| Library / Tipiṭaka / តិបិដក • Tipiṭaka / មិលិន្ទបញ្ហបាឡិ • Milindapañhapāḷi |
៨. គោរូបង្គបញ្ហោ
8. Gorūpaṅgapañho
៨. ‘‘ភន្តេ នាគសេន, ‘គោរូបស្ស ចត្តារិ អង្គានិ គហេតព្ពានី’តិ យំ វទេសិ, កតមានិ តានិ ចត្តារិ អង្គានិ គហេតព្ពានី’’តិ? ‘‘យថា, មហារាជ, គោរូបោ សកំ គេហំ ន វិជហតិ, ឯវមេវ ខោ, មហារាជ, យោគិនា យោគាវចរេន សកោ កាយោ ន វិជហិតព្ពោ ‘អនិច្ចុច្ឆាទនបរិមទ្ទនភេទនវិកិរណវិទ្ធំសនធម្មោ អយំ កាយោ’តិ។ ឥទំ, មហារាជ, គោរូបស្ស បឋមំ អង្គំ គហេតព្ពំ។
8. ‘‘Bhante nāgasena, ‘gorūpassa cattāri aṅgāni gahetabbānī’ti yaṃ vadesi, katamāni tāni cattāri aṅgāni gahetabbānī’’ti? ‘‘Yathā, mahārāja, gorūpo sakaṃ gehaṃ na vijahati, evameva kho, mahārāja, yoginā yogāvacarena sako kāyo na vijahitabbo ‘aniccucchādanaparimaddanabhedanavikiraṇaviddhaṃsanadhammo ayaṃ kāyo’ti. Idaṃ, mahārāja, gorūpassa paṭhamaṃ aṅgaṃ gahetabbaṃ.
‘‘បុន ចបរំ, មហារាជ, គោរូបោ អាទិន្នធុរោ សុខទុក្ខេន ធុរំ វហតិ, ឯវមេវ ខោ, មហារាជ, យោគិនា យោគាវចរេន អាទិន្នព្រហ្មចរិយេន សុខទុក្ខេន យាវ ជីវិតបរិយាទានា អាបាណកោដិកំ ព្រហ្មចរិយំ ចរិតព្ពំ។ ឥទំ, មហារាជ, គោរូបស្ស ទុតិយំ អង្គំ គហេតព្ពំ។
‘‘Puna caparaṃ, mahārāja, gorūpo ādinnadhuro sukhadukkhena dhuraṃ vahati, evameva kho, mahārāja, yoginā yogāvacarena ādinnabrahmacariyena sukhadukkhena yāva jīvitapariyādānā āpāṇakoṭikaṃ brahmacariyaṃ caritabbaṃ. Idaṃ, mahārāja, gorūpassa dutiyaṃ aṅgaṃ gahetabbaṃ.
‘‘បុន ចបរំ, មហារាជ, គោរូបោ ឆន្ទេន ឃាយមានោ បានីយំ បិវតិ, ឯវមេវ ខោ, មហារាជ, យោគិនា យោគាវចរេន អាចរិយុបជ្ឈាយានំ អនុសិដ្ឋិ ឆន្ទេន បេមេន បសាទេន ឃាយមានេន បដិគ្គហេតព្ពា។ ឥទំ, មហារាជ, គោរូបស្ស តតិយំ អង្គំ គហេតព្ពំ។
‘‘Puna caparaṃ, mahārāja, gorūpo chandena ghāyamāno pānīyaṃ pivati, evameva kho, mahārāja, yoginā yogāvacarena ācariyupajjhāyānaṃ anusiṭṭhi chandena pemena pasādena ghāyamānena paṭiggahetabbā. Idaṃ, mahārāja, gorūpassa tatiyaṃ aṅgaṃ gahetabbaṃ.
‘‘បុន ចបរំ, មហារាជ, គោរូបោ យេន កេនចិ វាហិយមានោ វហតិ, ឯវមេវ ខោ, មហារាជ, យោគិនា យោគាវចរេន ថេរនវមជ្ឈិមភិក្ខូនម្បិ គិហិឧបាសកស្សាបិ ឱវាទានុសាសនី សិរសា សម្បដិច្ឆិតព្ពា។ ឥទំ, មហារាជ, គោរូបស្ស ចតុត្ថំ អង្គំ គហេតព្ពំ។ ភាសិតម្បេតំ, មហារាជ, ថេរេន សារិបុត្តេន ធម្មសេនាបតិនា –
‘‘Puna caparaṃ, mahārāja, gorūpo yena kenaci vāhiyamāno vahati, evameva kho, mahārāja, yoginā yogāvacarena theranavamajjhimabhikkhūnampi gihiupāsakassāpi ovādānusāsanī sirasā sampaṭicchitabbā. Idaṃ, mahārāja, gorūpassa catutthaṃ aṅgaṃ gahetabbaṃ. Bhāsitampetaṃ, mahārāja, therena sāriputtena dhammasenāpatinā –
‘‘‘តទហុ បព្ពជិតោ សន្តោ, ជាតិយា សត្តវស្សិកោ;
‘‘‘Tadahu pabbajito santo, jātiyā sattavassiko;
‘‘‘តិព្ពំ ឆន្ទញ្ច បេមញ្ច, តស្មិំ ទិស្វា ឧបដ្ឋបេ;
‘‘‘Tibbaṃ chandañca pemañca, tasmiṃ disvā upaṭṭhape;
ឋបេយ្យាចរិយដ្ឋានេ, សក្កច្ច នំ បុនប្បុន’’’ន្តិ។
Ṭhapeyyācariyaṭṭhāne, sakkacca naṃ punappuna’’’nti.
គោរូបង្គបញ្ហោ អដ្ឋមោ។
Gorūpaṅgapañho aṭṭhamo.
Footnotes:
