| Library / Tipiṭaka / ติปิฎก • Tipiṭaka / สุตฺตนิปาตปาฬิ • Suttanipātapāḷi |
๒. คุหฎฺฐกสุตฺตํ
2. Guhaṭṭhakasuttaṃ
๗๗๘.
778.
สโตฺต คุหายํ พหุนาภิฉโนฺน, ติฎฺฐํ นโร โมหนสฺมิํ ปคาโฬฺห;
Satto guhāyaṃ bahunābhichanno, tiṭṭhaṃ naro mohanasmiṃ pagāḷho;
ทูเร วิเวกา หิ ตถาวิโธ โส, กามา หิ โลเก น หิ สุปฺปหายาฯ
Dūre vivekā hi tathāvidho so, kāmā hi loke na hi suppahāyā.
๗๗๙.
779.
อิจฺฉานิทานา ภวสาตพทฺธา, เต ทุปฺปมุญฺจา น หิ อญฺญโมกฺขา;
Icchānidānā bhavasātabaddhā, te duppamuñcā na hi aññamokkhā;
ปจฺฉา ปุเร วาปิ อเปกฺขมานา, อิเมว กาเม ปุริเมว ชปฺปํฯ
Pacchā pure vāpi apekkhamānā, imeva kāme purimeva jappaṃ.
๗๘๐.
780.
กาเมสุ คิทฺธา ปสุตา ปมูฬฺหา, อวทานิยา เต วิสเม นิวิฎฺฐา;
Kāmesu giddhā pasutā pamūḷhā, avadāniyā te visame niviṭṭhā;
ทุกฺขูปนีตา ปริเทวยนฺติ, กิํสู ภวิสฺสาม อิโต จุตาเสฯ
Dukkhūpanītā paridevayanti, kiṃsū bhavissāma ito cutāse.
๗๘๑.
781.
ตสฺมา หิ สิเกฺขถ อิเธว ชนฺตุ, ยํ กิญฺจิ ชญฺญา วิสมนฺติ โลเก;
Tasmā hi sikkhetha idheva jantu, yaṃ kiñci jaññā visamanti loke;
น ตสฺส เหตู วิสมํ จเรยฺย, อปฺปญฺหิทํ ชีวิตมาหุ ธีราฯ
Na tassa hetū visamaṃ careyya, appañhidaṃ jīvitamāhu dhīrā.
๗๘๒.
782.
ปสฺสามิ โลเก ปริผนฺทมานํ, ปชํ อิมํ ตณฺหคตํ ภเวสุ;
Passāmi loke pariphandamānaṃ, pajaṃ imaṃ taṇhagataṃ bhavesu;
หีนา นรา มจฺจุมุเข ลปนฺติ, อวีตตณฺหาเส ภวาภเวสุฯ
Hīnā narā maccumukhe lapanti, avītataṇhāse bhavābhavesu.
๗๘๓.
783.
มมายิเต ปสฺสถ ผนฺทมาเน, มเจฺฉว อโปฺปทเก ขีณโสเต;
Mamāyite passatha phandamāne, maccheva appodake khīṇasote;
เอตมฺปิ ทิสฺวา อมโม จเรยฺย, ภเวสุ อาสตฺติมกุพฺพมาโนฯ
Etampi disvā amamo careyya, bhavesu āsattimakubbamāno.
๗๘๔.
784.
อุโภสุ อเนฺตสุ วิเนยฺย ฉนฺทํ, ผสฺสํ ปริญฺญาย อนานุคิโทฺธ;
Ubhosu antesu vineyya chandaṃ, phassaṃ pariññāya anānugiddho;
ยทตฺตครหี ตทกุพฺพมาโน, น ลิปฺปตี 1 ทิฎฺฐสุเตสุ ธีโรฯ
Yadattagarahī tadakubbamāno, na lippatī 2 diṭṭhasutesu dhīro.
๗๘๕.
785.
สญฺญํ ปริญฺญา วิตเรยฺย โอฆํ, ปริคฺคเหสุ มุนิ โนปลิโตฺต;
Saññaṃ pariññā vitareyya oghaṃ, pariggahesu muni nopalitto;
อพฺพูฬฺหสโลฺล จรมปฺปมโตฺต, นาสีสตี 3 โลกมิมํ ปรญฺจาติฯ
Abbūḷhasallo caramappamatto, nāsīsatī 4 lokamimaṃ parañcāti.
คุหฎฺฐกสุตฺตํ ทุติยํ นิฎฺฐิตํฯ
Guhaṭṭhakasuttaṃ dutiyaṃ niṭṭhitaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / สุตฺตนิปาต-อฎฺฐกถา • Suttanipāta-aṭṭhakathā / ๒. คุหฎฺฐกสุตฺตวณฺณนา • 2. Guhaṭṭhakasuttavaṇṇanā
