jīvitamāhu dhīrā.
൭൮൨.
782.
പസ്സാമി ലോകേ പരിഫന്ദമാനം, പജം ഇമം തണ്ഹഗതം ഭവേസു;
Passāmi loke pariphandamānaṃ, pajaṃ imaṃ taṇhagataṃ bhavesu;
ഹീനാ നരാ മച്ചുമുഖേ ലപന്തി, അവീതതണ്ഹാസേ ഭവാഭവേസു.
Hīnā narā maccumukhe lapanti, avītataṇhāse bhavābhavesu.
൭൮൩.
783.
മമായിതേ പസ്സഥ ഫന്ദമാനേ, മച്ഛേവ അപ്പോദകേ ഖീണസോതേ;
Mamāyite passatha phandamāne, maccheva appodake khīṇasote;
ഏതമ്പി ദിസ്വാ അമമോ ചരേയ്യ, ഭവേസു ആസത്തിമകുബ്ബമാനോ.
Etampi disvā amamo careyya, bhavesu āsattimakubbamāno.
൭൮൪.
784.
ഉഭോസു അന്തേസു വിനേയ്യ ഛന്ദം, ഫസ്സം പരിഞ്ഞായ അനാനുഗിദ്ധോ;
Ubhosu antesu vineyya chandaṃ, phassaṃ pariññāya anānugiddho;
യദത്തഗരഹീ തദകുബ്ബമാനോ, ന ലിപ്പതീ 1 ദിട്ഠസുതേസു ധീരോ.
Yadattagarahī tadakubbamāno, na lippatī 2 diṭṭhasutesu dhīro.
൭൮൫.
785.
സഞ്ഞം പരിഞ്ഞാ വിതരേയ്യ ഓഘം, പരിഗ്ഗഹേസു മുനി നോപലിത്തോ;
Saññaṃ pariññā vitareyya oghaṃ, pariggahesu muni nopalitto;
അബ്ബൂള്ഹസല്ലോ ചരമപ്പമത്തോ, നാസീസതീ 3 ലോകമിമം പരഞ്ചാതി.
Abbūḷhasallo caramappamatto, nāsīsatī 4 lokamimaṃ parañcāti.
ഗുഹട്ഠകസുത്തം ദുതിയം നിട്ഠിതം.
Guhaṭṭhakasuttaṃ dutiyaṃ niṭṭhitaṃ.
Footnotes:
Related texts:
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / ഖുദ്ദകനികായ (അട്ഠകഥാ) • Khuddakanikāya (aṭṭhakathā) / സുത്തനിപാത-അട്ഠകഥാ • Suttanipāta-aṭṭhakathā / ൨. ഗുഹട്ഠകസുത്തവണ്ണനാ • 2. Guhaṭṭhakasuttavaṇṇanā
