| Library / Tipiṭaka / તિપિટક • Tipiṭaka / સુત્તનિપાતપાળિ • Suttanipātapāḷi |
૨. ગુહટ્ઠકસુત્તં
2. Guhaṭṭhakasuttaṃ
૭૭૮.
778.
સત્તો ગુહાયં બહુનાભિછન્નો, તિટ્ઠં નરો મોહનસ્મિં પગાળ્હો;
Satto guhāyaṃ bahunābhichanno, tiṭṭhaṃ naro mohanasmiṃ pagāḷho;
દૂરે વિવેકા હિ તથાવિધો સો, કામા હિ લોકે ન હિ સુપ્પહાયા.
Dūre vivekā hi tathāvidho so, kāmā hi loke na hi suppahāyā.
૭૭૯.
779.
ઇચ્છાનિદાના ભવસાતબદ્ધા, તે દુપ્પમુઞ્ચા ન હિ અઞ્ઞમોક્ખા;
Icchānidānā bhavasātabaddhā, te duppamuñcā na hi aññamokkhā;
પચ્છા પુરે વાપિ અપેક્ખમાના, ઇમેવ કામે પુરિમેવ જપ્પં.
Pacchā pure vāpi apekkhamānā, imeva kāme purimeva jappaṃ.
૭૮૦.
780.
કામેસુ ગિદ્ધા પસુતા પમૂળ્હા, અવદાનિયા તે વિસમે નિવિટ્ઠા;
Kāmesu giddhā pasutā pamūḷhā, avadāniyā te visame niviṭṭhā;
દુક્ખૂપનીતા પરિદેવયન્તિ, કિંસૂ ભવિસ્સામ ઇતો ચુતાસે.
Dukkhūpanītā paridevayanti, kiṃsū bhavissāma ito cutāse.
૭૮૧.
781.
તસ્મા હિ સિક્ખેથ ઇધેવ જન્તુ, યં કિઞ્ચિ જઞ્ઞા વિસમન્તિ લોકે;
Tasmā hi sikkhetha idheva jantu, yaṃ kiñci jaññā visamanti loke;
ન તસ્સ હેતૂ વિસમં ચરેય્ય, અપ્પઞ્હિદં જીવિતમાહુ ધીરા.
Na tassa hetū visamaṃ careyya, appañhidaṃ jīvitamāhu dhīrā.
૭૮૨.
782.
પસ્સામિ લોકે પરિફન્દમાનં, પજં ઇમં તણ્હગતં ભવેસુ;
Passāmi loke pariphandamānaṃ, pajaṃ imaṃ taṇhagataṃ bhavesu;
હીના નરા મચ્ચુમુખે લપન્તિ, અવીતતણ્હાસે ભવાભવેસુ.
Hīnā narā maccumukhe lapanti, avītataṇhāse bhavābhavesu.
૭૮૩.
783.
મમાયિતે પસ્સથ ફન્દમાને, મચ્છેવ અપ્પોદકે ખીણસોતે;
Mamāyite passatha phandamāne, maccheva appodake khīṇasote;
એતમ્પિ દિસ્વા અમમો ચરેય્ય, ભવેસુ આસત્તિમકુબ્બમાનો.
Etampi disvā amamo careyya, bhavesu āsattimakubbamāno.
૭૮૪.
784.
ઉભોસુ અન્તેસુ વિનેય્ય છન્દં, ફસ્સં પરિઞ્ઞાય અનાનુગિદ્ધો;
Ubhosu antesu vineyya chandaṃ, phassaṃ pariññāya anānugiddho;
યદત્તગરહી તદકુબ્બમાનો, ન લિપ્પતી 1 દિટ્ઠસુતેસુ ધીરો.
Yadattagarahī tadakubbamāno, na lippatī 2 diṭṭhasutesu dhīro.
૭૮૫.
785.
સઞ્ઞં પરિઞ્ઞા વિતરેય્ય ઓઘં, પરિગ્ગહેસુ મુનિ નોપલિત્તો;
Saññaṃ pariññā vitareyya oghaṃ, pariggahesu muni nopalitto;
અબ્બૂળ્હસલ્લો ચરમપ્પમત્તો, નાસીસતી 3 લોકમિમં પરઞ્ચાતિ.
Abbūḷhasallo caramappamatto, nāsīsatī 4 lokamimaṃ parañcāti.
ગુહટ્ઠકસુત્તં દુતિયં નિટ્ઠિતં.
Guhaṭṭhakasuttaṃ dutiyaṃ niṭṭhitaṃ.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / ખુદ્દકનિકાય (અટ્ઠકથા) • Khuddakanikāya (aṭṭhakathā) / સુત્તનિપાત-અટ્ઠકથા • Suttanipāta-aṭṭhakathā / ૨. ગુહટ્ઠકસુત્તવણ્ણના • 2. Guhaṭṭhakasuttavaṇṇanā
