| Library / Tipiṭaka / திபிடக • Tipiṭaka / ஸுத்தனிபாதபாளி • Suttanipātapāḷi |
2. கு³ஹட்ட²கஸுத்தங்
2. Guhaṭṭhakasuttaṃ
778.
778.
ஸத்தோ கு³ஹாயங் ப³ஹுனாபி⁴ச²ன்னோ, திட்ட²ங் நரோ மோஹனஸ்மிங் பகா³ள்ஹோ;
Satto guhāyaṃ bahunābhichanno, tiṭṭhaṃ naro mohanasmiṃ pagāḷho;
தூ³ரே விவேகா ஹி ததா²விதோ⁴ ஸோ, காமா ஹி லோகே ந ஹி ஸுப்பஹாயா.
Dūre vivekā hi tathāvidho so, kāmā hi loke na hi suppahāyā.
779.
779.
இச்சா²னிதா³னா ப⁴வஸாதப³த்³தா⁴, தே து³ப்பமுஞ்சா ந ஹி அஞ்ஞமொக்கா²;
Icchānidānā bhavasātabaddhā, te duppamuñcā na hi aññamokkhā;
பச்சா² புரே வாபி அபெக்க²மானா, இமேவ காமே புரிமேவ ஜப்பங்.
Pacchā pure vāpi apekkhamānā, imeva kāme purimeva jappaṃ.
780.
780.
காமேஸு கி³த்³தா⁴ பஸுதா பமூள்ஹா, அவதா³னியா தே விஸமே நிவிட்டா²;
Kāmesu giddhā pasutā pamūḷhā, avadāniyā te visame niviṭṭhā;
து³க்கூ²பனீதா பரிதே³வயந்தி, கிங்ஸூ ப⁴விஸ்ஸாம இதோ சுதாஸே.
Dukkhūpanītā paridevayanti, kiṃsū bhavissāma ito cutāse.
781.
781.
தஸ்மா ஹி ஸிக்கே²த² இதே⁴வ ஜந்து, யங் கிஞ்சி ஜஞ்ஞா விஸமந்தி லோகே;
Tasmā hi sikkhetha idheva jantu, yaṃ kiñci jaññā visamanti loke;
ந தஸ்ஸ ஹேதூ விஸமங் சரெய்ய, அப்பஞ்ஹித³ங் ஜீவிதமாஹு தீ⁴ரா.
Na tassa hetū visamaṃ careyya, appañhidaṃ jīvitamāhu dhīrā.
782.
782.
பஸ்ஸாமி லோகே பரிப²ந்த³மானங், பஜங் இமங் தண்ஹக³தங் ப⁴வேஸு;
Passāmi loke pariphandamānaṃ, pajaṃ imaṃ taṇhagataṃ bhavesu;
ஹீனா நரா மச்சுமுகே² லபந்தி, அவீததண்ஹாஸே ப⁴வாப⁴வேஸு.
Hīnā narā maccumukhe lapanti, avītataṇhāse bhavābhavesu.
783.
783.
மமாயிதே பஸ்ஸத² ப²ந்த³மானே, மச்சே²வ அப்போத³கே கீ²ணஸோதே;
Mamāyite passatha phandamāne, maccheva appodake khīṇasote;
ஏதம்பி தி³ஸ்வா அமமோ சரெய்ய, ப⁴வேஸு ஆஸத்திமகுப்³ப³மானோ.
Etampi disvā amamo careyya, bhavesu āsattimakubbamāno.
784.
784.
உபோ⁴ஸு அந்தேஸு வினெய்ய ச²ந்த³ங், ப²ஸ்ஸங் பரிஞ்ஞாய அனானுகி³த்³தோ⁴;
Ubhosu antesu vineyya chandaṃ, phassaṃ pariññāya anānugiddho;
யத³த்தக³ரஹீ தத³குப்³ப³மானோ, ந லிப்பதீ 1 தி³ட்ட²ஸுதேஸு தீ⁴ரோ.
Yadattagarahī tadakubbamāno, na lippatī 2 diṭṭhasutesu dhīro.
785.
785.
ஸஞ்ஞங் பரிஞ்ஞா விதரெய்ய ஓக⁴ங், பரிக்³க³ஹேஸு முனி நோபலித்தோ;
Saññaṃ pariññā vitareyya oghaṃ, pariggahesu muni nopalitto;
அப்³பூ³ள்ஹஸல்லோ சரமப்பமத்தோ, நாஸீஸதீ 3 லோகமிமங் பரஞ்சாதி.
Abbūḷhasallo caramappamatto, nāsīsatī 4 lokamimaṃ parañcāti.
கு³ஹட்ட²கஸுத்தங் து³தியங் நிட்டி²தங்.
Guhaṭṭhakasuttaṃ dutiyaṃ niṭṭhitaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / ஸுத்தனிபாத-அட்ட²கதா² • Suttanipāta-aṭṭhakathā / 2. கு³ஹட்ட²கஸுத்தவண்ணனா • 2. Guhaṭṭhakasuttavaṇṇanā
